|
 Wi
spazeert de Trav' lang. Bi de Dankwartsgruuv geiht ene Brüüch
över den Fluß, röver na den Wall.
Wi blievt aver up de Stadtsiet, kaamt vörbi an en lang Huus, dat
"Im Reinfeld" heten deit. En wunnerlich' Namen! Den verkloor
ik bi en anner Gelegenheit.
Denn kümmt de Grote Petersgruuv.
Se geiht in enen lütten Bagen recht steil bargup, hooch na uns'
Petri-Kirch. An de rechte Siet vun de Gruuv staht Hüüs ut
olle Tieden — Gotik,  Barock,
Klassizismus — un in de mehrsten vun disse Hüüs is veel
junget Leven in: Dat is de Musikhoochschool. Bi't Vörbigahn kann
een enen Chor hören orrer ene Fleit orrer ene Fiedel.
Man denn — noch en poor Stufen na links — un wi staht up den
Rasen vör de Petri-Kirch. Veel Platz is dor nich. Wenn wi hooch
kieken wüllt na den Torm, denn mütten wi den Kopp wiet in
de Nack leggen. De Torm vun St. Petri is licht to kennen: De groot Torm
in de Mitt, un an all veer Ecken sitt noch en lütt Torm.
...un elkeen Eck een lütte Torm
 Binnen,
in de Kirch, staunt meist jedereen: breet, wiet, hell!
St. Petri is ene fievschiffig Hallenkirch: Mittelschipp, links un rechts
je twee Siedenscheep, un all liek hooch.
Grote Finster, de veel Licht bringt, binnen allens witt utmaalt, dorto
up den Footböön rode Platten.
Anners is dor nich veel.
In'n letzten Krieg is disse Kirch mit afbrennt, binnen weer allens
weg, Tormspitz un Dack ok.
Se kunn eerst as letzt wedder upbuut warrn, na de Marienkirch un den
Dom. En Verein hett düchtig dor mit holpen, "Pro St. Petri"
heet de.
Ene Gemeen gifft dat nich mehr, de is uplööst.
Wat aver kann man mit so en groot Huus anners anfangen?
En Idee weer, dor enen Konzertsaal intorichten för de Musikhoochschool.
Man mit  de
Akustik is dat so'n Saak. Fievschiffig, dat bedüüdt: vele
Gewölven, vele Pielers.
En Wettbewerb mit teihn bekannte Architekten hett ok nich veel bröcht.
Nu is dat uns' Kultur-Kirch. Pasters hebbt dat Leit, un se hebbt dat
fast in de Hand. St.Petri is en Kirch ahn Gemeen, dorför is dat
nu de Kirch för de ganze Stadt, för alle Lüüd hier.
St. Petri is so'n Oort Festsaal för Kunst, Musik, Literatur, Religion.
Lude Diskussionen över Denkmalschutz, över unsen Markt gifft
dat hier. Utstellungen vun moderne Kunst, männichmal bannig modern,
Jazzmusik, Rosenschau — un Gottesdeenst warrt ok hollen. De olle
Marmordööp is wedder upstellt, ene feine, lütte Orgel
steiht parat, un wenn twee sik truut, denn köönt se sik in
St. Petri truun laten.
Christus hangt an't Krüüz, man nich so, as wi dat kennt.
Dat Krüüz, dat sünd twee olle, tohoopnagelt Breed. De
Christus, dat is so een ut'n Andenkenladen. Eenfach rupbackt. An allens
is swatt ansmeert.
Up Christus , so hett de Pastor dat verkloort, dor kann een all sien
Noot, siene Sorgen, siene Last afladen, rupsmieten — he driggt
dat.
Un wenn di dat so düüdt warrt, denn süht dat Krüüz
up eens ganz anners ut.
Männichmal bün ik över de Gewölven rümkladdert
ünner dat riesig grote, gewaltige Dack.
Un mit den Fohrstohl, dor köönt wi noch höger rup. Baben
is ene Utsicht-Plattform, un de Sicht is würklich dull. Över
de Stadt weg, wiet weg, bet na Travemünn un na Mecklenborg. Orrer
een kiekt graad vör sik dal up dat Holstendoor, as ut enen Kinner-Speel-Buukasten
buut.
St. Petri ankieken, dat is to jede Tiet en Beleevnis; wenn se vull
is vun Minschen, un ok, wenn se lerrig un still is.
|
