 |
|
Öllere Daagbook-Notizen vun Marlou |
|
Hach ja, de G8-Gipfel is op en lütte Insel vör Georgia utbraken un al wedder afstorven. Op Inseln un Bargen flücht se al, de "Groten 8", vör de Demonstranten, vör — naja — dat Volk. Överall, woneem se tohoopkaamt, is't datsülvige. Nüms dröff ehr nehg kamen. De Insel weer beter isoleert as Alcatraz. Dat Volk is untofreden mit de "Groten 8", de "mächtigsten Mannslüüd vun'e Welt". — Wat denn, sitt dor Weerschapsbosse tosamen? De, de uns Levensbedingen dikteert, 'neem nüms wat gegen maken kann? De dat Volk nich wählen un nich afwählen kann un de dochen bestimmt, wat mit Millioonen Minschen passeert? De över de Gesetten staht un ehr Regeln sülven maakt? De Staaten erpressen un Volksweerschapen to Grunn richten köönt? Nee — bloots poor Politikers sünd dat, de Produkte vun harmlose, mehrst demokratische Wahlen. Dor palavert se rümmer, gaht mal ahn Slips, jammert beten över Nahoost, un rechttiedig to de Football-EM sünd se wedder tohuus. De lütten 8! De wohre Macht-Gipfel finnt denn wedder in'n Winter in Davos statt, 'neem de würklich mächtigsten Lüüd vun de Welt tohoopkaamt — bi dat Weerschaps- un Finanzdrepen. Demokratisch wählte Politikers dröfft dor mal an'n Katzentisch to Gast ween, so as nu de afrikaanschen Vertreter bi dat G8-Drepen — povere, lächerliche Gestalten. Dor dröfft se sik sowat seggen laten as "De Regeern vun de Länner in de Welt staht nu ünner de Kuntrull vun de internaschonalen Finanzmärkte" — un dröfft dorto stillswiegen. Glöövt Se nich? 1998 hett Schröder sik dat seggen laten, in Davos, un stillswiegen müss he. Stillswegen hett he. Wat blifft anners na för'n Politiker, as sik to'n williges Instrument vun düsse Mächtigen to maken? Wenn de Lobbies nich glieks sülven de Regeern övernehmt — as se dat mit de Bush-Clique in de USA daan hebt. "Wenn Wahlen wat ännern wöörn, weern se al lang verbaden" — dat kann wohr ween. Man ik geev dat nich op. Wi mööt gegenan gahn, dat de Pharmaindustie de povern Minschen in de Welt eenfach starven lett, wieldat se keen Gewinn bringt; dat de Agrarindustrie uns Planten manipuleert un utrott; dat de Waffenindustie uns Planeten in en Bombe verwannelt. Un dat de mächtige Finanzweerschap dat Volk verhöhnt un us in't Gesicht seggt, dat se de Regeern kunnerleert, nich wi. Dat se de Souverän is in'n Staat — op de Welt. Un wenn't ok wohr is — dat köönt wi ännern! Un villicht bewiest wi sogoor, dat ok Wahlen wat ännern köönt — gau, ehrdat se verbaden warrt. |
|
Dor hebbt wi dat. De Prozess gegen de islamistischen Attentäter in de Türkei is eerstmal platzt, wieldat de türkischen "Staatssekerheitsgerichten" (dat Woort alleen maakt Angst, nich?) mitmaal nich mehr tostännig sünd. Johrn lang hett de EU de Türkei drängt, düsse verropen Gerichtsbarkeit to besnieden; nu hebbt se de Justizreform maakt, de Gerichten sünd nich mehr tostännig — un alle sünd bedripst, ok de biedere EU, denn mitmaal lett dat, wi kunnen düsse Gerichten bruken! Nu de Terrorismus da is, is mitmaal "Kommando torüch". De Rechtsreformen, de Rechtsstaat sülven villicht (?) is gor nich mehr aktuell. Beten Zack-zack-Justiz weer nu