Schöne niege Welt
Woso hüüt Ackerland renatureert warden mütt — warden dörf

vun Rudi Witzke


Ut Scheffelke "Der Zingst"

Wi hebbt letzt över uns Schüün up de Sunsche Wisch judizeert, wat dat de geev orrer nich. Ik wüßt, wo se maal stahn hett. Un ok dat denn in een Flucht de Stallung weer. En Schaul mit Schüün un Stallungen? Dat kann doch nich angahn. En Schaulmeister is doch keen Katenbuur.

Hier köönt wi allens up een oles Foto seihn. Wenn Mudder jümmer en Kauh harr, af un an ok twei, Schaap un Häuhner un Tucht-Göös un Swien, dennso müßt Fudder un Streu ranschafft warden. Ik denk, de vör Storm schütt Duurnbusch, ümgeven vun Swatt-un Wittduurn, weer miehr as een Morgen groot. Denn Kartüffel un Räuven un Wrucken müßte se vun sisse Eck vun Schaulacker oornen.

Se harr wat höger liggen Land bi Schütts Ackerland funnen, und dat weern ja meist man bloots so an 10-15 cm över N.N.. Aver even över N.N.. Dat harr se taupacht, wo se Koorn to'n Wassen un Riepen kreeg. Dor keem de püttscherige pleegte Mess ünnern Plaug. So hett se, so veel ik weit, nix anners an Fudder för dat Veihtüüg toköpen müßt.


Kark vun Zingst mit Kartüffelacker dorvör ut Scheffelke "Der Zingst"

Dat weer allgemein Gebruuk, dat up Zingst dor, wo dat Land wat höger weer, Kartüffel anbuut wöörn. Een kunn dat ok mit Gassen un Sommerweiten versäuken. Hier is en Acker vör de Zingster Kark. Dat weer keen "Gott Schandeeren", ehrder laven. Kartüffel vör de Kark: "Uns Broot för den Dag giff uns hüüt!"

Hüüt kannst di dat æverhaupt nich vörstellen. Wi hebbt to veel Nohrenkraam, süss wöörn wi nich so veel Mais, Etenreste ut de vörnehmen Restauraants, Kantinen, Gasthööf un Affälle ut de Slachterien in de Biogas-Töörm smieten un to Methan ümwanneln. Schöne saubere Energie, dat Bruddeln un Blubbern mit Kolibakterien! Wenn dor de Afluftfilter nich ganz dicht is!! Denn fallt nich Strahlen över uns her, den griepen uns EHECs un noch biestiger Öös an.

De Botaniker un Chemiker hebbt rutfunnen, wat Planten nau brukt. Dat mengeleert wi in den Kunstdünger. Dat geiht so wiet, dat wi up messfrie Toonkugeln Tomaten, Gurken, Salat, Kohlrabi, Paprika un Zuchini in een Drievhuus planten un mit nau afmeten Nohrenlösung groottreckt. De Drievhüser hebbt in Spanien tosamen en Grött vun an de 66000 ha Land. Dat sünd minnst 11000 Gautshööf. Süken köönt dor licht över de Planten herfallen. Denn ward de Dootmaker-Sprütt insett, för elkeen Süük dat rechte Gift. Ok up de Grööt vun 1000 Morgen. Dat de Gräunkraam ut de Drievhüüs nich dat Aroma hett as de buten wassende, dat stöört de nich, de dat nich anners kennt. Hauptsaak, de Gurk is grååd, de Tomaat hett keen Placken. Un billig mutt dat sien.


Drievhuus in Spanien

Dat is wat unnatürlich, weit ik. Wi renaturieren dorför denn ok Ecken Land, so ok den Oostzingst, un hebbt en gaud Geweten. Miehr noch: Wi kaamt uns vör as de groten Heger un Pleger vun de Natuur.

