Zetsche. Och nee, Mist, dat is Bismarck. Tööv 'n Momang...

Zetsche, Antje un de Soziale Freeden

Vun Jens-Peter Bey

Kennst du Zetsche? Nee, dat is keene Plumm. Denk mal an den "Goden Steern op alle Straten". Oder an Antje, de kennst du doch förwiss. So heet dat ol Walross, uns NDR-Maskottchen. Antje is dod un utstoppt. Zetsche is nich dod un nich utstoppt un de Baas bi Daimler. Antje un Zetsche seet sik een lütt beten liek. Antje hett sik mit Prusten, Swimmen un Dükern Dag för Dag eenen Emmer Hering verdeent. Dor kunn se sik op verlaten. Zetsche kann sik op nix verlaten. He is kregel, aber ok een lütt beten suer, wieldat he nich nuch verdeent hett. Mien Blatt schrifft, he mutt in Momang op veel Geld verzichten. Sien Inkamen is düchtig tosamenschrumpelt. 2009 weern dat 4,3 Milljonen, 2008 weern dat üm und bi 5 Milljonen un 2007 mehr as 10 Milljonen.

Nu avers: Zetsche. Nee, Schiet! Dat is de Wallraff. Zetsche, wo büst du denn?

Nu hol diene Tranen noch mal 'n lütt beten trüch. Wenn dat so fix bargdaal geiht, is Untertürkheim in Not. Bitto hev ik blots vun de "fixe Grundvergütung" snackt. Un nich vun de "variable Vergütung". Giff ok noch "beste Boni". Hört sik na'n Pund Koffi an, is dat aber nich. Mehr so'n Slag Schlackermanschü babenup.

Wat in Dütschland in'n Dörchschnitt sünst noch verdeent wart, hett dat Bunnsamt för de Statistik opschreeben. 2009 weern dat netto Maand för Maand 1484 Euros, 2008 weern dat 1497 Euros un 2007 ok noch 1474 Euros. All de Negenmalklooken schüllt bit Verglieken nich vergeeten, dat op Karopapier mit twölf maltonehmen. Dor leppert sik Johr för Johr düchtig wat tosamen.

Antje, wat hest du dormang to söken? Segg mi lever, woneem Zetsche afbleven is!

Un bi't Verglieken nich de veelen Stüern vergeeten, de Zetsche affdrücken mutt! Sien suer verdeentes Geld warrt vun de Progreschoon reinweg opfreten. Botter in de Sünn is nix dorgegen. Siene Deenstwagens möt ok noch as "geldwerten Vördeel" verstüert warrn. Is reinweg duersam. De Last hesst du mit Drahtesel un ÖPNV nich. Un wenn Fru Zetsche eeren Mann fraagt, waveel Hushaltsgeld se kriegen deit un op dor ok noch 'n beten to'n Verleckern överblifft, mutt de arme Kirl tuckschullern un seggn: "Weet ick doch nich". Dat is keen Tostand. Mindestlohn mutt her!

Dat weer mal een Kieler Jung, de dat Leed sungen hett: 'Vörwarts un nich vergeeten, de Solidarität'. Hett sik damals bös rebellsch anhört. Hüttodags künnt wi lütten Lüüd de Solidarität mal praktisch bewiesen un den sozialen Freeden stiften. Bi de Böbelsten de wat leisten doot, so as Zetsche, schulln wi anfangen. Weeßt doch Bescheed: Dat! Lei! sten! mutt! sik! wedder! lohnen!

Endlich: Zetsche!!! Wat kiekt he avers so trurig?

Un nu pass op, Frank Bsirske mit dienen ver.di-Vereen: Mien patenteerte dynamische Lohnformel för Grootverdeeners ut alle Branchen geiht so: Wat 'ne Verköpersch in de Stünn bi Schlecker in de nieden XL-Ladens tominst verdeenen kann (6,78 Euro), musst du mit 'ne Milljon malnehmen. 6,78 Milljonen Euros schull Zetsche verdeenen. 4,3 Milljonen kommt as letzt Johr vun Daimler. De ARGE kann nu 2,48 Millionen opstocken. Denn sind wi wedder bi de 6,78 Milljonen. Un Zetsche weet genau wat he Johr för Johr in de Supp to krömeln hett. Wenn he klook is, lött he siene Fru bi Schlecker XL inköpen. Mit jeden Cent de de Verköpersch mehr in de Lohntüt hett, klingelt dat na miene Formel andeelig ok in Fru Zetsche eere Kniep. Is dat nich genial? Riep vör'n Freedenspries an de soziale Front.

Zetsche kann tofreden sien mit sien Salär. Un de lütten Lüüd künnt tofreeden sien, dat de Instieg in eenen Mindestlohn klappt hett. Un ik bün tofreeden, dat Schlecker nu bös in Druck is. An düssen schönen Dag will ik immer wedder denken. An de Wand kümmt nu een Foto vun Zetsche. Blangbi een Foto vun Antje un middenmank mien dynamische Lohnformel för Grootverdeeners!

Mien Huusaltar