ganz willkamen. — Sünd wi mall? Schafft wi af, wat wi verdeffenderen wüllt? Ik meen, wi schullen in'n Ümgang mit de "niege Bedrohung" Terrorismus nipp oppassen, wa wi uns Gelassenheit un uns Entslatenheit verdeelt. Wi schullen dorbi de Knööv vun'n Rechtsstaat an sik nich to ring veranslaan. De Rechtsstaat is nich de dumme August vun de Islamisten; dat mutt he ok nich anduern dör Muskelspelen bewiesen. Laat wi us nich in Panik bringen, bleevt wi besonnen. Niege Gesetten gegen Hasspredigers? Wokeen is en Hassprediger? De to'n "Hillgen Krieg" oproopt? Wiss. De Lü also, de seggt, wi sünd de Goden, laat us de Ass vun't Böse tweislaan? Mi dücht, Amerika warrt vun en Hassprediger regeert...? Liekers kümmt de Roop na so en Gesetz jüst ut düsse politische Eck. Dat schall ja man bloots för de annern gellen. — Is Justitia denn noch blind? Is dat nich politische Justiz? Keen Missverstahn: Ik finn Islamisten to'n Kotzen. Veel mehr, as ik Bush to'n Kotzen finn. Man laat us gelassen blieven. Wi bruukt keen politische Justiz, keen "Staatssekerheitsgerichten" (brr! schüddel!). Wi bruukt ok keen Guantánamo un keen Abu Ghraib. Nich gegen de een un nich gegen de annern. Wi bruukt den Rechtsstaat, den wi verdeffendeern wüllt; wi verdeffendeert em ja, wieldat wi em bruukt. |
|
30.5.04 .Frakschoonsdwang — Arnie! Hach, Football, Football! Ik frei mi ja so op de EM! (Egaal, wa de düütsche Mannschap afsnied.) Un nu sehg ik opletzt wedder in't Kiekschapp den Bundsdag — de ööde griese Masse. Woso hebbt de in'n Bundsdag eentlich jümmers alle datsülvige Tüüch an? Ok vun ünnerscheedlich Frakschoonen? Woso gifft dat keen Mannschaps- nee: Frakschoons-Dress?? Schöön Rood, Gröön, Blaag-Geel, glänzen Pickswatt... Ehr Menen hebbt se doch all lang opdeelt un ünner Frakschoonsdwang stellt, denn köönt se dat ok na buten wiesen! Un woso warrt Redners vun de een Frakschoon nich mal vun de anner Frakschoon mit Bananen un Füertüüch besmeten? (Orr mit Akten — Foul! Foul!) Woso warrt nich de egen Redners vun de Frakschoons mit LaOla un Slachtengesang begrööt? Politik wöör so veel beter "vermittelbar"! De Partein weern so ok beter ut'neen to hollen — Parteiprogramme leest ja sowiso nüms mehr. Dat weer bürgernah! Denn warrt en Metalltuun üm dat Rednerpult trocken. De Bundestagspräsident kriggt natüürlich staats sin waschlappenhaftige Glock en Trillerpiep. Dat heet ja nich, dat he nich gnadenloos parteiliche Befehle gifft, Reedtieden kört usw. Villicht warrt he denn ok vun poor Afordnete gewaltsam angrepen. Gifft Rode Koorten — se mööt ut'n Saal rüümt warrn. Dat Publikum op de Ränge kloppt sik anduernd, un af un to fallt en Fan ut de Rieksdagskuppel in't Plenum. Bi den Sender Phoenix, de dat Ganze in't Kiekschapp överdragen dröff, explodeert de Inschaltquoten. Bundesdagsdebatten överflögelt de Formel 1. De Sender Phoenix verköfft Reklaamtied to horrende Priesen. — Bi de neegsten Wahlen warrt vun alle Partein mehrst KandidatInnen mit Nahkampfutbillung opstellt. Un so warrt ok bi us bald en Arnie Schwarzenegger Gouvernöör! |
|
