Honnig helpt — aver nich gegen Immensteek

vun Rudi Witzke



Bild: ML

Honnig helpt bi männicheen Wunn. Afstorven Geweev ward schneller afstött. De Wunn schlütt sik flotter. Bi den Verbandwessel minnert Honnig de Smarten. Ümslääg laten sik lichter afnehmen. De niege Huut ritt nich so licht in. — Woso dat so is, mütt de Mediziner utforschen. Un dat hebbt se wiss daan. Ik kreeg dat vun de medzinisch Wirken all in de dörtiger/de veertiger Johr vun dat vörrige Johrhunnert to weiten.


Bild: Uwe Mohr

Wenn een Immen sik hollen will, mutt een toiers för en gaudes Ünnerbringen sorgen. Ik kann de in de dörtiger Johr vun't letzt Johrhunnert nütte Baltenbüüt wat neger beschrieven. En Büüt is en Wörpel von 80 mal 80 mal 80 cm ut dröges Kiefernholt. De Bewirtschaftung wöör vun een Siet utföhrt, nich von baven na ünnen, as dat hüüt bi de Segebarger Büüt begäng is.

De Baltenbüüt is in drei Rüüm indeilt. Ünnen is rechts de Hauptwahnruum mit 9 Waven. Dorneven an de linke Siet kann man den Bruutruum üm fief Waven wieder utbuen. Baven över disse Rüüm sind de 14 Waven vun den Honnigruum.


Königin mit Hoffstaat. Bild: Uwe Mohr

Mit Königinnen-Gatter kann man de Königin vun de Rüüm afsparren, wo een keen Bruut hebben will. Ünnen dwars kann een en Buuwaav insetten, de flink vun de Immen upbuut un mit Honnig vulldragen ward. De mit Honnig füllten Zellen warden afdeckelt. Na korte Tiet kann een hier mit en över en Spiritusflamm hitt maakt Metz en schieres Stück Schievenhonnig utsnieden. De Delikatessladens köpen solk Schievenhonnig för den dreefaken Pries.


Bild: Anke Nissen

De Biller vun't Rapsschleuder sünd för mi in en wunnerschööne Erinnrung. Vadder un Mudder harrn bit 1939 een Immenschuur mit 30 dragen Völker un 20 Upbuuvölker upbuut. Na 1939 wöör uns Imkerie een "kriegswichtiger Betrieb" un noch wieder utbuut. Mudder kreeg Hülp, twei Plichtjohrmäken kunnen graad uns Muckers fuddern un in'n Goorn pusseln, de "Wirtschafterin" harr en grote Muul, kunn aver kein Holtfüür in'n Hierd in de Gäng bringen. Se kennte bloots Gas vun de Stadt.

Renata, en Dwangsarbeiderin ut Polen, weer en echte Hülp. Dor hett nienich een wat seggt, dat se mit Familjenansluß bi uns levte. Nüms vun jüm aver güng in't Immenschuur.


Bild: Uwe Mohr

Wenn Tiet weer, in den Honnigruum negen Waven boventau in elkeen Kasten to setten — Erweitern sään wi dortau — un de Schotten ruttotrecken, müßt ik vun't Internaat Urlaub kriegen. Mudder sää de Sekretärin vun'n Kreisleiter Bescheid. Een Dag later harr ik Urlaub vunwegen kriegswichtige Arbeid.

Un denn müßt dat Schievenhonnig-Snieden akraat maakt warden. Bloots för schiere Stücke tuuschten de Delikatess-Händler Cyrus an'n Olen Markt und Fischer an'n Triebseer Damm. Bloots schiere Stücke nehm dat Lazarett för de Suldaten (Offzeere).


