"Dat Assisi-Beden...
... is mi een Höpen för uns unruhig Tiet. Dat dücht mi en direktere Utspraak as Dabru Emet."
Ditt schreev uns een Besöker vun de Siet "De Welt un Gott", nadem "Dabru Emet" op uns Siet "De Welt un Gott" to lesen weer. Wat sik ok uns annere Besöker sülvst ehr Gedanken maken köönt, hebbt wi opschreven, wat sik dor in Assisi in'n Januoor 2002 begeev:

Op Inladen vun Papst Johannes Paul II. hebbn in'n Januoor 2002 mihr as 200 bedüden Persönlichkeiten ut Karken un Religionen in Assisi an een Bedentosamenkumst för den Freden deilnahmen.

Gröten vun Papst Johannes Paul II. vör sien Afreis ut Assisi:
"Wedder eenmaal wöör Assisi een Steed, vun de nieges Höpen utgeiht. Wi dankt unsen Herrn,den göttlichen Buuherrn vun dat Fredens-Huus. Dank geiht an juch all, de ditt Begevnis levt hebbt in Tüügnis, in Beden un in gemeinsames Insetten bi'n Upbuu vun Freden. Dank an all de, de dat uns mööglich maakt hebbt. An alle Manns- un Fruunslüüd gooden Willens! Gott, Born vun alles Goode, geev de Oprichter vun Freden Segen un Freden! In sien Naam gahn wi vöran, weven mit den Goldfaden Gerechtigkeit, Frieheit un Vergeven."

To'n Afsluß vun de Bedentosamenkumst för den Freden in de Welt in Assisi geven de Vertreder vun de Weltreligionen nastahende "Gemeensame Utsagen" af:

Gemeensame Utsagen

Ökumeensche Patriarch Bartholomaios I.
Hier in Assisi tohoop kamen, hebbt wi miteenanner över den Freden nadacht, de een Geschenk vun Gott un gemeensames Good vun de heele Minschheit is. As ünnerscheedliche religöse Traditschoonen Tohörende stahn wi in dorför, dat dat för den Upbuu vun Freden nöödig is, den Neegsten to leven un de Güllne Regel intohollen: Do dienen Neegsten dat, wat Du willst, dat Di daan warrt.
In ditt Övertügen warrn wi nich mööd, op de groot Buusteed Freden to arbeiden. Un dorför leggen wi fast:

Rev. Dr. Konrad Kaiser
Ökümeensche Raat vun de Karken
1. Wi verplichten uns, vun uns fast Övertügen Künn to geven, dat Gewalt un Terrorismus den egenlichen Geist vun Religionen wederspreken. Wi verurdeilen dat Anwennen vun Gewalt. So verurdeilen wi Krieg in den Naam vun Gott orrer de Religion. So verplichten wi uns, allens Möögliche to doon, de Oorsaak vun Terrorismus ut de Welt to bringen.

Bhai Sahibji Mohinder Singh
(Sikhismus)
2. Wi verplichten uns, de Minschen to gegensiedigen Respekt un gegensiediges Hoochachten to ertrecken, dorüm dat sik een fredliches un solidaarsches Tosamenleven twüschen de verscheden "ethnischen" Gruppen, Kultuurn un Religionen Tohörenden wohrhaftig maken lött.

Metropolit Pitrim
(Orthodoxes Patriachat vun Moskau)
3. Wi verplichten uns, Oort un Wies vun Miteenanner-Snacken op de Been to helpen, dat dat Verstahn un Vertruun twüschen de enkelten Völker wassen kann, wat een Vörrutsetten vun wohren Freden is.

Metropolit Jovan
(Orthodoxes Patriarchat von Serbien)
4. Wi verplichten uns, dat Recht vun elkeen minschliche Person op een würdvulles Leven na sien Identität un dat Recht, frie een egen Familie to grünnen, to verdeffendeern.

Scheich Abdel Salam Abushuk

Bild: Maja Dumat / Pixelio

(Islam)
5. Wi verplichten uns to oprichtig un gedülliges Tosamenreden, wo wi nicht dorop op de Wacht sünd, wat uns as een unöverwindbore Muur uteenannerkriggt, sünnern in't Gegendeil wies warrn, dat Begegen mit dat, wat uns vun anner Minschen ünnerscheidt, to bederes gegensiediges Verstahn bidregen kann.

Bischof Vasilios
(Orthodoxe Kark vun Zypern)
6. Wi verplichten uns, eenanner de Irrdöömer un Vörurdeile ut vergahne Tiet un hüüt to vergeven un uns in dat gemeensame Möhen to stütten, Egoismus un wat dor leger mööglich is, Hatt, Gewalt daaltodwingen un ut vergahne Tieden to liernen, dat Freden ahn Gerechtigkeit keen wohre Freden is.

Chang-Gyou Choi
(Konfuzianismus)
7. Wi verplichten uns, an de Siet vun de to stahn, de ünner Noot un Alleenlaten lieden, un uns to de Stimm vun de to maken, de sülven keen Stimm hebbt. Wi mütt in een Wies, de Hannen un Fööt hett, an dat Överwinnen vun so'ne Situationen mitdoon, dragen vun dat Övertügen, dat nüms alleen glücklich sien kann.

Hojjatoleslam Ghomi
(Islam)
8. Wi verplichten uns, uns den Roop vun de Lüüd to eigen to maken, de nich vör Gewalt un Böses glieks de Flint in't Koorn smieten. Wi willn mit uns Kräfften dorto bidregen, de Minschheit in uns Tieden wohrhaftig Höpen op Gerechtigkeit un Freden to geven.

Rev. Nichiko Niwano
(Buddhismus)
9. Wi verplichten uns, elkeen Beginnen Moot to maken, de de Fründschop twüschen Völker vöranbringt. Dorbi sünd wi övertüügt, dat dat technoloogsch Niemoodsch een anwassen Gefohr vun Tonichtmaken un Doot för de Welt mit sik bringt, wenn solidaarsches Tosamenstahn twüschen de Völker fehlt.

Rabbiner Samuel-Renè Sirat
(Judendoom)
10. Wi verplichten uns, de Minschen, de in de Natschioonen dat Verandworden hebbn, optoföddern, op nationales un internationales Flach kurascheert to Wark to gahn, dorför dat de Grundlaag för Gerechtigkeit in een Welt vun Solidarität un Freden upbuut un fastzurrt warrt.

Dr.Mesach Krisetya
(Mennonitsch Weltkonferenz)

Wi, de wi ünnerscheedliche religöse Traditschoonen tohöörn, wi warrn nich mööd to künnen, dat Freden un Gerechtigkeit nich vuneenanner to trennen sünd un dat Freden in Gerechtigkeit de eenzige Weeg is, op den de Minschheit in Tokunft vull Höpen gahn kann. Wi sünd övertüügt, dat in een Welt mit jümmer apenere Lännerscheiden un jümmer körtere Weeg dat Tosamenkamen dörch een dichtes Kommunikatschoons-Nett jümmer lichter warrt, Sekerheit, Frieheit un Freden nich dörch Gewalt, sünnern bloots dörch gegensiedig Vertruun seker warrn köönt. Wi beden dorför, dat Gott uns Vörhebben segent un de Welt Gerechtigkeit un Freden schenkt.

Papst Johannes Paul II.

Nie wedder Gewalt!
Nie wedder Krieg!
Nie wedder Terrorismus!
In Gott sien Naam, mucht elkeen Religion Gerechtigkeit un Freden bringen, Vergeven un Leven, un Leev!