Adobe Reader installeern

Nu geiht dat los mit de automaatische Installaschoon. Toeerst ward de Datei utpackt. Dar stekt nämlich en ganzen Packen Datein in, de bi de Installaschoon an ünnerscheedlich Steden afsett warrn mööt. Dat geiht vun sülvst un is de egentliche Installaschoon.

Noch een Momang, denn is de Installaschoonsassistent startklaar.

Wat is denn en Assistent?

Dat heet, dat Se bi en Vörgang mit'n paar Dialoogfenster ünnerstütt warrn. Dar brukt Se nich veel nadenken, man bloots jümmers seggen, wat Se geern hebben wullt, un Weiter klicken.

In dat Fenster in de Midd begrööt Se de Installaschoonsassistent. In'n Titelbalken vun dat Fenster steiht "Setup" — un Setup bedüüd datsülvige as Installaschoon. Klickt Se Weiter.



De Assistent stellt sik vör. Klickt Se op Weiter.


Bi de Installaschoon mööt ok niege Ordner anleggt warrn. Dat maakt allens de Assistent. De Assistent much nu geern weten, wat he för dat Programm den Ordner anleggen dröff, den he al vörsleit, oder wat Se wat anners wüllt. Laat Se em man maken, klickt Se Weiter. (Wenn Se den Ordner, den de Assistent vörsleit, partu nich verknusen köönt, denn köönt Se mit den Knoop Zielordner ändern... en annern Ordner utsöken oder en niegen maken, ehrdat Se Weiter klickt.)

In't neegste Fenster klickt Se op Installieren.


Nu geiht dat automaatisch mit de Installaschoon. Dutzen vun Datein warrn all in de rechte Reeg op SeEhr Fastplatt afleggt. Wieldess wiest Se en Statusbalken, wa wiet de Saak al kamen is.

Trecht! Klickt Se op Fertigstellen.


Allens trecht un klaar! Nu will de Assistent den Computer nieg starten; dat ward faken daan bi Installaschoonen. — Wenn Se keen anner Programme mit wichtige Daten mehr apen hebbt, denn köönt Se glieks hier op Ja un Beenden klicken. Man wenn Se noch anner Saken in'e Maak hebbt, de noch nich afslaten oder sekert sünd, denn mööt Se de toeerst klaarmaken. Klickt Se hier toeerst mal Nein un denn Beenden, darna slaat Se sinnig all de annern Programmen, de Se noch apen harrn, un denn start Se SeEhrn Computer even sülven nieg.

Wenn de Computer nieg start is, köönt Se op SeEhrn Desktop en nieges Icon sehn.


Wenn Se dat duppelklickt, leggt de Adobe Reader los.

Bi'n eersten Start kriggt Se noch wat anners to sehn: den "Endbenutzer-Lizenzvertrag". Dat Programm is twoors gratis, man dat gifft natüürlich'n Uurheberrecht dorop. Se dröfft dat Programm nütten un kopeern un wiedergeven un allens, avers t.B. nich verköpen. Den Verdrag köönt Se Akzeptieren, de is OK. — Wenn Se dat Programm in Tokunft wedder startet, kriegt Se den Verdrag nich mehr to sehn. Eenmal akzepteern is 'noog.

So, nu is allens trecht. Nu seht Se dat lerrige Programmfenster vun'n Adobe Reader.

Hier geiht't wieder in'n Text!