vun Behrend Böckmann

Sülfst Jean-Jacques Rousseau (1712-1778), dei uns as Denker mit sien Wark "Du contract social" (düütsch: dat Afkåmen mit dei Sellschap, "Der Gesellschaftsvertrag") dei niege Welt un mit sienen Roman "Émil" den niegen Minschen verkloren wull, lött den Läser weiten, dat sien Émil twors taun demokrat'schen Börger uptreckt werd, einer, dei sik dei Devis "Liberté, Égalité, Fraternité" tau eigen måkt, un wenn hei nich so läwt un hannelt, as dat nödig is, möt hei ok dei Schranken von sien Daun marken. Dat näumt Rousseau dat "negative Uptrecken" un verklort dit Prinzip so: Ritt Émil in'n Gorn dei Bohnenplanten rut, denn kricht hei kein Bohnen tau äten; un schmitt hei in Winter dei Finsterschief in, denn möt hei in 'n Kollen schlapen. Dat heit wull mit anner Wurten, dat Kinner blot frie upwassen kœnen, wenn's ok dei Grenzen von ehr Daun beläben.

An dei Gedanken von Rousseau hemm' sik låters plietsche Schaulmeisters 'n Ogenspeigel nåhmen, dat Uptrecken von Kinner nie dörchdacht un sik as "Reformpädagogen" 'n Nåmen måkt. Kinner sallen Kinner sien un as Kinner upbläuhn, sei sallen sülfst fatsleggen, wennihr sei wat wie inne Schaul måken un sik sülben utsäuken, wat 's lihrn willen un mit 'n Kummerkasten un 'n Schäulerparlement as Kind all Demokratie inne Schaul beläben.

Dei Amerikaner John Dewey (1889-1952) grünnt 1896 mit sien Fru in Chicago 'n "laboratory school" , in wecker dei Schäuler Hülp von'n Schaulmeister kriegen, wenn's dei Welt in'n Schaulgorn, inne Bäukerstuf orrer Warkstäden miteinanner erkunnen, un näumt dat denn Projektünnerricht.

Dei österrieker Denker Rudolf Steiner (1861-1925) erfinnt dei von'n "praktischen Okkultismus" stüert "Anthroposophie", 'n Mischung ut philosophisch Denken, Stirnenkiekerie (Esoterik) un christlichen Globen. Hei entwickelt dat "anthroposophische Prinzip" för dei Schaul, dei Medizin un Pharmazie, för dei biologisch-dynamisch Landwirtschaft un dei Architektur. Dei ierst Waldörp-Schaul nå Steiner sien Ansichten wür 1919 in Stuttgart up Bäden von'n Direkter vonne Waldorf-Astoria-Zigarettenfabrik för Arbeiderkinner grünnt. Morgenkreis, Gartenarbeit, keine Noten, in Niebauten ersetten Runnungen Ecken un Kanten, Plünnen ut Naturfasern, Eurythmie (Bewegungskunst), vegetarische Kost... dat is dat Anseihn von Waldörp-Pädagogik un is doch männig Schäuler gaut bekåmen.

Anners güng un geiht dat in dei 1921von Alexander Neill (1883-1973) grünnt weltberühmte Internatsschaul Summerhill in Schottland för 70 Schäulers tau. Dor süllen dei Kinner sülben bestimmen, wennihr sei wat daun un låten wullen. Dei Grünner Neill wull dei Kinner ehr Kindheit taurüchgäben, sei süllen Demokratie läben un åhn Schaularbeiten, Zensuren un Prüfungen as Persönlichkeit "antiautoritär" upbläuhn. Bet hüt hett sik hollen, dat 'n Schäuler blot taun Ünnnericht kümmt, wenn hei Lust dortau hett. Wohr sall œwer ok sien, dat Öllern väl Geld för disse Oort von Billung un Uptrecken utgäben hemm' un dei miehrsten Kinner dat denn doch in't Läben nich wiet bröcht hemm'.

