Stare in'n Floog

 

De Swarte Sünn

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Güstern geev dat in de Narichten eerste Biller vun Aventoft. Dat is een vun de Slaapplätz vun de Stare. De liggt an de düütsch-dänisch Grenz. Dor versammelt sik jedeen Johr bi'n Sünnenünnergang bit to ene Million Stare. Vun de dänische Siet kaamt Reisebusse vull mit Tokiekers, üm de "Sort Sol" — to Düütsch "Swarte Sünn" — to bekieken, wenn de Stare ehr Formationen fleegt.


Tohuus an'n Leegerwall: Weiht dor Bläder ut den Boom?


Nee, Vagels!


Nootsfalls ok goot to Foot: Stare

Genau vör teihn Johr hebbt mien Mann un ik dat ok al mal versöcht. Wi wullen uns de swarte Sünn, dat Luftballett vun de Stare ansehn. Aver Petrus harr wat dorgegen. Wenn de Weg nich so wiet weer, wöörn wi dat seker noch eenmal versöken.

So sünd wi blots na den Klützer Winkel kamen. Wi wullen den güllen Oktober mit sien bunten Harvstklöörn bekieken. Kort vör Sünnenünnergang kemen wi bi Harkensee an den Deipsee vörbi. Wi truen uns Oogen nich. Vör uns weer en swarte Wulk vun Stare! Se flögen gau up un daal, so kunnen Habichte un Falken se nich griepen.


Wat för'n Krisselkraam is dat dor? Gnitten? Heuschrecken?


Stare! To Land un in de Luft!


"Ik bün en Star, haalt mi hier rut!"

De Star is en geselligen Vagel. Mit veel Larm setten se sik up en frisch ümplögtet Feld un söchen na Käver un Wörm, hau'n sik den Buuk vull, un na en Stünns Tiet güng dat wieder. Weer hier bi uns ok de Slaaplacken för de Nacht? Villicht in dat Reet vun den Deipsee?

As wi mit uns Auto neger an dat Feld kemen, stöven se all up eenmal in de Luft. Sehg meist enen Mückenswarm liek. Up de anner Siet vun de Straat setten se sik wedder daal. Up dat Feld söchen se wieder na Käver un Wörms. So kunnen se sik noch wedder för den neegsten Dag satt freten. — Wi weern ganz upreegt. Wi harrn de "Swarte Sünn" in Meckelnborg sehn!


De Stare sammelt sik un proovt...


...för Hitchcocks "Vagels"

Ok later hebbt wi nocheens an de Noordsee de Gelegenheit hatt, de Formatschoonsflöög vun Stare antokieken. Dat is to'n Staunen. Dorbi sünd de Gesetten vun den Swarmfloog teemlich eenfach, hebbt se annerletzt rutfunnen: Jedeen Vagel wohrt to sien Navers en Afstand, de 1. nich to groot (de Swarm kunn uteneenrieten!) un 2. nich to lütt (Kollischoonsgefohr!) is. Wenn een Vagel de Richt ännert, mutt de Swarm folgen (Regel 1), aver he fächert sik dorbi op (Regel 2). Op düsse Wies kaamt de schönen Wulkenmuster tostann. De Wetenschaplers hebbt ok Minschengruppen na düsse Gesetten dör de Gegend lopen laten, un süh: se hebbt liek solk Wulkenswarms foormt as de Vagels!


An de Noordsee: De Swarms verdeckt de Hüüs...


...hüllt den Hoff in as en Wulk...


...un weiht as Rook över den Diek

Över Rom maakt jedeen Johr Millionen Stare Statschoon op ehr Wannertoog. Se schiet de ganze Stadt vull, aver ehr Flöög sünd wunnerschöön. — An allens düt müss ik denken, as de Kiekschapp-Bericht ut Aventoft keem.

Twee Dag later keek ik bi mi ut Finster. Dor wöör ik an Heven en swarte Wulk wies. Dat weer wohrhaftig de swarte Sünn, de swarte Sünn vun Travemünn. Na Aventoft bruukt wi nich mehr to föhrn!


...uuuuund Action!, röppt Hitchcock


Stare sünd even...


...Stars!

23.10.2016


na baven