Öllere Daagbook-Notizen vun Marlou

30.12.03 .Ex un Hopp mit de Wiehnachtstied

Nanu, wat is denn dat? Woneem is denn de ganze Wiehnachtsdeko bleven, de dor bi den Nahver in Hamborg-Horn welig an't Blinken weer? Na, Wiehnachtsdeko weer't je eentlich nich; Las Vegas-Blinkterror weer't. Un anfungen hett dat noch vör'n eersten Advent. In alle Finster, vun Lichtkeden infaat, hungen Signaal-Blinksteerns, de in afwesseln poppige Klöören oplüchen dään, dat du schier mall woorst. De hele Balkonümrandung ut Lichtslangen strahl, blink un lüch in Pink, Giftgröön un Witt, un en levensgrote Wiehnachtsmann klabaster an't Gelänner. He is weg; de Lichterterror ok; woso bün ik benaut?

Op uns Plattpartu-Flack "De Welt un Gott" is jüst en Kommentaar "Ex un Hopp" rutkamen. Dor is ok vun de Wiehnachtstied de Reed. Wi hebbt överleggt: De Bidrag is jümmers aktuell; kannst den nich ok later bringen? Fazit: Nee, kannst nich. Wiehnachtstied is laatstens mit Silvester vörbi. Dat lett, as weer dat Christkind, jüst boren, al wedder musendoot.

Vörbi is sachs ok de Tied vun Besinnlichkeit, wat eentlich nix anners mehr heten deit as Gemütlichkeit: Koffie, Kekse, Kerzen. Vun Inkehr un Besonnenheit is ja doch nix in de "Besinnlichkeit", un en Paster schall mal seggt hebben: "In'n Advent hetz ik vun een Besinnlichkeit na de neegste." Man nu hett he sin Roh. Wiehnachten is vörbi; nu noch gau Silvester, en Barg Müll, un ratz batz Ende. Leevkaken noch in't Supermarkt-Regaal? Pries reduzeern, rut dormit!

Fröher weer dat je woll anners. Dor füng de Wiehnachtsfreid laat an, höll avers lang vör. Man is dat vundaag överhaupt noch Wiehnachtsfreid? Nich bloots mehr Vörfreid? Al an Wiehnachten is Wiehnachten so good as vörbi. In't niege Johr is nix mehr dorvun to redden.

Wat is denn slecht an de Vörfreid? — Hm. Slecht nich. Avers worüm will de Freid na de Vörfreid nich opkamen? Sünd wi villicht mit dat Ereignis sülven nich tofreden — sünd wi enttäuscht? Orr hebbt wi dat bloots verlehrt, in de Vergahnheit to sehn, dat wi jümmers in de Tokumft kieken mööt? Beansprookt de Tokumft us so heel un deel?

Ik weet nich. Man ik much geern üm Niejohr in en Land reisen, 'neem de orthodoxe Kark tohuus is, Russland t.B., un dor mit de Minschen nochmaal Wiehnachten fiern. Dor is Wiehnachten nämli an'n 6.1. Nu is dor noch Vörwiehnacht.

22.12.03 .Befehl vör Geweten?

Nu hebbt wedder 13 israeelsche Elitesuldaten ehrn Deenst verweigert. In "Spegel online" leest wi, wat se schreven hebbt:

"Wir können nicht mehr beiseite stehen. Heute sagen wir: Wir werden nicht helfen, Millionen Palästinensern ihre Menschenrechte vorzuenthalten. Wir werden nicht Schutzwall für die Siedlungskampagne sein", hieß es in dem Schreiben der Elitesoldaten. "Wir werden unsere Moral nicht durch Aufgaben einer Besatzungsarmee verunstalten lassen. Diese Grenze wird nicht mehr überschritten."

Un wieder leest wi:

Erste Reaktionen von israelischen Politikern waren am Sonntag allesamt negativ. In einem eilig auf den Weg gebrachten Reaktionsschreiben an andere Reservisten der Spezialeinheit wurden diese davor gewarnt, sich dem Protest anzuschließen.

