Wünsch di wat 2022

vun Hannes Frahm

"Wünsch di wat?" Ach ja, wi hebbt je bald wedder Wiehnachten. Wiehnachten 2022! Un vör föfftig Johr? Dor weer ok Wiehnachten. Un dat weer de Tiet, dor weer dat ut mit "Wünsch di wat!"

Kannst di nich mehr op besinnen? In'n ZDF, dat Familienprogramm mit "Vivi Bach un Dietmar Schönherr". Dat leep vun 1969 bet 1972. De Moderaters un de Deelnehmers seten in de "Schnecke" un hebbt klöönt un denn mussen se de Opgaven lösen.

1969 — de Demos vun de '68er weren noch in'n Gang. Demonstreert woor in de Tiet vun den "Kolen Krieg" för dat Enn vun den Krieg in Vietnam, gegen dat Nootstandsgesett, gegen dat Oprüsten mit Atombomben usw. Dat hett denn noch en lange Tiet duert, bet de Krieg in Vietnam, Thailand, Kambodscha un Korea to Enn weer. En lange Tiet weer dat endlich mit de groten Kriegen vörbi.

In Februar 2022 is doch de russ'sche Diktater Wladimir Putin na lüttere Kriegen in'n Kaukasus merrn in Europa wedder mit en groten Krieg anfungen — gegen de Ukraine.

Düssen Krieg hett he "in'n Brand sett", eerst nadem Putin as Präsident op Duer op den Posten in Russland sitten kann. Nu is he Diktator un kann maken, wat he will. Un so as dat utsüht, intresseert he sik ok nich för de Minschen. Em intresseert blot dat Geld, de Dolers un de Macht.
Keen kann düssen Bandit stoppen?

Stoppen köönt em blot de Minschen vun de restliche Welt.
Un nich blot Putin mutt mit sien Krieg stoppt warrn, ne, dor sünd noch en Barg mehr an "Monarchen", de de Minschen to Raison bringen mööt, so as Assad in Syrien mit Erdogan, de dat Volk vun de Kurden kaputtmaken will, dat Rasseln mit de Keden vun China gegen Taiwan, usw.

Ja, "Wünsch di wat?" 2022 to Wiehnachten! Woor ik nu in düsse Snick sitten bi de Moderaters in'n Feernsehn, denn woor ik mi "Freden op de hele Welt" wünschen.
Düsse Wunsch is en Droom, dat weet ik. Aver af un to schüllt ok lüürlütte Drööm bilütten wohr warrn könen!