Œwer dat Fasten

vun Behrend Böckmann

As dei Minschen so wiet wiern, dat's sik ehr Götter måkt hemm', dunn keemen's ok bald dorachter, dat 'n tau bestimmte Tieden einfach, trüchhollend un taufräden läben möt, üm bäder mit sienen Gott œwerein tau sien. Mohammed hett so läwt un Allah hett em dorför den Koran gäben; un Moses hett dat ok so dån un kreech dorför von sienen Gott dei teihn Wiespåhls (10 Gebote).

Ok von Jesus ward vertellt, dat hei 40 Dåch inne Wüst taubröcht hett, üm sik up't taukünftig Wunnerwarken intaustellen. Un fiefhunnert Johr vör Jesus hett all Phytagoras (570-510 v.J.C.) 40 Dåch einfach, trüchhollend un taufräden läwt, üm mit kloren Geist un väl Kraft den Besäuk vonne Gelihrtenschaul in Alexandria tau beennen. Ok uns germån'schen Vöröllern hemm' wat von dissen Bruk hollen; un af dat tweite Johrhunnert n. J.C. keemen ok dei Christen up den Infall, tau bestimmte Tieden Äten un Drinken aftauwiesen, üm Lief, Kopp un Seel von ierdisch Lasten frie tau måken un üm sik so up den Redder tau besinnen.

Dat Wurt "fasten" sülben för Äten un Drinken afwiesen, üm einfach, trüchhollend un taufräden tau läben, dat keem gägen 800 n. J.C. up, as Olthoochdüütsch språken wür, un harr ok as hüt noch dei Bedüdung von wisshollen un inhollen von Vörschriften för't trüchhollend un taufräden Läben in Henwennung tau Gott den Vadder hett.

Anfungen hett dat Fasten mit twei Dåch inne Wäk: an'n Middwoch, denn an dissen Dach harr Judas sienen Herrn Jesus verråden, un an'n Friedach, den Dach, as Jesus krüzigt wür. Dat hett sik œwer mit dei Tiet verluurn. Blot dat Fischäten an'n Friedach as Utdruck för't Fasten hett sik bet hüt hollen; un denn keemen vier Fastentieden up:

• Dei ierst Fastentiet in't Johr sünd dei sœben Wäken vör Ostern, dat Pass'schonsfasten inne Tiet vör Paaschen, dormit dei Minsch nå dei Faslåm-Völlerie in sik gåhn kann, Gott neeger kümmt, weniger sünnigen deit un sik vergäben lött...
• Dei tweite Fastentiet is dat Apostelfasten. Dat fangt an'n Måndach nå Allerhilligen an un duert bet taun Festdach för dei Apostel Petrus un Paulus an'n 29. Juni. (Måndach nå Allerhilligen, dat is as kathool'scher Fierdach dei ierste Sünndach nå Pingsten, un disse Fastentiet höllt bet taun 28. Juni — an'n 29. is disse Fastentiet för dei Kathool'schen vörbi.) Petrus un Paulus, twei Jünger von Jesus sien twölf Mitlöper, wiern nå Rom kåmen un hemm' vonne Wunner, den Dod un dei Häbenupfohrt von ehrn Herrn Jesus Christ predigt. Dat fünnen dei Römer nich so gaut, un beid wüürn dörför an einen Dach in Rom mit'n Dod afstråft: Paulus wür mit't Schwert un Petrus an't Krüz den Dod œwergäben. Ok nå dei Reformatschon würn vonne reformierten Christen an Peter un Paul alias Paulus un Petrus dacht, œwer dat Fasten œwerleeten's dei kathoolschen Christen.
• Von'n 1. bet 15. Austmånd gifft dat 'n drüdde Fastentiet in't Johr. Sei gellt Gottmudder Maria, dei an'n Dach von Mariä Upnåhm in Häben ennt. Is ehr Sœhn Jesus dörch eigen Kraft taun Häben upfohrt, so ward Maria nå dei kathoolsche Globenslihr in'n Häben upnåhmen un Christen helpen ehr dörch Fasten in disse Tiet bi'n Œwergang von't ierdisch Läben inne Ewigkeit. Disse Dach is noch Fierdach in't Saarland un in kathoolsche Ecken von Bavaria un kathoolsche Länner as Lichtenstein, Frankriek, Belgien ...
• Dei vierte Fastentiet in't Johr wier orrer is dat Adventsfasten von 1. Advent bet Hillig Åbend. Nåbläben von dit Wihnachtsfasten sünd dei Wihnachtsstuten un Päpernœt as Teiken för't trüchhollend Läben un dei denn mit'n Vullbuksåbend ennen däd, wenn inne Wihnachtsstuf ünnern Bom dat Kind inne Krüff leech.

Woans man Gott dörch Fasten neeger kåmen künn un dorbi liekers nich verhungern süll, dat wür dörch Fastenrägeln angäben. Un äbenso geef dat allerlei Mœglichkeiten, dat Fasten — so as vörgäben — tau ümgåhn. Wieldat dat Äten von Fisch as Wåderdierten nich verbåden wier, würn dat Fedderveih un sülfst dei Biber tau "Wåderdierten" måkt. Un 'n Farken, dat in'n Sod föll, künn so ok taun Wåderdiert warden. Un dor Drinken nich verbåden wier, wür ok 'n Fastenbier bruucht, dat satt måken däd.

Hüt gifft dat ok noch Minschen, dei wägen un för ehrn Globen Fastentieden, Fastendach orrer Fastenäten inleggen un von dit un dat Äten un Drinken afseihn. Dei gröttste solk Gemeenschåp sünd wisslich dei Muslime, dei jüst in düsse Tied wedder ehrn Fastenmånd Ramadan hollen.

Œwer Fasten is ok son'n Oort Mod' worden, üm den Wihnachtsspeck bet Ostern weder lostauwarden. Man ett kein Schokelor un hett keinen Sex, man will dörch Fasten gesund blieben un olt warden, mål bäten weniger schmöken un drinken... Dat gifft väle Grünn', dat Fasten för sik tau entdecken. Mit Fasten lött sik sogor Poletik måken, nähmen wi blot dei Akschonen von Mahatma Gandhi orrer den Hungerstreik vonne Kalikumpel 1993 in't thüring'sche Bischofferode. Un noch' n Henwies: Wecker sik nich an't Fasten höllt, dei möt nå dei christliche Liehr von hütigendåchs nich mihr mit 'n Stråf in Gott sienen Nåmen räken!