Öllere Daagbook-Notizen vun Marlou

3.11.04 ...Wüllt ji den totalen Bush?

Bush is dat also wedder woorn. Nich bloots na dat komische Mehrheitswahlrecht mit de Wahlmänner, nee, mit grote Mehrheit vun Stimmen. Un de Kongress ok — överall woorn Bush un sin "Politik" (Politik mit annere Middel even) bestätigt. De Amerikaaners hebbt dat also wüllt. Letzt Maal woorn se bedragen; dütmaal hebbt se em mit apen Oogen wählt — se wüllt dat. Dor hülpt nix. Se kriggt em nu; un de Rest vun de Welt kriggt em ok.

De velen Minschen, de em wählt hebbt, sünd us binnerlich fremder, as dat vun buten schient. Se seht in Bush christliche Werte repräsenteert, wieldess Europa ehrder dat Geföhl hett, dat he christliche Werte weltwied in Verroop bringt — mit Hinrichtungen, Gewalt un Geld. Wat sünd christliche Werte? Wi hebbt keen Monopol dorop. Den Islam passeert ja datsülvige: he warrt weltwied in Verroop bröcht, un liberale Moslems mööt tokieken. Osama un George grööt Hand in Hand (avers nich as schwules Ehpoor, oh nee! De köönt se ok beed nich af — een Hart un een Seel).

Bush weer ja överhaupt de Wunschkandidat vun'n weltwieden Terror. Nich he alleen hett wunnen; Osama ok. Dat de Welt nu Bush noch veer Johrn uthollen mutt, is en Schangs, wenn ok en bittere. En Schangs to lehren, dat de Methode "Oogen to un dörch" un "Begen orr Breken" versaagt. De Amerikaaners hebbt dat noch nich kloorkregen; in de neegsten veer Johrn hebbt se nu Gelegenheit, dat to doon. Un dat se dat kloorkriggt, is wichtig. För de Welt. Schaad is bloots, dat se dat dör en reaales Scheitern rutfinnen wüllt. Eerst wenn Bush & Co. totaal scheitert sünd, denn is dat so wiet. Dat is Lehren dör Dressur: Dressur deit weh. — Kannst dat nich anners lehren? Dör Insicht? Insicht is Lehren, ahn dat dat wehdoon mutt. Avers ik glööv, dorto is de Minsch nich verstännig noog. Dat seht wi ja överall. Ok in uns Benehmen to Natuur un Ümwelt hebbt wi alle Mööglichkeiten to Insicht, avers nix ännert sik, bet dat dat wehdeit. Man denn ännert sik wat! Un dor höp ik op. Lang duert dat nich mehr! Un dorüm: Four more years! Congratulations, Mr.Bush! Oogen op un dörch!

Bi de Islamisten warrt dat sachs noch länger duern, bet se to Verstand kaamt. Man de Vernunft warrt winnen. Jichenswenn. Ok wenn dat denn to laat is.

17.10.04 ...ad absurdum — aver gau!

Hüüt smitt Opel sin Konsumenten rut in de Arbeitslosigkeit, un morgen buut se keen Autos mehr. Richtig so! Smiet gau noch mehr rut! Wokeen nich in de Tokumst denken kann, de mutt dat even beleven. Se mööt dat beleven, dat se de Globaliseern ad absurdum föhrt; denken köönt se't ja nich. Se mööt ganz scheitern; ehrder geevt se keen Roh. Je gauer se dat maakt, je beter is dat. Se staht ja alle op't Gaspedal un raast op'n Affgrund to; se warrt dat nich glöven, bet dat se rünnerfallt. Je ehrder je beter. — Dorüm bün ik ok för Bush. He mutt de Wahl winnen. He mutt sin Land ganz an'n Borrn bringen, ehrder kapeert dat nüms. "Four more years!" Glöövt mi dat, leven Lü: In veer Johr sünd wi mit de Saak dörch! Denn sünd ok de Dummen kureert. Ok vun de Globaliseern. In veer Johr is dat togrunn richt, un wi köönt nieg anfangen. Nieg anfangen! Vernünftig anfangen! Minschlich anfangen! Is dat nix? Hollt dör, leven Lü, dat lohnt sik!