Döch den Vietnamkrieg von 1955 bet 1975 mit bet tau 3 Milljonen dode Vietnamesen un mihr as 60.000 dode Amerikaner un Verbünnete entwickelt sik
dei Hippie-Kultur taun politsch-soziale Protestbewägung, dei dörch dei Pill noch 'n grötteren Schwung kreech. Studenten bömen sik up, dei RAF ward 1970 taun Gefohr, Alice Schwarzer bringt 1977 "Emma" up'n Markt, dei Sellschap wannelt sik sachtens in Richtung Liberalisierung, inne 80er Johr schnackt man von Quotenfrugens, queere Minnerheiten spälen nich mihr Verstäken un fieern as LGBT den LSD so, as dei Grotöllern Austbier fieert hemm'. Un so verännert dei soziale Wannel ok dei Minschen. Öllern trecken ehr Kinner "modern" up, sei möten öllere Minschen nich mihr mit Achtung taumööt kamen, un fründlich Stråken kann as sexuelle Belästigung orrer as Liewsverletzung utlecht warden.

Un so ward ok nich vör Schaulen un Ünnerricht hollstopp måkt. Mit Blick up olle Reformschaulen, so as beschräben, grünnen sik niege Privatschaulen mit Projekt- orrer Blockünnerricht, Friee Arbeit nå Montessori orrer 'n Wäkenplan orrer Lihrn in'n Gorn orrer bi'n künstlerisch Beschäftigung. Männigmål sünd dei Öllern, dei dei Generatschon X tauräkent warden kœnen, sülben dei Grünner von'n Privatschaul, wenn's wat gägen dei staatlich Schaul intauwennen hemm'. Œwer ok plietsche Lihrers, dei dat iernst nähmen, dat jede Schaul dörch 'n "Corporate Identity"
einmalig sien sall, grünnen Privatschaulen.

Dei Kinner von hüt wassen in'n digitale Welt up, Schönschrieben un Gedicht ut'n Kopp upseggen is oltmod'sch, dei Öllern hemm' sik nich mihr leif, wenn dei Geschwisterwunsch upkümmt, sonnern dei Vadder möt dei Mudder besåmen, un inne Spälschaul kriegen dei Lütten all mit, dat's ünner Ümstänn in'n verkiehrten Körper stäken. Gröttere Schäuler weiten nich mal, woans man sik in ein KZ-Gedenkstäd benähmen möt. Kulturelles Koma! Man taugliek sallen wi all opwaken un "woke" warden. Dat un noch väl mihr geiht mi as ollen witten Mann dörch 'n Kopp, wenn ik denn hür un läs, wat so passieren kann:

• Up'n Wihnachtsmarkt in Strålsund stråkt 'n Wihnachtsmann mit johrelanger Praxis 'n Kind mit sien Rut, dei Mudder höllt dat för dulle Schlääch, löppt taun Afkaten, verklåcht den Wihnachtsmann, un nå väl hen un her möt hei 4000€ as Stråf spendiern. — Överlech mal, wat dor noch ein up den Wiehnachtsmarkt Wiehnachtsmann spälen will…
• In Rostock will 'n Spälschaul mit dei Kinner 'n Indianerparty fieern, un dor kümmt 'n "woket" Öllerndeil up den Infall, dat dat nich mihr "Indianer" heiten dörf, wo dei Schuumkuss orr Schokokuss nich miehr bi sienen ollen harmlosen Nåmen nöömt warden dörf un dat Zigeunergulasch taun Balkangulasch ward. Ut dei Indianerparty wür nu dei Pier- un Pony-Party.
• Noch schöner kümmt dat in Köln, wo wull woke un gräune Beamten vonne Stadverwaltung den Infall hemm', all 700 Spälplatzschiller gägen niege uttauschudern, dei mit "Spiel- und Aktionsfläche" den Inklusionsgedanken taun Utdruck bringen. Allein för den niegen bunten Schillerentwurf würn all 38.000 € in'n Hushalt vörseihn.
• Un denn noch dat. Dor spälen Frugens Fautball, hollen Europameisterschaftsspäle inne Schwiez af — un dor kümmt einer up den Infall, disse Frugensmannschaft woke un gennergerecht Frugensschaft tau näumen. Wecker so schnackt, dei kennt sik doch würklich nich inne Geschicht ut, denn dei 1931 grünnten Frugensschaften wiern inne NS-Tiet dei Organisatschon, dei dat natschonalsozialistisch Denken dei düütschen Frugens bibögen süll.

Miehr un miehr schient mi dei Wokeness as ein Aart kulturelles Koma — dat Gegendeil vun Waaksien. Un taumeist warrt nix dordörch wunnen. Nix as Kompliziertheit in'n Ümgang mit'nanner. Wo sünd wi henkåmen, fråch ik mi, wennihr kümmt dei Dach, dat man den Pöker nich mihr Noors, sonnern Anus, un den Schnuppen nich mihr Rotz, sonnern Rhinitis näumen möt?