Rutilquartz as Smucksteen. Foto: A. Nissen. Klick up to'n Vergröttern!

Bergkristall

Vörstellt vun Anke Nissen

Bergkristall höört to de kristalliseert Utbilden vun de Quarze = SiO2 (Kieselsäure)

7 (Diamant hett de Härte 10)

dörchsichtig Kristalle

Varianten

Ut Kieselsäure bestaht vele bekannte Smucksteen, nämlich all de Quarze:

Bergkristall Altarbild St.Michael Hildesheim. Foto Anke Nissen. Klick up to'n Vergröttern!

• Kristalliseert Utbillen vun de Quarze:
  • Bergkristall (ok mit Rutil-Inslüsse)
  • Amethyst
  • Citrin (hell bet güllengeel)
  • Rauchquarz
• fienkörnig Utbillen:
  • Chalcedon (hellblaag)
  • Karneol (vun geel bet blootroot)
  • Achat un Onyx
  • Sarder (licht bruun)
  • Chrysopras (appelgröön)
  • Jaspis = SiO2 + Tosätze (geelbruun bet root). Se sünd dichte Aggregate.
  • Plasma (jaspisgröön)
  • Heliotrop (loochgröön mit rode Placken)
• groffkörnig Utbillen:
  • Aventurin (hett Inslüsse vun Glimmer, dorher güllen-schimmern)
  • Quarz-Katzenauge
  • Tigerauge,
  • Falkenauge
  • Prasem
  • Rosenquarz
• amorphe Kieselsäure:
  • Opale
    

  

Geschichte

Dat Woort "Kristall" kümmt ut de griechisch Spraak un bedüüdt: Ies.
Een hett fröher de Bergkristalle för "up ewig froren" hollen, dorüm sall de Naam vun den griechisch Begriff för Ies stammen.

Bergkristall is en transparenten, dörchsichtig Kristall. So 'n Kristall vun dit Mineral kann vele Meter lang sien un bet 5 Tonnen wegen. He kann aver ok so lütt sien, dat du em blots ünner 't Mikroskop kennen kannst.

Bergkristalle, de wohrschienlich ut dat Gotthard-Massiv stammt, sind in'n Rhein funnen worrn. Dat Water harr disse Kristalle rund un glatt schüürt. Se wörrn as "Rheinkiesel" hannelt. Hüüt aver sind "Rheinkiesel" meist blots noch ut Glas, also Imitationen.

Bergkristalle hebbt männichmal Inslüsse, as Bispill vun hoorfiene güllen Rutilnadeln, de "Venushoor" nöömt warrt. Disse Steen warrt geern as Smucksteen bruukt. Man ok Bergkristalle ahn Inslüsse warrt veel as Smucksteen bruukt.

Rutilquartz

Al 3000 vör Christi sünd kunstgewerblich Gegenstände un Smuck ut Bergkristall herstellt worrn; man hett in oll ägyptisch Gräver Smuck, Schalen, un anner Gefäße funnen.
De römisch Kaiser Augustus hett den gröttsten — dormals bekannten — Bergkristall weiht. Un Kaiser Nero much geern ut Beker ut Bergkristall drinken.
Plinius schrifft, dat de Ärzte in 't olle Rom Bergkristallkugeln as Brennglas bruken; se brennen dormit Wunnen ut.

Rutilquarz, Mosaikaltar St.Michael Hildesheim. Foto Anke Nissen. Klick up to'n Vergröttern!

De Bergkristall weer för de fröhern Minschen de "Steen för de Götter". Dorüm harr he mystisch Bedüden as Symbol för dat göttlich Reine un Klore.
Wohrschienlich wörr he ut dissen Grund ok as "Schwöörsteen" — so nöömte "Bürgereid-Kristalle" — bruukt.

Rutilquarz, Mosaikaltar St.Michael Hildesheim. Foto Anke Nissen. Klick up to'n Vergröttern!

De Schamanen bruken den Bergkristall as Reflektor vun 't Geschehen up de Eerd.

Wirken un Legenden

Vele edle Steen hett man in 't Altertum un in 't Mittelöller Kräfte totruut, de "übernatürlich" weern. Dat gell ok för Quarz un siene velen Variationen. Se gellen as Schutzsteen gegen Gefohr. De Bergkristall gell as Schutz för Lüüd, de över 't Water reisen, he leet ehr seker in 'n Haven ankamen.

Man hett glöövt, de Bergkristall kann Krankheiten afwehren orrer heilen.
Wenn de Bergkristall an'n Finger dragen wörr, gell he as Schutz gegen Frost, Frostbulen.
De Bergkristall sall den, den he tohöört, mit besünner Fähigkeiten utstatten.

In de Astrologie sünd de Steen de Gestirne un Planeten toordnet; so keem dat to de "Maandsteen" (Monatsstein) un ok de "Steen vun de Tierkreise". Dor nimmt de Bergkristall en ganz besünner Stellung ünner all de Steen in.

Altarbild St.Michael Hildesheim mit Bergkristalln. Foto Anke Nissen. Klick up to'n Vergröttern!

De Hillig Hildegard von Bingen (1096 -1179) hett den Bergkristall insett bi Ogenlieden un Probleme vun de Schilddrüüs. Se hett den Kristall in de Sünn upwarmt un denn upleggt. Orrer se hett em mit en Schnuur üm den Liev bunnen bi Nierenbesweer.

Bad Zwischenahn, Altar mit Bergkristalln. Foto Anke Nissen. Klick up to'n Vergröttern!

Bad Zwischenahn, Altar mit Bergkristalln. Foto Anke Nissen. Klick up to'n Vergröttern!

Wenn du enen Bergkristall ünner dien Koppkissen leggen deist, sorgt de Steen dorför, dat dien Drömen klorer warrt.
Wenn du en Bergkristallkugel in de Hand höllst, warrst du wat ruhiger, un de Steen sorgt för Harmonie.
Wenn du in dat klore Licht vun en Bergkristallkugel kiekst, köönt diene Gedanken klorer warrn, ja, du kannst sogoor hellsichtig warrn — dorüm warrt beten wat grötter klore Bergkristallkugeln oft to 'n Wohrseggen bruukt.

De Bergkristall hett in sien kloor Licht all Farven in sik.
He symboliseert Reinheit.
He kann en Help sien, dat du wat erkennen — begriepen — kannst,
dat du to Harmonie kümmst,
dat du Freden findst,
dat diene Gedanken rein un klor warrt.

Bad Zwischenahn, Altar mit Bergkristalln. Foto Anke Nissen. Klick up to'n Vergröttern!

Wi weern verleden Johr mal in Bad Zwischenaar un hebbt dor enen Altar sehen, de hett mi to un to goot gefullen. De weer ganz un gor ut Steen. Un natürlich weern dor ok vele Bergkristalle mit in. Ik heff en poor Upnahmen mitbröcht.