13.10.04 ...Hüchelee-Olympiade

Olympia geiht wieder, dütmaal in de Hüchel-Disziplin. To'n US-Wahlkampf segg ik gor nix. Nee, nu in Israel: En Grenzer hett en ganzes MG-Magazin op en 11 Johr ole Schooldeern affüert. Deern dood, Grenzer schall nu vör'n Kadi. He schull ja de Palästineeschen in Schach hollen, avers doch nich so. Woso??? De Grenzer weer op gresige Wies ehrlich. Dat is jüst dat Gesicht vun'e Besatzung: Kinner warrt vun MGs tersiebt. Humane Besatzung? Humane Gewalt? Gifft dat nich!!! Bronzemedaille in Hüchelee.

Un denn de EU un de Türken. Wat weer woll in de EU los, wenn mit de Türkei en niege, reesenhaftige Nettozahler an de Döör kloppen dä — en Nettozahler vun't Formaat vun Düütschland? Oha, de Döör wöör avers gau opgahn! Dor kunnen se Muslime ween, dor kunnen se ok beten foltern un af un to Kurden slachten, dat wöör gor nix maken. Un annersrümmer? Seggt Se mal de Türken: "Geld gifft dat hier nich to halen, avers ji köönt ut reine Leev to de europääschen Werte, to Minschenrechte, apene Sellschap un den europääschen Geist bitreden." Upps, weg weern se! De europääsche Geist heet schients Mammon — op beed Sieden. Sülvermedaille!

Un Guld? Na höört Se mal! Wokeen kann schon mit'n US-Wahlkampf mithollen? Guld geiht wedder in de USA, un wi seht de Fahn opstiegen un summt de Hymne mit as dunntomalen in Athen.

28.9.04 ...Swacke sünd stark

Schaad, dat nu de Paralympics vunwegen den slimmen Busunfall keen richtige Afslussfier kriegen schallt. Ik harr ehr dat günnt. In't Kiekschapp sünd de Paralympics ja leider jümmers noch "Krüppelturnen": Interviews, de "minschliche Siet", Hinnergrunnberichten, Mitleid, Loff, avers nicht Sport! Dat nervt. Ik will de Wettkämpfe sehn, live! Dor kannst nämli Leistungssport sehn, de nich unminschlich is. Bi dat Standard-Olympia is jung, stark, sund, schier un Siegertyp fraagt. Starke sünd stark, heet de Bottschap. Bald sünd se alle Maschiens dör Gen-Doping. — Bi de Paralympics heet de Bottschap: Swacke sünd stark. Un dat sünd se ok! Dat gellt jichenswie för uns alle, nich?

25.9.04 ...Politische Marktweerschap?

De Nafraag na en annere Politik is reesenhaftig groot. In en funscheneern Marktweerschap wöör denn dat Angebott nich lang op sik töven laten, nich? Un woso kümmt dat nich? De Marktweerschap funscheneert even nich. Dorbi predigt doch meddewiel dat ganze politische Spektrum vun links bet rechts nix anners as de Marktweerschap. "De Markt warrt dat richten!" Glöövt heff ik dat ja nienich, avers se sülven bewiest nu dat Gegendeel, indem dat se ehr Politik an de Nafraag vörbi maakt. Wenn dat ehr Övertügen is, schallt se dat. De Markt — de Wählerschap — warrt avers reageern. De politische Variante vun de Marktweerschap nöömt een blangbi Demokratie.

Nich allens, wat de Demokratie na baven bringt, is good; friege Wahlen rechtfardigt nich allens, wat dor wählt warrt. Süh de Nazis in Sassen un Brandenborg. Dorbi köönt sik de Partein, de sik alltohoop üm de "Midd" kloppt, noch freun, dat de Nazis so dösig sünd as dat Achterveerdel vun'e Koh. Weer dor een bi, de wat anners as bloots grunzen kunn, en echte begabte Demagoog, denn harrn se op'n Stutz 30% vun de Wählers. Kiek een sik doch mal dat Potenschaal an! De ganzen Nich-Wählers, de ganzen Frustreerten un Verunsekerten! In Holland harrn se annerletzt den Pim Fortuyn, de weer twoors keen Nazi, avers en begabte Populist — un güng los as'ne Rakete.

