 |
Grööndünger vun Antje Heßler Se köönt de Fotos per
Klick vergröttern. Trüch kaamt Se denn mit den Zurück-Knoop
op de Browser-Symboolliest.
Blots för korte Tiet geev dat düssen Harvst Stoppelfeller. De Oorn weer bi dat gode Weder fröh inbröcht woorn. Glieks dorna wöör de Grööndünger utseit. Dat geev keen Gelegenheit för de Kinner to'n Drakenflegen. De Tieden hebbt sik ännert.
Överall kunn man gröne Feller bewunnern. Welk lüchen ok in Witt un in Geel. Ik stell mi de Fraag: Blööt dor de Raps? De Harvstlandschap weer nich blots gröön, se weer bunt! Wo kunn dat angahn? Ut mien Kinnertiet kenn ik blots de lütte junge gröne Saat. Sehg meist en Rasen liek. Mit mien Opa bün ik na de verscheeden Koppeln gahn un heff keken, wi dat Koorn, de junge Saat steiht.
De verännerte Harvstlandschap hett mi nescheerig maakt. Ik müss doch rutkriegen, wat dat allens för Planten weern! In'n letzten Harvst harr ik al up Opas Biohoff den Semp, Klever un de Facelia kennen lehrt. Opa harr mi en Nahölpstunn geven. He verwenn keen Kunstdünger, he nehm Grööndünger.
Nu harr ik en witt blöhend Feld sehn un dorneven en grönes mit hoge Planten. Dat wittblöhende Feld weer Oelrettich. De hoge gröne Plant mit de groten grönen Bläder weer Ramtillkruut. De Blöden sünd geel. Ik heff se noch nich blöhen sehn. Se keem ut Äthiopien un erinner mi an Mais. Wat harr sik in mien Leven al allens ännert!
Ümmer mehr begriep ik, dat de Grööndünger för uns Land wichtig is. De Gröönplanten deckt de Eer to, schütt se vör dat Utdrögen, un de Storm kann dat dröge Land nich wegpussen. Se hebbt depe Wötteln un maakt dormit den Acker locker, de vun grote un swore Maschinen tosamendrückt woorn is. Dat Unkruut hett keen Schangs, sik breet to maken. In't Fröhjohr warrt de Planten denn noch ünnerplöögt un geevt den Acker Kraft.
För mi is dat Schöönste: de Planten seht ok noch smuck ut. Wenn in de griese Harvsttiet de Storm över de kahlen Felder puust, smückt de verscheden Planten de Natuur mit farvig Blöden. Ik heff mi al mennig Blomenstruß plückt. Dorbi heff ik denn ok mitkregen, dat an den Ackerrand Mischgrööntüüch utseit weer.
Besünners smuck weern de verscheden farvig Peluschken, ok Futterarven nöömt. De witte Oelrettich lock bi Sünnenschien in November noch enige Insekten an. Bi mi up den Blomenstruß heff ik Winterschwevfleegen bekieken kunnt. De Winterschweevfleeg — ok Hainschweevfleeg — weer "Insekt des Jahres" 2004. En lütte Keilschweevfleeg harr sik ok noch vun de Blomen anlocken laten. Dörch de zarten transparenten Flünken lüüch de Sünnenschien. Un dat allens in den Novembermaand!
23.11.2014
|