23.5.04 .En Wunner steiht to Wahl Vundaag wählt de Bundsversammlung den Bundspräsidenten (orr -in), un Nazirichter Filbinger wählt mit; un wat da nu beter bi warrn schull, wenn dat Volk direkt wählen kunn, weet ik nich; denn dann wöör Filbinger ja ok mitwählen. Un noch veel mehr Schubberjacken! Man opneegst dröfft Filbinger, de annern Schubberjacken un Se un ik un alle en Wunner wählen. Wi dröfft dat EU-Parlament wählen. Ha! En Wunner? Is dat en Wunner, dat nu Genmais in Europa verköfft warrn dröff? De EU-Komissioon weer't, de't verlöövt hett. Mallbüdels! Schönes Wunner, sowat! Nee, würklich. Europa is'n Wunner. Seggt de Papst. Un he mutt dat ja weten. Dat is nämli so: Robert Schuman, Grünnervadder vun'e EU, schall selig spraken warrn. Partu. Man dorför is nödig, dat em en Wunner nawiest warrt. (Süh ok bi Maat Jan.) Un as nu bi Schuman wied un sied keen Wunner to sehn is, wüllt se de Grünnung vun'e Europääsche Gemeenschap as Wunner bruken. Jungedi, 'keen weet, wat in Tokumst noch allens as Wunner dörgeiht — villicht ok düsse Websiet? Op düsse Wies köönt wi alle nochmal selig spraken warrn (wenn wi kathoolsch sünd natüürlich bloots)! Is dat nich wunnerbaar? Un wat meent Se wohl, wat düsse Genmais-Verlööv würklich weer? En Reklaam weer dat, för de Europawahl. En Wink mit'n Tuunpahl is't, nu doch ja to de Wahl to gahn. Europa is nämli överhaupt nich "wiet weg"; dat wullen se bewiesen. Un de niege EU-Verfaten bruukt wi! De Genmais-Verlööv woor vun de EU-Kommischoon geven, dat Gremium, dat nich wählt, man vun de Regeerns beropen warrt. Dat schall weniger Knööv kriegen na de niege Verfaten; dat Parlament kriggt mehr. Is ok nödig. Dat wulln se us klaarmaken. Dorüm hebbt se dat maakt. Denn gaht wi opneegst mal hen un wählt en echtes Wunner, nich? Den Bundespräsidenten köönt se ahn us wählen; den hett noch keen Papst to'n Wunner beropen. Ok keen Bundespräsidentin. Eentlich is de Bundespräsident (orr -in) nämlich totaal överflödig. |
|
16.5.04 .Gliekes Unrecht för alle? Nu warrt't kurioos. Een vun de Suldaten, de wegen Folter anklaagt sünd, en Sgt. Javal S. Davis, hett dör sin Anwalt verkünnen laten, he weer bi de Vernehmung vunwegen sin Verfehlungen sülven misshannelt woorn: de US-Armee harr em 20 Stünnen lang ahn Ünnerbreken verhöört. Slaap-Enttoog! Süh. Avers dat geiht ja nu nich an, nich? Rumsfeld hett twoors annerletzt noch faststellt, Slaap- un Nohrns-Enttoog, Nakeltheit, Oogenverbinnen un dwungen Verharrn in pienvulle Stellung weern konform mit internaschonaales Recht. Stimmt sachs; dat is good noog för de povere Bagaasch, för de internaschonaales Recht gellt; avers för US-Suldaten gellt dat ja nich, un dorüm dröfft de nich so behannelt warrn! — Blangbi: Suldaten, ok wenn se wegen sowat anklaagt sünd, hebbt Anwälte; de annern, de mit dat internaschonaale Recht, hebbt keen. Rumsfeld, de för den ganzen Schiet de Verantwoordung hett (ja!), hett meddewiel verraden, wat he dorgegen deit: He leest keen Bläder mehr. Bush ja ok al lang nich mehr, nu Rummy ok nich. Se wüllt nix höörn. Ja woans schall denn dat Volk, de Öffentlichkeit, de Souverän mit düsse Politikers reden?! Welk Spraak höört se noch? Nich de vun schreven un spraken Wöör; se höört bloots de Spraak vun Gewalt, also vun Terror, un — vun Wahlzedels. |