Dat kann jeden Dag wedder passeern. "Die Menschen leben nicht für die Theorien, sondern die Theorien sind für die Menschen da. Und wenn eine Theorie noch so wundervoll klingt und in ihrem Gefolge 7 Millionen Erwerbslose hat, dann taugt sie nichts." Stimmt doch, nich? Un wokeen hett't seggt? Naaa? Hitler hett't seggt, an'n 17.8.1934 vör de Beleegschap vun Blohm & Voss in Hamborg. Markst Müüs? Opwaken, ji Marktweerschaplers, ji Demokraten! Kiekt op den Wähler-Markt! Maakt wat nich bloots för de Weerschap, man för de Minschen, bi us un in alle Welt, süss maakt dat jichenswenn — wen anners. Un wat de denn maakt, dor wüllt wi lever nich an denken.

18.9.04 ...Eenfach mal probeern

Nu seggt de Kanzler mal de Wohrheit, un alle hackt op em rüm. He hett seggt: "In Deutschland gibt es eine Mentalität bis weit in die Mittelschicht hinein, dass man staatliche Leistungen mitnimmt, wo man sie kriegen kann, auch wenn es eigentlich ein ausreichendes Arbeitseinkommen gibt." Un dat is doch wohr, nich? He meent natüürlich de, de good bi Kass sünd, man seggt "Ik probeer mal, wat ik afkaken kann": de hogen politischen Beamten, de bi Gehälter vun 8000 € noch Övergangsgeller kasseert; Vodafone, de sik bi gode Gewinne ehr Milliarden Spekulaschoonsverluste vun de Stüerkass wedderhaalt; Millionäre, de vör de Stüer driest op pover maakt. Dat meent he doch. Mit "bis in die Mittelschicht" meent he nämli "vun baven bet in de Middelschicht", nich vun nerrn. Woso denn vun nerrn?! Wokeen denkt dat?

Will de Kanzler nu, dat ehrliche Lü Soschaalleistungen, de ehr vun Rechts wegen tostaht, links liggen laten schallt, bloots wieldat se noch nich verhungert? He seggt sik, ik probeer dat mal. Villicht gifft't ja'n poor Dösköpp. Geld is Geld. — Schallt wi nu to'n Staat generös ween? Nee! Harr ik dat Recht t.B. op Kinnergeld orr Arbeitslosengeld un harr anners noog Geld, na, ik wöör dat Geld kasseern, is doch klaar — un denn spenden för'n goden Zweck. Man doch nich an'n Staat! Is de Staat al Wohltätigkeitsempfänger? Geiht he mit de Sammelbüss? Wokeen dor wat rinsmitt, is villicht ehrlich, avers ok dumm! Vun de wat to kasseern, wieldess Welteke & Co. mit ehr 15000-€-Pensionen rümloopt, dat is binah Roof. Ehrlich wüllt wi ween to'n Staat, avers nich tutig. De Masche verfangt bi us nich.

En Paradebispill vun de Mitnehmer-Mentalität hett opletzt ja Industriepräsident Rogowski levert. He sä, de Ünnernehmers schullen ut de Soschaalsysteme ganz rutlaten warrn; dat schullen allens de Beschäftigten betahlen. "Ünnernehmers schafft Arbeit, dat is weertvull noog, denn köönt de Beschäftigten för ehr Rente un Sundheit alleen opkamen", sä he. Basig, nich? Probeern kann een dat ja mal in düsse Tieden, wat jichenseen Döskopp op'n Liem krüppt, hett he sachs dacht. — Ik probeer dat ok mal: Arbeitnehmers konsumeert Waren, dat is al weertvull noog, dorüm schullen de Ünnernehmers alleen för opkamen, dat ehr Konsumenten soschaal versorgt sünd. — Hm. Keen Reakschoon? Na, probeern kunn een dat ja mal.

Düt ganze Probeern vun Bedregeree is jichenswie en Beleidigung, nich?

11.9.04 ...Leve Neonazis!

Nee ok! Nu hebbt wi juuch de ganze Tied bitter Unrecht daan! Jümmers hebbt wi dacht, ji sünd minschenverachten, borniert un skrupellos. Wi hebbt dacht, dat geev moraalsche Grünnen, juuch nich to wählen. Dorbi gifft dat doch in Wohrheit nix, wat een juuch vörhollen kann — man bloots dat een: Ji schaadt de Weerschap. Leider!! Nu, vör de Wahlen in Sachsen un Brandenborg, kümmt dat rut. So leest wi in de Leipziger Volkszeitung: Sachsens Weerschapsminister Martin Gillo (CDU) wohrschuut: "Wenn rechtsradikale Kräfte den Sprung ins Parlament schaffen, senden wir die falschen Signale an internationale Investoren." Ok en Minsch vun de Chip-Maker-Fabrik AMD seggt: "AMD ist darauf angewiesen, weltweit die besten Mitarbeiter nach Dresden zu holen. Die müssen sich wohl fühlen und hier gerne leben." — O leve Nazis, dat deit us so leed, wi wöörn juuch geern wählen, man bloots, wi köönt nich vunwegen de Weerschap! Anners harrn wi keen Problemen mit juuch.