In de Prozessen gegen NS-Verbrekers hebbt sik de mehrsten dormit ruttoreden versöökt, "se harrn ja doch bloots Befehlen utföhrt, bloots gehorcht". In Diskuschoonen mit Tiedtügen, ok hüüt noch, höörst dat faken. Mag wohr ween, mag ok nich. Man een Saak, meen ik, steiht fast: Wenn in de NS-Tied mehr düütsche Suldaten, mehr düütsche SS-Lü, mehr Düütsche överhaupt seggt harrn: "Wir werden nicht helfen, Millionen Juden ihre Menschenrechte vorzuenthalten. Wir werden unsere Moral nicht durch Aufgaben einer Besatzungsarmee verunstalten lassen. Diese Grenze wird nicht mehr überschritten" — denn, ja denn harrn de Nazis ganz schön oolt utsehn. Wenn düsse Mentalität "Geweten vör Befehl" sik dörsett harr, harr dat de europääschen Juden dat Leven redd. Se hett sik nich dörsett. Geev nich veel Geweten. De europääschen Juden woorn ermordt. Israeel woor gründt as Toflucht för alle Juden, de vun gewetenlose Befehlsempfängers bedrauht weern.

Nu kümmt desülvige Mentalität — "Geweten vör Befehl" — in de israeelsche Armee vörtüüg. Dör wöör een doch denken, dat de jungen Suldaten begeistert vermünnert warrn wöörn, nich? Avers nix dorvun. Ünner Druck sett warrt se. Verweigerer ünner de Nazis harr dat sachs noch leger drapen — man ok hüüt warrt dat Geweten nich ehrt, bloots Gehorsam feddert. Hett denn nüms wat lehrt?

P.S. Mutt ik dat nu noch seggen? Düt is keen Israeel-Nazidüütschland-Glieksetten. Ja, en Vergliek is dat. Avers keen Glieksetten. Nix kümmt den mörderischen Holocaust gliek; düsse Erkenntnis is avers dör Verglieken tostann kamen, dör Fragen, Gegenöverstelln un Meten. Wi köönt je woll Methode un Ergeevnis utnanner hollen. Verglieken is dat Verfahren; op dat Ergeevnis vun'n Vergliek kümmt dat an. Alle Adjektive, alle Egenschapen also — "good", "leeg", ok "unvergleichlich" — kaamt dör Verglieken tostann. Wenn een t.B. Hitler mit nüms verglieken dröff, kannst ok nich faststelln, dat he böösaardig weer. Allens, wat för sik alleen steiht, hett keen Egenschapen. Eerst wenn een Hitler mit annere vergliekt — mit Göring, mit Bush, mit mi, mit Schröder, mit Jesus, eenfach mit allens —, denn stellt sik rut, wa böösaardig he würklich weer. Wenn wi nich vergliekt, weet wi nix. Bloots so kannst to de Erkenntnis kamen, dat de Holocaust slimmer (dat's de Vergliek!) weer as allens. — Verglieken is en grunnleggen Verfahren vun't Erkennen un mutt mööglich ween, wenn Denken mööglich ween schall. — So veel to de political correctness.

20.12.03 .De Welt — en seker Steed

Libyen will nu opmaal nix mehr vun Massenvernichtungswaffen weten; se warrt keen mehr entwickeln un warrt allens, wat se hebbt, vernichten. Na, bi Gaddafi weetst ja ok nienich. Man alle sünd froh, un Bush un Blair laavt Gaddafi un seggt, "de Welt warrt dordör to en sekerer Steed". Dat's wohr. Man wohr is ok, dat de Welt noch veel sekerer wöör, wenn de USA mal mit dat Entwickeln vun niege Massenvernichtungswaffen ophöörn un ehr Arsenal vernichten wöörn. (Un dor geev dat bannig veel to vernichten.) Nich, wieldat se ehr insetten wöörn (liekers — bi Bush weetst ja ok nienich), man alleen vunwegen de Unsummen, de dor anduern bi to'n Düwel gaht. De Unsummen weern nämli enorm nödig, de Welt würklich to en sekerer Steed to maken. Wat seggt de Johrsbericht vun de Weltsundheitsorganisaschoon?: Aids war im Jahr 2002 mit großem Abstand weltweit die Haupttodesursache der Menschen von 15 bis 59 Jahren. Nach neuesten Berechnungen starben im Jahr 2002 knapp 2,3 Millionen Menschen dieser Altersgruppe an Aids. (Natolesen op wissenschaft-online.de) — 2,3 Millioonen! Junge Lüüd! Dat schafft keen Gaddafi. — Ehr kunnst helpen, dör Opklaarn, dör Kondomen, dör Medikamenten — dör Geld even. Denn wöör de Welt en sekerer Steed. — Elkeen Dag verhungert 20.000 Kinner. Ok hüüt, ok an Hilligavend, ok an'n Eersten Wiehnachtsdag — jümmers. Wat hebbt de dorvun, dat Gaddafi sin Rüstungsprogrammen opgifft? Slöppt de Welt würklich ruhiger, wieldat Saddam nich mehr in sin Eerlock sitt, man in en Hoochsekerheitstrakt? Orr is dat bloots en Halluzinaschoon vun wenige Mächtige?