|
'keen wunnert dat, wat nu passeert is — dat de islamistischen Geiselnehmers, na düsse Folterbiller, as "Rache" en Minschen den Kopp afslaan hebbt? Wunnern deit't nüms; man 'keen kann't uthollen? 'keen kann uthollen, wat wi nu op us tokamen seht? Is schier unerträglich. Denkt Se an de Mudders un Vadders vun de dree italieenschen Geiseln, de noch leevt — villicht. Wat föhlt de woll för de Suldaten op de Folterbiller? Wenn de Köpp vun ehr Kinner rullt? Woans schallt se düsse Nacht slapen? Un neegst Nacht? Man dat is ja nich allens. De ganzen "westlichen Werte" is de Kopp afslaan. Ok anstännige Lü köönt nich mehr eenfach vun "Demokratie" un "Minschenrechte" snacken, sünnerlich nich to Muslime — se staht dor as Hüüchlers un mööt sik schamen. (De unanstännigen, as Bush un Rumsfeld, döscht schaamlos wieder ehr lerrigen Phrasen.) Wokeen schall hengahn un de Terroristen befehlen, ehr italieenschen Geiseln minschlich to behanneln? In'n Naam vun welk Kultuur, welk Zivilisaschoon? Lögen un Folter — hier so as dor. De Welt is wied trüchsmeten — dör jüst düsse Fotos. Wokeen schall hengahn un annere Länner de westlichen Ordnungen, Werte un Struktuurn as Alternative to Gewalt un Rückstännigkeit anbeeden? — Frieheit? Heet dat nich: Willkür, keen Kuntrull? — Rechtsstaat? Ha! — Gliekberechtigung vun de Geslechter? Heet dat nich, dat de Fruuns denn Pyramiden ut nakelte Mannslüüd buut? Sünd westliche Werte nich eentlich Herrschsucht un Obszönität? Un: Harr bin Laden nich Recht — harr düsse vulgäre Bagaasch nich den 11.September 2001 verdeent? Wi begriept dat man langsaam; ik sülven versöök dat siet 10 Daag, man ik kann't nich. Den 11.September 2001 kunn ik foorts begriepen; dat Attentat, dat Enn vun de "Spaßgesellschap", schien mi gor nich unwohrschienlich. Man düt nu, dat harr ik nich för mööglich hollen. Ik harr doch jümmer noch an glöövt, dat dat en poor Saken geev, de bi us in'n Westen nich mööglich weern. Ik harr an sowat as en moral leadership glöövt, en moraalsches Vörangahn vör de Welt — nich kilometerwiet, man poor Zentimeter vöran. Dor is nu de Kopp vun afslaan. Wi mööt uns egen Kopp hoochheven un mehr bruken as je; denn, as dat op en Denkmaal steiht, "Nichts wird auf Dauer außer uns selbst gegen das Unrecht sich erheben." Dat gifft keen moral leadership. Nüms kann Demokratie un Minschenrechten exporteern. Elk Sellschap mutt dat ut sik sülven rut opbuun — un dat is villicht ok beter so. |
|
Wokeen harr dat dacht, dat de Krieg in'n Irak so gau un op düsse Wies verlaren geiht?! Un verlaren is he ja nu; de Krieg üm de "hearts and minds", de Köpp un Harten vun de Irakers, de se harrn winnen wullt, is perdü. Bloots noch de Besatzung is nableven; de Sieg is futsch. Man so — dat harr ik nich dacht. Nich dör Guerillakämpfe, nich dör de immensen Kosten, nich dör de Abwahl vun Bush — allens dat nich; "friendly fire" alleen hett de US-Armee afschaten. "Friendly fire", dat is dat Bescheten vun de egen Lü. Un dat is hier passeert; man nich ut Gewehre — nee, ut Fotokameras. De Krieg is verlaren — wegen düsse Fotos. Monsters maakt Krieg, un Krieg