Lütte Büllers

vun Antje Heßler

As Kind weer ik öfter in Dithmarschen bi mien Tante to Besöök. Se reep mi denn: "De Büllers mütt wat to Drinken kriegen!" Denn füll ik enen Ammer mit Melk un güng mit mien Tante na de Koppel. Dor klapper ik mit den Henkel vun den Ammer un reep luut "Komm Bülle Bülle, komm Bülle Bülle!" Glieks kemen se anlopen un söchen sik enen Ammer, steken den Kopp in enen Ammer un slappen de Melk ut. Bald weer nix mehr dor. Denn leet ik se noch mit ehr ruche Tung an mien Hand licken. Dat kettel immer richtig!

Moderköh mit Kälver

Nu wullen wi in Holmkamp de lütten Welsh-Black-Kälver (Büller) bekieken. Bi düsse Rass findt dat ganze Familienleven eentlich in de apen Natuur statt. Man to de Kalvstied harr de Buur de Köh wat neger up de Koppeln an't Huus halt. Hier kunn he sehn, wenn Hölp nödig weer. De Koppeln weern all mit Elektrodraht intüünt.

De Heerd mit poor Lüüd dortwüschen, de ehr besichtigt

Allens Jungs!

As wi up den Hoff ankemen, wöörn wi de velen swatten Deerten up de Koppel gewohr. Lütte Kälver weern ok dorbi. Achuntwintig Kälver weern al up de Welt kamen — un allens Bullenkälver, vertell uns de Fru! Wat för en unwohrschienliche Tofall! Bi de Rinder warrt eentlich Jungs un Deerns ja ok fifty-fifty boren. De Wohrschienlichkeit för 28 Jungs is also nau 0,5²⁸ = 0,00000037 Perzent!! Ik heff nich nau nafraagt, avers ik denk mi, dat dat keen Tofall is — se mööt dor wat bi daan hebben. Wenn dat Tofall is, kann ik bloots seggen: Se schallt unbedingt Lotto spelen!! Un villicht hebbt se neegst Johr ja ok mal wedder liekso vele Kohkalver. Sünd hett de Heerd ja keen Bestand.

Twee Ohrmarken sünd de afsoluut anseggte Sommertrend ünner Rinnerkiddies! Voll cool!

Cuba liggt natüürlich voll in'n Modetrend!

Lora hett sik ok twee Ohrmarken steken laten

Un Calli eerst! Calli is sooo cool!

En Welsh-Black-Moderkoh driggt ehr Kalv liekso as de Minsch 9 Maanden. Dat is en beten kötter as anner Rinnerrassen. Ok dat Kalven geiht licht bi düsse robuste Rass, Komplikaschoonen sünd roor. Dorüm laat de Buurn dat ok allens op de Weid stattfinnen. De Kalver bringt bi de Geboort al 40 Kilo op de Waag un nehmt fix to. Leider kunn ik de lütten Kälver nich strakeln, dorto weern se doch to schuug. Un Moder pass jümmers op. Ofschoonst de Welsh Black as en sünnerlich ruhige Rass gellt, wull ik mi nich mit en füünsche 750-Kilo-Moderkoh anleggen.

Tomaal Moder ok noch Hörner hett!

"Hm, ik heff Hunger!"

In Holmkamp bi de Welsh-Black-Rinner müss keen Melk na de Kälver dragen warrn, dat weer nich nödig. Se kregen de Melk direkt vun ehr Mama frisch ut dat Üder. De Melk is rieklich un dull fettig, dorüm diegt de Lütten ok orrig un wasst gau ran. Ok Tweeschen-Kälver kann en Welsh-Black-Moder mit ehr Melk rund un sund fodern. De Welsh-Black-Kälver sünd dat ganze Johr, ok in'n Winter, mit ehr Heerd buten up de Koppel.

"Is de Tankstell apen?"

"Mit'n beten Knuffen kümmt wat!"

Mit uns weern noch mehr Lüüd up den Hoff ankamen. De wullen sik Deerten för ehre Zucht ankieken un villicht köpen. Vun de Buurfru kregen alle Besööker Gummistevel anpasst. Dat weer ok goot so. De Koppel weer teemlich natt un överall leeg Kohschiet. Vörn an de Koppel weer glieks en Elektrotuun. Dor stünn al en Koh un keek uns mit grote Ogen an. Wi klattern ünner den Tuun dörch up de Koppel. En poor lütte Büller harrn jüst Döss un halen sik Melk bi de Modder. Mit ehrn Kopp stötten se ümmer gegen dat Üder vun ehr Modder. Denn leep de Melk beder. Dat müss ik doch knipsen! Düssen teemlich rücksichtslosen Trick, Moders Üder to knuffen, hebbt ja de Jungdeerten vun mennig Aarten in ehr Instinkt — ok lütte Katten, Swien usw. kannst bi't Sugen knuffen sehn. Bloots wi Minschen nich — dat is villicht ganz good so.

Orrig Bedreev an de Tankstell!

Foot för Foot — Koh-Podologie!

Nahdem wi allens bekeken harrn, wullen wi wedder na uns Auto. Aver vörher müssen wi de Stevel putzen un wedder afgeven. Unsen Weg güng doch dörch dat Huus! En Koh keem achter uns her. De leet sik vun den Buurn de Fööt putzen: Se böör een Foot na den annern hooch! Wi keken ganz verwunnert. "Das hat sie gerne!", meen de Buur lachend. "Fußpflege für Kühe!" Mank de Hufen harr sik allerhand Dreck afsett.

Wi harrn dat al mal in Nessendörp bi de Esel sehn. De kregen na en Utfohrt regelmäßig de Hufen reinmaakt.

Anner Züchters besichtigt de Heerd...

Nahdem wi uns Fööt (also de Gummistevel) fien sauber maakt harrn, güng wi dörch dat Huus wedder na uns Auto. Wi weern richtig vergnöögt. Wat harrn wi schon allens dörch uns Sökeree na dat Bett vun de Schwartau to sehn kregen!

...un mööt sik achtern da Fööt afputzen!