Op de anner Siet: De Weerschap schaden, dat is eentlich dat eenzige würkliche Verbreken, dat wi vundaag noch kennt, nich? De Weerschap is uns eenzige Moraal; ehr schaden is deep verwerflich. Denn sünd ji ja doch richtige Verbrekers, leve Nazis. Un dorüm warrt wi juuch ok nich wählen. Bloots dorüm!

8.9.04 ...Saken, de in Rook opgaht

Alle Kulturmagazine sünd opstunns vull vun verkohlte Böker. Dat kümmt vun dat Füer in de Anna-Amalia-Bibliothek in Weimar. Nu mööt de Böker redd warrn, konserveert, gefriergetrocknet, mit modernste Technik wedderherstellt...! — Welk Böker denn? Na, even de, de ankokelt un vun Löschwater nattmaakt woorn. — Ja, avers welk Böker sünd dat? Nöömt Se mi een Titel! Wat steiht dor binn? — Hm. — Dat lett, as lees nüms mehr düsse Böker, üm de se so'n Opstand maakt. Kann't wohr ween? Redd wi ehr bloots för't Regaal? De Klassikers sünd överall billig to kriegen; schulln wi ehr nich beter kennenlehrn, wenn wi ehr so düer redden wullt? "Wer wird nicht einen Klopstock loben? Doch wird ihn jeder lesen? Nein. Wir wollen weniger erhoben und fleißiger gelesen sein!" Dat sä de ole Lessing (nee, nich ik, de annere) vör al neegto 250 Johr. Hett sik sachs nix ännert.

Nix ännern warrt sik ok an de Tabakstüer. Düt Johr woor se al orrig höger maakt, man de Erhöhung, de för neegst Johr plaant weer, schall nu nich kamen, denn — de Lü smöökt weniger! Ja un? Dat harrn se doch wullt? Dor harr doch de Sundheitsministersch (de mit den fastwussen Grientje) jümmers vun snackt? Hm, ja, äh... avers den Finanzminister sin Kass hett dor nix vun. Dorför weer de Tabakstüererhöhung nämlich würklich dor. Nich för de Sundheit. Se harrn dacht, de dösigen süchtigen Rokers, de smöökt ja sowiso, ok wenn't en Vermögen kost. Avers nee! Nu mutt Geld her. De Lü mööt smöken! Opneegst warrt op de Packungen nich mehr stahn "Rauchen tötet!" un so, man "Rauchen ist lecker!" un "Raucher haben mehr vom Leben!" un "Nichtrauchen schadet Ihrem Finanzminister!"

De Sundheitsministersch warrt us ok denn wedder verklaarn, woso dat good is. Un se warrt dorbi grienen, as se dat jümmers deit.

5.9.04 ...Sünd Se en Minsch?