maakt Monsters. So is dat jümmers. Man Monsters warrt vundaag vun de Minschen nich mehr "akzeptiert" (wat dat ok jümmers heten mag); un dorüm versöökt alle düsse Monsters, sik as "de Goden" to verköpen. Ok de Amrikaaners hebbt ja dat Gode beswöört, man Bush hett sik mit de Maskerade nich so veel Möh geven; un nu is de Lack af. Monsters hebbt ok düssen Krieg maakt, un de Krieg hett sik revancheert un hett ut eenfache, beten dösige Suldaten echte Monsters maakt. Man wat mi ümdrievt, dat sünd de Fotos. Stellt Se sik mal vör, dat weern keen Fotos west, man bloots Beschrieven mit Wöör, bloots Tügenutsagen. Wokeen wöör dat denn intresseern? Dat sünd vundaag man bloots noch Biller, de wirken doot. — Stellt Se sik vör, wat bi en eenzigen Johrsbericht vun amnesty international för Biller achter steken doot! De seht wi alle nich, man se sünd alle wohr. Folter enerwegens; enerwegens Monsters. — Wi schullen ehr nich dorvunkamen laten, bloots wieldat nüms ehr ekelhaftig Doon fotografeert hett! |
|
6.5.04 .Öveldeders warrt hart bestraaft Nu weet een doch wenigstens, woso de USA partu nich dat Afkamen för den Internaschonalen Straafgerichtshoff ünnerschreven hebbt. Dor kunn ja süsswat passeern, wenn ehr Lü sik dor verantwoorden müßt! Nee, so wied dröff dat nich kamen. Se hebbt ja ok jümmers seggt: För us is en internaschonaaler Straafgerichtshoff gor nich nödig, denn wi bestraaft alle Öveldeders in uns Armee sülven — gau, konsequent un hart. Un dat is wohr, dat süht een ja nu. De Foltersuldaten hebbt en Rüge kregen, jungedi, ik segg di — de scharpste Rüge, de dat gifft in de Armee! Mit'n utreckten Wiesfinger en dreefach drauhen "Du, du, du!" Dorvun verhaalt se sik sachs nich so gau. De Irakers wullen ehr ja geern lynchen, avers dat is doch en unziviliseertes Land ahn funscheneern Justiz, ik bidd di! Blangen de Suldaten weern da ja avers ok noch poor annere bi dat Quälen togang, Lü, de vun düsse obsukren Privaatfirmen hüürt sünd. De hebbt ja nu wedder dat grote Los trocken, denn de kannst juristisch meist gornich bikamen. Se fallt nich ünner Militärrecht, se fallt nich ünner US-Recht, se fallt nich ünner iraaksches Recht (behaupt de US-Regeern). Keen Rüge, keen Gesetz för düsse Lü! — "Ungesetzliche Kämpfer" nöömt de US-Regeern ja de Lü, de in Afghanistan mit de Taliban togang weern. Alle, de se dor opgrepen hebbt, nöömt se eenfach so un behaupt, de Genfer Konvenschoon gell nich för jüm; Suldaten weern't nich, avers Zivillü, nee, dat weern's ok nich; Rechten harrn se gor keen, nich mal Minschenrechten, un af mit jüm na Guantánamo in'n Drahtkäfig. — Solk "ungesetzliche Kämpfer" sünd nu jüst ok de, de in'n Opdrag vun de USA för dick Geld in'n Irak oprüümt un rümmerfoltert. Kaamt de nu ok na Guantánamo? Na? Wat meent Se? Ik meen: Ja! De US-Regeern is gerecht, de Lü warrt foorts na Guantánamo versett. Bi vullen Gehalt. Dor bruukt se ja jümmers düchtige Verhöörspezialisten! Wenn de Kriegen in Tokumft mehr un mehr vun solk Privaatsöldners, solk unberekenbaarn Afschuum, privatiseert warrt — denn bruukt wi den internaschonaalen Straafgerichtshoff nödiger as je. Un he warrt veel to doon hebben. |
