Bunte BläderHarvstklören in Goorn —
Wipfel-Stickelwanz un Rotbeinige Baumwanze

vun Antje Heßler


De Biller köönt Se per Klick vergröttern! Torüch kaamt Se denn mit'n Zurück-Knoop vun den Browser.

De Bläder an de Bööm lüchen in güllen Sünnenschien, un de letzten Staudensünnenbloom blöhen noch. Mien Modder hett se "Monarchen" nöömt. Dat weer buten noch richtig warm. Endlich wull ik en Bild vun dat bunte Harvstloof maken. De Bläder vun den Fleder harrn mi dat andahn, se weern besünners bunt. Enen smucken Telgen harr ik mi to'n Knipsen utsöcht.

Up den Fleder gefallt dat de WanzAver dor weer en Placken up dat en Blatt. Ik keek wat genauer hin. Dor aal sik wohrhaftig noch en lütt Deert in den warmen Sünnenschien. Seeg meist ut as en bunt Wanz. De rotbrunen Flünken legen as en Dreeck up den Rüüch. Dorünner weer en gröön Schild, dat weer mit luder swaart Punkten överseit. Üm den Kopp harr de Wanz enen breden rotbrunen Kragen. Ok de Kopp un de Kragen weern vull Punkten. Alleen up dat gröön Schild sünd 110 Punkten tellt woorn. So en apartig Wanz harr ik noch nie sehn. Se pass sik wunnerbor an de Klöörn vun de bunten Bläder vun den Fleder an.

Ehr langen swarten Föhler güngen hin un her. De Wanz weer mi wies woorn un krööp up de anner Siet vun dat Blatt. Ik versöch de Wanz vun dor to knipsen. As en Elfe kladdert se ut de BloomAver wedder krööp se up de anner Siet. Bi uns Versteekspeel kunn se de Balance nich hollen un full hindaal. Dor heff ik se upsammelt un mit na de Terrass nahm.

Wanz up Flederblatt

Wanz vun nerrnUp en Blatt Papier wull ik de Wanz to'n Knipsen afsetten. Aver se full mi ut de Hand un lann trüchwarts up dat witte Blatt. Nu müss se eerstmal up den Rüch liggend as Fotomodell herhollen. Bi't Ümdreih'n weer se mi binah utbüxt. Ik müss se wedder meern up dat Blatt setten. De Kopp mit den Kragen un de Rüch weern noch veel smucker. Un dat müss ik doch ok knipsen. Dorna heff ik de Wanz wedder in't bunte Loof afsett.

Bi dat lütt smucke Deert hannelt sik dat üm en Stickelwanz, akraat üm de Wipfel-Stickelwanz (Acanthosoma haemorrhoidale). Ok düsse Wanzenoort hett rein gor nix mit de Bettwanzen to doon! Meistiets höör ik vun de Lüüd, wenn ik vun de smucken bunten Wanzen snack: "Iiigittigitt; wo kannst du de knipsen! Dor will ik nix mit to doon hebben!"

Wanz vun vörnWanz in't Profil

Wa smuck is düsse Wanz!

De Wipfel-Stickelwanz dröpt man mehrstens alleen an. Bit to'n Enn vun den Oktobermaand is se an sünnig Placken noch to seh'n. Dat wöör nu al langsam Tiet för de smuck Wanz, sik en Winterquarteer to söken. Överwintern deit se in verdröögt Loof oder an de Eer. In't Fröhjohr leggt se ehr Eier in'n Wittdorn af. In Juni-August kaamt denn de lütten Larven up de Welt. Jüüst as de Füerwanz mööt se fiefmal ehr "Monarchen"Huut wesseln. Un ümmer hebbt se en anner Kleed an. Dat gifft blots eenmal in't Johr en niege Generatschoon. Leven doot se geern in Wittdornhecken un anner Buschwark. Ut de Beeren un Bläder vun den Wittdorn suugt se den Saft.

Sietdat ik weet, dat so veel lütt Deerten den Winter in't dröge Loof tobringt, mag ik dat gor nich mehr in mien Goorn tosamenharken un wegsmieten.

Wat krüppt da ut de Blööt?En poor Daag later weer ik wedder in den Goorn. Ik wull mi de letzten gelen "Monarchen" för de Vaas plücken. Bi't Plücken wöör ik en lütt Deert up en Blööt wies. Meen toeerst, dat weer en vun de Naschkatten, en Eerdimm. Aver ne, dat weer ja ok en Wanz! Weer dat am Enn wedder de Wipfel-Stickelwanz? Bi't genaue Hinkieken kreeg ik aver mit, dat se nich ganz so bunt as de Wipfelstickelwanz weer. Smuck weer se aver ok. Wat dat för en Oort weer, müss ik doch eerst mal ünnersöken.

Gipfelstürmerschöne Farvkontraste

Se höört to de Boomwanzen un is as de Stickelwanz en vun de gröttsten Wanzen in Europa. Bit to 15 mm warrt se lang. Dor kunn ik se doch nich översehn! Un lieden much ik se ok. Se keek mi mit ehr groten Ogen an, as wenn se seggen wull: "Heff ik nich en smuck Kleed an?" De Sieden vun ehr'n düüsterbrunen Panzer weern mit en bunten Rand versehn. In Sommer is de Panzer heller. Meern up ehrn Rüüch het se en orangefarvigen Placken. — An'n mehrsten fullen mi de langen röötlichen Been up. Dorher hett se seker den Naam "rootbeenig Boomwanz" (Pentatoma rufipes) kregen.Rode Been un lange Föhlers

To'n Leven suugt de rootbeenig Boomwanzen Saft ut Obst un lütt Beeren. Mitünner fangt se ok lütt Insekten un suugt de ut. Na dat Leevsspeel in't Fröhjohr leggt de Wievken Eier baben up en Blatt. Den Winter överstaht se aver nich so as de annern Boomwanzen. Se kruupt as Junglarv (2.Larvenstadium) ünner de Bork vun Bööm. Eerst in dat neegst Johr wasst se up un in de Bööm wieder ran.

Uphollen doot se sik geern in Parks un Goorns in Buschwark un Bööm. Vun de Bööm treckt se Ahorn, Eken- un Linnenbööm vör. Se sünd in ganz Europa, sogoor in Kleinasien un Sibirien to Huus.

Kraxeln, nöömt dat de Bayern

Ik freu mi, dat de Wanzen sik in mien Goorn to Huus föhlt. Ik heff keen Ekel vör de smucken Deerten. So is de Farvpalett vun de Harvstklören in mien Goorn rieker worrn.


All Biller: © Antje Heßler
24.11.2008


na baven