Bild: Anke Nissen

Schleudern weer de Lohndaag, wo een veel Sweit leet. De vullen Waven ut den Honnigruum un Fieferruum müßten ut de Kastens ruthalt warden. De wöörn in de Waschköök to't Afdeckeln bröcht.
Dor weer de drütte Arbeitskrafft bi't Schleudern feddert. De leddigen, afsleuderten Waven müßten wedder insett warden. Wenn een Akkord arbeiden wull, denn kunn hei de vullen Waven rutnehmen un de afsleuderten wedder insetten. Dat weer aver meist nich to schaffen. De Immen harrn ehr Waven fastkitt. Un dor mußt wat wörgen, ehrdat du de Waav harrst. Wenn in Sweit keemst, denn steekten de Immen to. Wenn ruhig bleevst, hööl sik dat in Grenzen. Denn langte en Sleierhaut.


Bild: Uwe Mohr

Mudders niege Währung weer Honnig in verschieden grote Eimer(chen) orrer Glöös. Dat Deputat bröchte den Grundnohrenkraam: Melk, Bodder un Kääs vun de Kauh un de twei Zeegen, frisches Fleisch vun de Kaninken un dat Fedderveih. Un wat denn noch fehlte, dat tuschten Cyrus un Fischer, de Delikatessladens in Stralsund.


Bild: Anke Nissen

Maal weer ik alleen tohuus. Mudder harr mi noch maal up de Seel bunnen, dat ok ja keen Schwarm utrieten dää. Ik harr en olen Mörser mit Schlegel tohand un de Füürwehrsprütt mit een Emmer Wader. Mien Maten kemen to uns up'n Hoff. Ik harr dat groot Woord. Woans vermehrt sik de Immenvölker? En Volk hett bloots een Königin, un de alleen kunn Eier legen, an 2000 an een Dag.


Bild: Uwe Mohr

Wenn en Volk över 40000 Arbeiderinnen harr, buuten de besünners smalle un lange Zellen, de Weiselzellen. Besünnres Fudder ward för de Bruut in disse Zellen vun de Arbeiderinnen herstellt, dat so nöömte Gelee Royal. Düt Foder maakt ut gewöhnliche Larven Königinnen. — Kort bevör de in en Weisenzell rutkamen junge Königin slüppen dää, kunnst ein hell Piepen hören. Un den Avend tovör harr dat piept.

Bruddig Wedder harrn wi ok. So setten denn mien Maten un ik vör dat Immenschuur. — Lang passeerte nix. Und denn kemen se ruut, all Immen mit de ole Königin, de junge Königin harr dat ole Volk övernahmen. Nu wöör mit den Mörser un den Schlegel Krach maakt. Dat schull de ole Königin verschrecken, dat se sik an en Ast von en Boom vör dat Immenschuur setten dää. Uns Schwarm tröök aver över de Heck in Navers Gorn. Dor sette sik de Königin an en Telgen un as Schutz um se rüm dat mitflagen Volk.


Bild: Uwe Mohr

Na twei Stunnen harr sik de Druuv beruhigt. Klauk verklickerte ik mien Maten, dat wi nu een Immenkorv mit "Beifuss" utrieven müßten. De Schwarm seet so deip, dat de lütte Ledder reikte, an den Schwarm rantokamen. Angeversch stülpte ik mi ok bloots den Sleierhaut över un kladderte de Ledder mit den Korv hooch, hen na den Schwarm. Een korten Ruck. De Schwarm föll in den Korv. Den dreihtest üm, un de Schwarm weer infungen. Bloots klappte dat bi mi nich. Na den Ruck an den Ast kreeg ik de iersten Steken. Den Korv leet ik fallen, jümmer miehr Immen verpassten mi ehren Steek. Ik leep wat ik lopen kunn, de Immen jümmer achter ran. Ik verkrööp mi in uns Kinnerstuuv un krööp ünner dat Deckbedd.

Mudder wöör vun mien Maten informeert. Se sää nix. Ik bleev mit so an twintig Steken in uns Kamer still liggen. Ik harr liernt, dat en groot Muul flink dick ward, wenn mit Immen wat wiesen willst.

Ik heff Respekt vör alle Imker, de mit een Ruck ehren Schwarm infangen daut.


31.1.2016


na baven