Woans müss de Welt utsehn, dat se för de Aidswaisen un Hungernen, för düsse Swacken en seker Steed weer — nich för Bush un Blair un Putin, man för de Swacken? Dorto köönt wi wat bidragen; ja, wi ok, Se un ik; man annere ok, un veel mehr noch as wi. Wi wüllt keen Hüchelee mehr höörn. Wenn ji en Welt wüllt, de en seker Steed is, denn doot dorto, wat ji köönt — elkeen, Se un ik un Bush un Blair.

14.12.03 .Saddam in't Lock

Ut en Eerlock hebbt se em rutbuddelt, den Herrscher mit de Dutzen vun Paläste. Nix harr he dor mehr as man bloots poor Geldbünnel un poor Scheetprügel. Geld un Waffen. Waffen un Geld. Süss nix. De Quintessenz.

Nu warrt he, is to höpen, dat kriegen, wat he noch nienich kennt hett: en fairen Prozess. Fair, dat heet: He schall dat Urdeel kriegen, wat he verdeent hett; man as en ziviles Urdeel, nich as Rache un Lynchmoord. Dat warrt nieg för em ween; ik frei mi op. Frei mi ok, dat de Minschen in Irak seht, so geiht een in'n Rechtsstaat sogor mit Saddam üm. En fairen Prozess warrt en würklichen Sieg över Saddam ween. — Worüm schallt se em denn nich na Guantánamo versleppen un ahn Recht un Gesetz verswinnen laten? So wöör he dat doch ok mit sin Fienden maken? — Ja. Dat sünd jüst de Saddam-Methoden. Denn harr ja Saddam den Krieg wunnen. Man nee, in Kuba sitt al noog Entrechtete. Den Triumph, dat sin Gegner to sin egen Methoden griept, den schall Saddam nich hebben. — Villicht lehrt he ja noch wat op sin ole Daag. Un annere ok.

12.12.03 .De Beute warrt opdeelt!

So veel Satire geev't noch nienich. Keen Theaterstück kunn schöner ween! De USA wüllt bi'n Wedderopbu (wat dat woll ween schall?) vun'n Irak keenen Opdrag an Ünnernehmen ut Kriegsgegner-Länner geven. Motto: Wokeen nix kaputt maakt hett, dröff ok nix wedder heilmaken! Betahlen mööt dat de US-Stüürbetahlers, denn natüürlicherwies warrt dat nu dürer — de Konkurrenz fehlt, de US-Ünnernehmen warrt afsahnen. — De Irakers (de Beute sülven also) hebbt dorbi natüürlich gor nix to seggen. Ruhe dor achtern op de billigen Plätze! — Un lude Protesten : "Liekes Recht för alle!" kaamt ut Düütschland un Frankriek, jüst de Länner, de sik bi't Breken vun'n EU-Stabilitätspakt mehr Rechten rutnehmt, as lütte Länner jemalen harrn. — De Klopperie üm de Beute is losgahn. To'n Swögen schöön!

