Coronasong IV: Drütte Well un alternative Fakten

vun Marlou Lessing

Dat Impen kümmt nich recht in Gang,
is nich noog Stoff to Hand.
Oh, dat Bestelln, dat duer so lang!
Wieldess is de Mutant
so munter toweeg as noch nienich!
Wi kriggt dat doch opletzt wohrschienlich...

Siet Sommer löppt't totaal verkehrt,
de Impfmurks is de Topp.
Dor hett sik Düütschland ganz blameert,
du faatst di bloots an'n Kopp...
Dat Organiseern weer noch nienich
und Starkde — bloots Bürokratie, nich?

De Impkurv, de stiggt lineaar,
de Süük mit Exponent...
De kriggt uns faten, dat is klaar.
Wi hebbt dat Speel verpennt!
Uns Utreden sünd fadenschienig...
Opletzt blifft: Glöövt hebbt wi dat nienich!

Bild Gesa Tams-Koll. Klick op to'n Vergröttern!

Nu hett dat Virus ut Wuhan
muteert in mennig Land —
Hollstopp! Momang! Un holl mal an!
Wuhan? Is dat bekannt?
Ja höört ji denn alle den Schrie nich
vun China her: "So weer dat nienich!"

De doren Baasen höört nich geern,
dat dat vun China stammt.
Wokeen dat seggt, wat nehg, wat feern,
de warrt verfolgt, verdammt
un kniept denn den Steert in! — Wo pienlich!
Hebbt wi denn hier Demokratie nich?!

Villicht — man leider hett de Hand
vun China uns al packt
an unse Kehl, as mennig Land.
Nu warrt hier bloots noch snackt
un dacht: Wat is China beliebig?
— Nu kuscht man schöön un weest nich kiebig!

De drütte Well, de nimmt uns mit
un rullt uns dör de Tied.
To'n Glück sünd bald de Olen schütt,
dat maakt en Ünnerschied!
De Weerschap is all dat nich dienlich —
Höllt se dat ut? Is nich wohrschienlich!

Wi buut dat Land bald wedder op
un beter, bün ik wiss,
wenn düsse lange Dauerloop
mal endlich wunnen is!
Dat geiht leider dör Hexerie nich!
Behollt Gedüür un kriegt dat nienich!

— Warrt foortsett! —