Maiwormhochtiet. Klick op to'n Vergröttern!Antje Heßler geiht op Blaufohrt:

De Hochtiet vun'n Maiworm


Dat Weder weer al eenige Daag wunnderbor. De Sünn schien vun blagen Heven. De Raps stünn in vulle Blööt un de Appelbööm harrn ok al ehr smuckstes Kleed antrocken. Dor müssen wie eenfach en Blaufohrt maken. Wi wullen den Klützer Winkel upsöken.

Maiworm, Se. -- Klick op to'n Vergröttern!Rechts un links vun unsen Weg lüchen de gelen Rapsfeller. Uns Fohrt güng na't Klützer Över. An den lütten Woold stellen wi dat Auto af un dat güng to Foot wieder na't Över. In den Woold hoff ik enen Maisebber to finnen. Up unsen Weg keek ik ümmer na dat frische Maigröön, aver keen Käver weer to sehn. Dor reep mien Mann: "Kiek mal, wat dor up de Eer krabbelt!" Dat weer aver keen Maisebber. De Käver weer twors so groot as en Maisebber, sien Lief sehg ok en Maisebber lik, aver de Farv stimm ganz un gor nich. Düsse Käver weer blaag-swart! He freet de Blööt vun dat Scharbockskruut. Wi keken em dorbi to. Dor keem en tweeten blaag-swarten Käver ankrapen. He weer en beten lütter. Mit sien Föhler krabbel he na den annern Käver. Wat harr he vör? Wull he ok vun de Blööt freten?

Flirt bi Maiworms. -- Klick op to'n Vergröttern!

Sex bi Maiworms. -- Klick op to'n Vergröttern!Nee —, wi hebbt uns anstött un müssen lachen. He weer up Bruutschau! Natüürlich hebbt wi wieder tokeken. He klatter up den annern Käver un de Hochtiet weer perfekt.

Wedder to Huus, hebbt wi uns glieks klook maakt. De Käver höört to de Familie vun de Ölkäfer un heet "Schwarzblauer Ölkäfer" (Meloe proscarabaeus). Bi uns kennt man em ok as swarten Maiworm. He leevt geern in natuurbelaten Wischen, de bi us jümmer rorer warrt. So hebbt wi mehr Glück hatt, as us kloor weer, denn düsse Käver höört to de "gefährdeten Arten" in Düütschland, he steiht op de Rode List — twoors nich ganz baven, aver doch mit Stufe 3. Un dat warrt in Tokumst nich beter för em warrn, denn he is op Immen anwiest. Dat is nämli so: De Larven, de uns Käverpoor bi sin Hochtiet produzeert, klabastert up en Bloom un töövt, dat en wilde Imm vörbikümmt. Dat mutt en wilde Imm ween, bi Honnigimmen geiht dat nich. Bi de Imm hangt sik de Larv an't Been, lett sik in den Bu mitnehmen un sleit sik dor den Buuk vull mit Immenfoder un Immenlarven. Wenn bi de utplünnerte Imm nix mehr to halen is un uns Käverlarve so satt is, dat se nich mehr rülpsen kann, verpuppt se sik un kümmt later as fertige Maiworm-Käver wedder to'n Vörschien. Na, un düsse wilden Immen sünd ja ok heel roor. As dat de Honnigimmen slechter geiht, warrt de Tieden för wilde Immen ok nich rosiger ween. Maiworm, He. -- Klick op to'n Vergröttern!De Maiworm, de natuurbelaten Wischen un de wilden Immen sünd also grote Seltenheiten.

Enen Maisebber hebbt wi up uns Blaufohrt nich funnen. Dorför hebbt wi aver bi de Hochtiet vun en blaag-swarten Maiworm tokeken — en veel roreres Beleevnis as en Maisebber.


De Biller köönt Se per Klick vergröttern!
Torüch kaamt Se denn mit'n Zurück-Knoop vun den Browser.


na baven