Wahnt Se op't Land? Sünd Se en beten bangbüxig un op jeden Fall totaal verbiestert? Denn staht de Schangsen good, dat Se en Minsch sünd. Se weet ja woll, so en Kreatuur, vun de uns Grootkoppten jümmers seggt: "Man muss die Sorgen und Ängste der Menschen ernst nehmen" un "Die Menschen draußen im Lande haben die Reformen nicht verstanden." Düsse Deerten, de Minschen, wahnt also buten op't Land (also nich in Berlin), hebbt bannig Angst un verstaht rein nix. Se arm Deert, Se! Dor staht Se nu, bevern un verbaast, un truut sik nich to rögen. "Wir müssen die Menschen in ihren Lebenszusammenhängen abholen!" seggt denn de Grootsnacker. Oha, de kennt sik ut. Se hebbt also Lebenszusammenhänge, Se Minschendeert? Nu warrt Se afhaalt. En Nich-Minsch (Un-Minsch wüllt wi ja nich seggen, nich?), t.B. Weerschapsminister Clement, warrt bi se ankamen un as'n Dokter in'n Arztromaan op Se insnacken: "Wie geht's uns denn, nun haben Sie man keine Angst, kommen Sie ganz einfach mit, ja nu kommen Sie schon..." He warrt sik bi Se ümkieken, in SeEhr Leven, in SeEhr povere Verhältnisse; he warrt Ehr lütte Nootbehelp un Ehr grote Verlegenheiten sehn, wenn dat Geld wedder nich langt un wenn een den annern helpen mutt; de lütte Noot un de lütte Freid vun'n Alldag. He warrt dat frömd ankieken, as müss he sik achterna glieks de Hänn waschen. "Das sind also Lebenszusammenhänge!" warrt he sik seggen (solk Nich-Minschen denkt Hoochdüütsch). Man villicht sünd dat ja al de Sorgen un Ängste? So recht kann he sik nix ünner vörstelln. He föhlt sik frömd un is froh, wenn he wedder rut is, hild un mit Se ünnern Arm klemmt. — Waneemhen he Se afhaalt un wat mit Se passeert, dat weet ik ok nich. Villicht will he Se vun'n Minschen to en Wähler maken. (Hebbt Minschen eentlich Wahlrecht?) Wählers warrt ok nich so dull respekteert, avers se wahnt in Städer un kapeert af un to mal wat. Döögt Minschen överhaupt to Wählers? Na, man bloots tweetklassig, meen ik.

Op jeden Fall sünd se bannig lästig, düsse Minschen buten in uns Land.

2.9.04 ...Begen orr breken?

Dor dach een doch, Olympia weer nu vörbi — Olympia mit sin Pathos, sin Hymnen, sin "Emoschoonen pur!!" — Man nix da, Olympia geiht wieder, un twoors in New York, bi'n Republikaner-Parteidag. Pathos, Hymnen, Emoschoonen pur! Nix warrt diskereert, nüms stellt en Fraag, de nich rhetorisch weer. Allens is en eenzig grotes "Jaaa!" deep ut'n Buuk. Intellektualität is anschienend för düsse Lü keen Weert, nix Godes; se hebbt in't Gegendeel en depes Misstruun dorgegen. Dat Geföhl is dat, wat se truut. Denken is suspekt; Nich-Denken is en Tugend! Se wüllt sik nich övertügen, se wüllt glöven. "Wi sünd stark, wi warrt winnen!" Olympia. "Op Begen orr Breken!" Op Begen orr Breken?

Mit "Begen orr Breken" is dat so en Saak — överall kannst opstunns sehn, wa dat versaagt. Putin hett in Tschetschenien op datsülvige Rezept sett — he is grandios op de Nees fulln. De USA köönt in'n Irak wieswarrn, wa wiet in de Sackgass se "Begen orr Breken" bröcht hett. Man ok de jeweils anner Siet hett sik, na düsse groten Vörbiller, dat "Begen orr Breken"-Rezept to egen maakt — un scheitert dormit. De Tschetschenen köönt ehr Gefangene nich friepressen — nich mit Kinnerbloot! De iraakschen Geiselnehmers, de Frankriek erpressen wullt, scheitert mitmaal an den Tosamenhalt vun de mosleemschen un de christlichen Franzosen. Israel un Palästina versöökt dat siet Johrn op Begen orr Breken — wenn sik nich beed böögt, warrt beed breken.

Liekers, ik kann ehr verstahn — de Republikaners. Rein ut'n Buuk kann ik ehr verstahn. Dat sitt in uns Minschen binn, dat wi in Krisentieden entslatene Anföhrers wüllt — den "starken Mann". Den, de nich twievelt, den, de dat op Begen orr Breken dörsett. Dat mutt noch ut de Steentied kamen! Man klook is dat nich. Mit "Begen orr Breken" kannst nix dörsetten. Wi mööt insehn, dat Fragen, Denken, Twieveln, Ünnersöken un amenn Övertügen beter is as Glöven. Man nee — en Denker, en Twievler kriggt nienich de Massen achter sik. De Massen wüllt "Jaaa!" schriegn. Deep ut'n Buuk. Dat is in uns Minschen so binn. Ut de Steentied.