Nu aver trüüch to uns un uns Öllern Tieden: Mudder weer mit 12, 13 Johr 1916 ut de Schaul nahmen, wieldat ehr Bräuder in'n Krieg weern, ehr Vadder weer 1909 storven. Mien Oma kreeg twei Mannslüüd up'n Hoff in Sievertshagen, de bit to dissen Dag för Arbeiden nich dögten un ok nich Suldat warden kunnen. De schullen den Hoff bewirtschaften. De Dæsbaddels hebbt sik tau un tau döömlich anstellt. As se denn de Pierd noch kujoneerten, hett mien Oma se vun'n Hoff jaagt. Nu kreeg Mudder dat Gespann un weer de "Buur" up den Hoff in Sievertshagen. —

Dat keem ehr nu 1923 up de Sunsche Wisch to Pass. Se borgte sik vun Jehann Schütt dat Gespann un dat Ackergeschirr ut. Se harr so veel Land ünnern Plaug, dat se allens, wat se bruken dää, sülfen anbuen kunn. Un dat bi en Bonitierung vun jüst 10-15 up en poor "gaude" Ackerflaggs.

 

Sand (mineralische Hauptbodenart)
unter 10

Ton (mineralische Hauptbodenart)
60 und mehr

So en Acker mit Bonitierung ünner 10 tellt hüüt to Öödland. Dat Seggen hebbt de Buurn mit Klei an de Hacken De hebbt Ackerflaggs mit en Bonitierung 60- 70. Un de stöhnt, dat se miehr Subventschoon kriegt.

Uns Enkel wasst mit de Renatureerung un de Drievhüüs up. Gräunkraam gifft up'n Markt. Gistern hett uns uns en Enkel besöcht. Oma hett na dat Meddageten ehm maal unsen Lüttgoorn wiest, den se pacht harr, as uns Kinner noch all in't Huus weeren.

Dor sehg hei mit grote Ogen den Kohlrabi wassen. Un de Salaatköpp. Un gräune Bohnen hüngen an de Strüük. In en verlaten Goorn stahn Himbeer- und Johannisbeerstrüück. Hei truute sik ierst nicht, denn aaver lickmünnten de Beeren. Hei strahlte un sää to sien Mudder: "Solch einen schönen Garten wollen wir auch haben." Se hebbt, liekers se in en Dörp wahnt, keenen. Sien Mudder hett bi disse Saak keen Schuld. Se mütt as Wittfruu den ganzen Dag up Arbeid. En Goorn för Gräunkraam hebbt se nich. De Jung weit best Bescheid mit Treckers, Güllewagens, Melkmaschinen. Hei weit, wo veel PS Hennings Traktoor för den Söss-Schåår-Plaug hebben mutt. Vör Hunnen un anner Derten is ehm bang. De Buur gegenöver is en Kauhbuur mit so veel Land ünner'n Plaug, dat sien Käuh un Schwien Schroot un Streu kriegen köönt. En Goorn för Nohrenkraam hett den Buurn sien Fruu nich.

Nüms kann sik rutreden, dat hei vun all den niemodschen Kraam nix weit, nix wüßt hett. Wi all nütt den Kraam in de "Niege, schöne Welt". Ik fraag mi nu aver, wat ik en Anter funnen heff, woso wi den Oostzingst renatureern mütt. Dat heit: Wi sett dat Land vun en Dörp, mien Dörp ünner Wader vun de Oostsee. Dat Land vun mien Dörp verswinnt. Wi köönt uns dat leisten, Land afsupen to laten.

Is dat villicht, wieldat uns Öllervadders mit uns Ierd nich pleeglich ümgahn sünd? Ik glööv nich. Leest wi maal bi de Hoochdütschen na:

Culcha Candedla — Schöne neue Welt

Die Welt geht unter, doch bei uns is’ Party-Halli-Galli
Alles im Eimer, doch wir hüpfen wie bei Dalli-Dalli
Jeder sagt es: Klima ist ’ne Riesenkatastrophe
doch bald brauchen wir nur noch Bikini und ’ne Badehose
Ich will mehr Fastfood fressen; wer braucht schon Regenwald?
Solang mein Konto voll ist und für mich noch Luft zum Leben bleibt
Alle sind Hammer drauf, keiner braucht mehr Angst zu haben
Keiner wird mehr krank, weil wir eh schon jede Krankheit haben
Und fliegt das Kraftwerk in die Luft, fängt jeder an zu strahlen

Hey… Herzlich willkommen, herzlich willkommen
in unserer schönen neuen Welt
Ab heute bleibt nichts wie es war. Alles wird auf den Kopf gestellt
Herzlich willkommen, herzlich willkommen
in unserer schönen neuen Welt
Was morgen wird ist scheißegal. Wir feiern bis alles zerfällt!


Schönes nieges Wahnen. Foto Michael Sander/wikimedia commons


29.7.2012


na baven