Coronasong III

vun Marlou Lessing

"Coronamüdigkeit"

De Minschen sünd bilütten mööd
vun't Fiern de ganze Nacht.
Se suupt, maakt Party, danzt as blöd —
un ok dat Virus lacht!
In Düütschland sünd wi ja so frie, nich?
Un junge Lüüd, de kriegt't ja nienich!

De olen Lü erbittert dat,
se draagt de gröttste Last.
Ahn Party, Spaaß orr jichenswat
sitt se in'n Olenknast.
De Süük kost dat Leven wohrschienlich.
So hööpt se bloots, se kriegt dat nienich!

In Düütschland gifft't keen Einigkeit,
un eerst de Welt ümrüm!
Se weet nich, wo de Kopp ehr steiht,
de Weerschap geiht dat slimm...
Fru Merkel is ok keen Genie nich;
wi wüllt doch all Demokratie, nich?

Bild Gesa Tams-Koll. Klick op to'n Vergröttern!

De Harvst, de Küll, de Ferien —
de Tall stiggt, dat hett Aart!
Düt Johr kriegt wi en Halloween,
dat würklich grulich warrt!
Man Hauptsaak is, nüms maakt "Hatschi!" nich —
so denkt wi all: Wi kriegt dat nienich!

— Warrt foortsett! —