|
Wat is en Lieblingsfiend? Een, de sowat maakt as de USA för de Islamisten. Wat beters harr jüm doch gor nich passeern kunnt! Osama bin Laden harr all sin Geld dorför geven, dat poor US-Geheimpolizisten irakische Gefangene so misshannelt un dat ok noch fotografeert un ünner de Lü bringt — man se doot dat ganz ümsüss för em: Folter! Sexuelle Misshannlung an Muslime! Un so geiht dat sachs in Guantánamo Dag för Dag to! Vergewaltigung mit'n Bessensteel! Mehr Water op de islamistische Möhl harr nüms geten kunnt. De USA, de "grote Satan"! Verderbt, verlogen, verdammt. — Bin Laden brukt gor keen Geld mehr för Reklaam utgeven. Wa idiotisch mööt Lü ween, de em so en Trumpf in de Hand speelt? Sünd dat amenn islamistische Agenten west?! Ünner Saddam geev dat doch avers noch veel mehr Folter! — Ja, avers vun em weer sik't jeder verwachtens. Saddam kunn nich deper fallen; man de USA kunnen heel deep fallen. Se hebbt sik ja sülven so hooch opstellt: Dat Gode stried gegen dat Lege! — Hoge Podesten sünd jümmers wackelig, un de Fall is deep. Dat is liekso as bi de kathoolschen Preesters, vun de bekannt woor, dat se Kinner vergewaltigt hebbt. Dat Maat, mit dat du meten deist, dat warrt an di anleggt! Un mit düt Maat stimmt dat ja nu al lang nich mehr. Wat de USA vun de Genfer Konvenschoon un de Minschenrechten hollen doot, dat bewiest se jeden Dag in Guantánamo. Wat lehrt de Suldaten dorvun? Gefangene sünd rechtlos! Woso schull dat in'n Irak anners ween? Woso schulln sik de Suldaten an en Genfer Konvenschoon hollen, op de de Regeern sülven spiet?! Avers dat sünd ja doch bloots wenige west, de dat maakt hebbt, militäärsche Geheimpolizei, sowat kümmt in jede Armee vör, de sünd doch nich repräsentativ! Nee, sünd se ok nich. Anstännige Suldaten hebbt dat ja opdeckt. Man ok se sünd nu mit in Verropenheit bröcht. Ok de, de doodbleven sünd. Un de noch doodblieven warrt — in en Krieg, de nu ok dör düsse Biller jümmer leger warrn warrt... |
|
Maifierdag — Arbeiterdemonstraschoon, Kundgeven, rode Transparente. Allens bloots Nostalgie? Na, düssen 1.Mai stunnen de Gewerkschapskundgeven orrig in'n Schadden vun de EU-Erweiterung, avers ok süss is mit de Gewerkschapen ja nich mehr veel los. De Globaliseern hett ehr bannig tosett. De Globaliseern? Weer da nich mal so'n Oproop "Proletariers ut alle Länner, kaamt tohoop!"? Anschienen hett dat bi de Proletariers nich recht klappt; de tohoopkamen sünd, dat sünd annere west. Dat Kapitaal weer't; se hebbt weltwiet fusioneert. De Idee weer also good; bloots de Proletariers hebbt dat nich rechttiedig klook kregen. Nu warrt se gegenanner utspeelt: "In Tschechien / Russland / Thailand kriggt wi de Arbeit avers billiger!" Nich de Gewerkschapen, nich de Minschenrechte, nich de Soschaal- un Ümweltstandards hebbt wi globaliseert kregen; bloots dat Kapitaal. Marx wöör in sin Graff roteern. (Villicht kann een dat to Stroomgewinnung bruken?) Wi mööt dat avers doon, jüst dat: de Arbeiterrechte, de Minschenrechte, de Soschaal- un Ümweltstandards globaal güllig maken. Anners geiht dat in de Büx mit uns Sellschapsordnung — hier tohuus jüst so as in de Welt. Wi mööt dor bi; nich bloots an'n 1. Mai. Bloots an'n 1.Mai gifft dat avers en anner globaales Ereignis: In de Nacht ried de Wickerschen ut alle Länner to'n Danzen op'n Brocken. Nee, nich mehr op ooldmoodsche Bessen! Wi nehmt vundaag moderne Stoffsuger. De langen Kabels suust so schöön achterran, dat hest bi'n Bessen nich. Un uns Keerls passt ok mit rop. Se kaamt mit — se sünd ja emanzipeert! |
