Woll jedein Bunnsbürger kennt dei 1000jöhrigen Eicken bi Ivenack. Ob dat ok för dei Linn in denn lütten Urt Reinberg, twüschen Stralsund un Griepswold lägen, taudrifft, is tau betwiefeln. Ok sei hett ein Öller von dusend Johren hinner sick un is dormit so olt as dat Land Mäkelborg.

Dei Dicke Linn. Ahn Bläder is dei terklüftete Stamm gaud tau seihn

Dor is dei Linn tau finnen. Klick up tau'n Vergröttern!

Dat Schild ziteert ein Gedicht up dei Linn. Klick up tau'n Vergröttern!

Ierstmalig wüür dei Nam von dei Burg Mikelenburg in'n hüdigen Dörp Mecklenburg, twüschen Wismar un Schwerin lägen, in ein Urkunn von Kaiser Otto III. in't Johr 995 erwähnt. Disse Urt gäw dat ganze Land sienen Namen.

Dor licht Mecklenburg! Dat licht wohraftig in Mecklenburg
un nich in Vörpommern.

Doch wi fünnen disse urolt Linn, dei in'n Volksmund ok "dicke Linn" beteikend ward, ganz unverhofft bi ein Fohrt dörch Vörpommern up denn Friedhoff von Reinberg. Sei sall na ein Schild ein Öller von 1000 Johren hemm — wat von Fachlüüd jedoch betwiefelt ward. Dei schätzen dat Öller up 500 - 800 Johr.

Dei Linn steiht in Loof, dei "Johresringler" geneiten denn Schadden

Eigentlich hüürt dei Urt Reinberg nich tau Mäkelborg / Mecklenburg — aver hüdigendags is Mäkelborg mit Vörpommern in ein Bunnsland vereint. Deshalw heww ick dei oll Linn för uns "Wunnerwarken" utsöcht un beschräben.

Dei Linn besteiht ut 2 Stämm un hett in'n Loop von dei välen Johr einen Hollruum in sick bild. In dissen kann man sick ohne väl Meuh ünnerstellen. Dei Linn sall all vääl Johr vör dat Bugen von dei Kark vör 800 Johr plannt worden sein. Sei is üm dei 19 Meter hoch un hett in 1,30 m Höch öwer denn Ierdboden einen Stammümfang von 10,80 m; dei Boomkroon hett einen Dörchmäter von 17 m. In olle Tieden wier dei Kark mit denn Friedhoff un dei Linn Holtstell von dei Postillions.

Dei uurolle Stamm, dat junge Greun, dorachter dei Spitzbagen
von dei gotische Kark — Hart, wat wisst du miehr?

Dei Verfater un sien Fru lachen ut dei Linn

1785 hett dei königlich-preußisch Oberkonsistorialrat Propst Johann-Friedrich Zöllner ut Berlin in sein Reiseupteiknungen dei Mächtichkeit von disse Linn erwähnt.

1796 sall Wilhelm von Humbodt staunendwies vör disse riesig Linn stahn hemm. Seit 1782 wüürn na einen Gripswolder Senatsbeschlutt henn dei Grawwstellen von dei Predigers, dei bither in dei Kark vör denn Altar wiern, up denn Karkhoff ünner dei Linn verlecht. Vör denn Altar warrt dat mit dei Tied drang, un ünner dei Linn is veel Platz. Dei Linn stöört dat nich — sei hett al veel mehr kamen un gahn seihn.