22.8.04 ...Olympische Disziplin

Olympia enerwegens, Olympia vun fröh bet nachtens! Un wenn Du morgens wedder opsteihst, kriggst batz! dat Niegste ut Olympia (also ut Athen) — natüürlich ut de naschonaale Buuknavel-Perspektive! — "Gestern war wieder ein guter Tag für die Deutschen in Olympia" — "Aus deutscher Sicht ein hervorragender Tag" — "Olympia bisher sehr enttäuschend für Deutschland" — "Guten Tag meine Damen und Herren. Deutsche Sportler haben heute in Athen..." —— un denn warrt dor vun Sportaarten snackt, de de Dörsnittsdüütsche (¾ Footballfan, ¼ Formel 1) to anner Tieden nich mit'n Achtersten ankieken wöör! Avers wat Düütschland Guld bringt... Is Sport nich ok schöön, wenn "wi" nich de Gröttsten sünd?! — Achterna warrt de Exoten-Sportaarten natüürlich glieks wedder vergeten. Bi poor is dat ok good so.

Ok anner Naschoonen denkt leider so: Dat Guld mutt her, egaal woans! So is nu rutkamen, dat to de Veelsiedigkeitsriederie nich bloots Gelänn, Dressur un Jumpen, man ok de Paragraphenriederie tohöört. Un in de Paragraphenriederie weern de Franzosen dütmaal beter as de Düütschen — so hebbt se ehr dat Guld wedder afjaagt. Wenn se dormit glückli ween köönt, schallt se dat vun mi ut behollen.

Dat gifft nu hunnerte olympische "Disziplinen", un dat warrt elkmaal mehr. Neegst Maal is Olympia in Peking, 'neem dat Koppafslaan as Sport bekannt is. Dor warrt dat würklich mit "olympische Disziplin" togahn — zackzack un nich ut de Reeg danzen! Gerüchte seggt, dat in China ok Doping as egen olympische Sportart anerkennt warrn schall. Un ok de Sport, för den een Kondome bruken deit, warrt apensichtlich in't olympische Dörp ieverig öövt — Kondome sünd dor alltied nafraagt! — un kunn as olympische Disziplin gellen. Man ik heff en noch betern Vörslag:
Niege olympische Disziplin warrt dat Över-den-egen-Schadden-Jumpen!

16.8.04 ...Keen Schangs?

Wenn een so höört, wat vun dat Referendum in Venezuela dör de Narichten güng, denn kannst denken, de Regeern dor, dat is en Aart Terror-Regime, un de Präsident Hugo Chavez, na, dat mutt ja en lege Diktator ween... En brede Front ut Middelstand, Karken, Gewerkschapen, Ünnernehmers — alle wulln em loswarrn. Hett nich klappt! He is wedderwählt — vun "de Armen". Mit 58 %. Wa breed kann de Opposischoonsfront ween, wenn dat dor noch so veel Arme gifft? Un woso wüllt de alle den Chavez?

Wat Venezuela angeiht, kannst di op de "groten" Bläder un Narichten ja gor nich verlaten. Kriggst nix mit. Muttst op Websieden as t.B. www.venezuelanalysis.com nalesen. Na, wat nu de Chavez is, Fehlers hett he ja sachs veel, avers en Diktator is he (noch) nich; un de gröttste vun sin Fehlers is (för den Rest vun de Welt, sünnerlich de USA), dat he vun de neoliberale Weerschapspolitik nix hollen deit. He will de Öölindustrie nich privatiseern, he will en Landreform, he stekt Geld in Schoolbillung un Sundheitvörsorg för de Armen. En Populist! töönt dat ut den Medienwoold. Na und?! Bitte poor mehr vun solk Populisten! — Nee, dat is nich good för sin Land, heet dat denn; dat warrt scheepgahn. — Dat stimmt. Dat warrt scheepgahn, wieldat de ganze globaliseerte Weerschapswelt dorgegen is; wenn de USA al din Opposischoon finanzeert, hest keen Schangs. Man versagt hest denn noch lang nich. — De Globaliseern makt de Minschen in de drütte Welt meist överall poverer; Venezuela warrt pover blieven, so orr so; de povern Minschen wüllt denn tominnst ehrn egen Weg gahn. Un 'keen weet — villicht beschickt se ja noch wat?

De Opposischoon in Venezuela mutt sik fragen laten, woso se de Armen nich övertügen kunn; un woso se in de Johrn vör Chavez nix dorto doon hebbt, dat dat weniger Arme woorn. Weniger as 58 Perzent.