|
De niege Bundesbankpräsident, de Nafolger vun Welteke, is ja nu funnen un heet Weber. Den Mann kannst graleern. So'n Job as hoge politische Beamte is je woll dat grote Los. Egaal, wat du deist, kriggst levenslang 15000 Euro per Maand! Bi de ARD-Fernsehlotterie gifft dat man 3000 Euro per Maand to winnen, dat is doch nix! Keen Wunner, dat de Kandidaten al schöön jibbert hebbt. Bloots een warrt winnen! Un Weber is't worrn. Glückwunsch, Herr W.! Wat, dat weer gor keen Lotterie?! Na, denn fraagt wi us natüürlich, woso kriggt de hogen politischen Beamten un de Politikers denn so veel Geld? Un dor heff ik vun en kloken Mann opletzt in't Radio en gelehrte Anter höört. He bewies heel klaar, de hogen Entscheidungsdregers mööt so hooch betahlt warrn, dat se immun sünd gegen Bestechlichkeit. — Ik bidd Se, laat Se sik dat doch mal op de Tung tergahn! — Immun gegen Bestechlichkeit — dör veeeeel Geld.... Kannst ok Aids mit HIV-Viren kureern? Orr Lungenkreevt mit Tabaksqualm? Woans kannst denn Bestechlichkeit mit Geld kureern? Midücht, een, bi den du mit Unsummen gegen de Bestechlichkeit vörbeugen muttst, is sowiso nich de rechte Mann. He warrt denn je woll swack warrn, sodraad een kümmt, de em noch mehr anbeed. He is vun sin Wesen her korrupt. So bekeken is allens, wat he kriggt, Bestechungsgeld, ok sin Gehalt: dat Gehalt is dat Bestechungsgeld vun't Volk, dat wi em ut uns Stüern geevt, dat he in sin Amt uns Intressen vertreden deit. Kümmt avers en anner un beed em mehr, löppt de korrupte Minsch foorts över un vertreed den annern sin Intressen. He is eenfach "meistbietend zu versteigern"! Un mit de Banken un de Grootindustrie, dor köönt wi Börgers je woll nich mithollen... En anstännige Minsch wöör solk Gehalt also gor nich annehmen. As Beleidigung wöör he't trüchwiesen! Avers wenn wi us de Politik un Weerschap ankiekt, denn hebbt wi apensichtlich överall solk korrupte Typen, de wi mit hoge Gehälter besteken mööt. Gifft dat denn keen anstännigen Minschen mehr so as Robespierre, den se dunntomalen in Frankriek "de Unbestechliche" nömen dään, de heel eenfach leven dä, liekers he alle Macht harr?! — Naja, bi Robespierre rullen de Köpp man in eensento vun de Guillotine. Weer ok nich schöön. Avers sünd denn alle Unbestechlichen Massenmörders?!? Na, op jeden Fall is Welteke sin Job je nu los, dormit ok sin Macht; nu gifft dat keen Gefahr mehr, dat he jichenswelk Intressen vertreden kann, also kann he nich mehr bestochen warrn, also höört dat mit dat hoge Gehalt nu op. — Wat?!? Welteke kriggt sin Gehalt wieder?! 15000 Euro elk Maand? Un dorna liekso een Pensioon? ——— Kinners, dat is keen Amt, dat is doch en Lotteriespeel — mit dat gaaanz grote Los! Glückwunsch, Herr W... |
| Öllere
Notizen: Hier klicken
|