Un de poor povern Suldaten vun Spanien, England, Italien, Rumänien, Polen usw., de sik dor ok noch in'n Irak rümmerdrückt, weet nu endlich, för wat se ehrn Moors henhollt: för de heimische Weerschap! Dormit de wat afkriggt vun de Beute! Dat motiveert ehr doch wiss mächtig. So en Aart modernes Minschenopper to ween, de Götter in't Witte Huus gnädig to stimmen, dat de (Geld-)Regen kümmt — is dat nich graadto mystisch un erhebend? Dor starvt een doch geern för.

3.12.03 .Wassdom in'n Winter

Russland — höört wi nu — Russland warrt dat Klimaschutzprotokoll vun Kyoto nich ratifizeern, "wieldat dat dat Weerschapswassdom behinnert". Ha! De Lü denkt nich mal vun de Wand bet na de Tapete. Wa de sik noch ümmerkieken warrt, wenn dat Klima eerst dat Wassdom behinnert! Na, avers denn mööt se ja noch mehr verfüern, de Wassdomsverlusten dör Unwederkatastrophen wedder uttoglieken — un dat geiht denn so wieder...

Nich dat Kyoto würklich wat hölpen kunn. Dor müss mehr passeern. Avers noch hebbt wi ja dat leve Wassdom, un Schröder verkloppt an de Chinesen so veel Autos, as man rinpasst — rinpasst in China natüürlich, nich in't Klima; dor passt gor keen mehr rin. Man de Chinesen fohrt ja alle op VW af. "China wird sehr wichtig sein für die Zukunft unseres Unternehmens", töönt en VW-Minsch. — Ji warrt dat denn ja sehn. Wenn de Chinesen eerst alle Auto fohrt, gifft dat ok bi't Klima wedder schöön Wassdom...

Blangbi: Woso fohrt Schröder eentlich so geern na China? Ik meen: Wieldat dor nüms veel grötter is as he. Alle hebbt se sin Statuur. Dor höpt he nämli vergeevs op Wassdom.

28.11.03 .Höhner achter Gitter?!

Nu hebbt de industriellen Legebatterie- un Eierbaroons rutfunnen, dat Käfighöhner länger leevt un sunder sünd as frielopen Höhner. (Wenn een denn hoochneurotische, totaal nakelte Höhner noch "gesund" nöömen kann.) Käfige sünd also "good" för Höhner, seggt se. Dor segg ik doch bloots, Na und? Un wenn se in'n Käfig teihnmaal länger leevt: Höhner höört na buten. — Dorop, dat se leevt un sund sünd, kümmt dat ok in Wohrheit nüms an; wenn se keen Eier leggen doot, dreiht wi jüm sowiso den Hals üm. Dat Wohl un lange Leven vun't Hohn hett nüms vun de in'n Sinn, de nu de Käfighaltung as "sund" priest.

Man wenn wi de Höhner per Gesetz frie lopen laat, denn warrt de Holländers un Polen liekers billige Eier in Legebatterien produzeern un us dormit indecken! Dor köönt wi dat doch ok sülven doon! — Na und? Laat ehr doch! Legebatterien sünd Schiet, un Schiet maakt wi nich, basta. Un wenn alle Welt dat maakt. De Utreed, "wenn ich's nicht getan hätte, hätte es doch ein anderer getan!" hebbt wi al faken noog vun KZ-Wärters un Naziverbrekers höört. Dat is gor keen Argument, Gresigkeiten un Unrecht to doon; un de sik so rutreedt, hebbt mehrst bloots ehrn egen Vördeel in'n Sinn hatt. De Wohrheit is so eenfach — muttst bloots eenmal henkieken, denn weetst dat: Legebatterien sünd en Unrecht an de Kreatuur un höört afschafft. Basta.

5.11.03 .political correctness

Dor erwisch ik mi doch vundaag dorbi, dat ik mi fraag, wat ik woll op uns Plattpartu-Siet wat to den Hohmann sin snaaksche Reed un to Antisemitismus seggen schall — kann — dröff. Dröff ik dat? Warr ik dat ok richtig maken? Nich, dat ik wat Böses seggen wull — man is dat nich gefährlich?

Na, as ik wies woor, dat ik al bi de Sülvstzensuur landt bün, woor mi slecht — dor müss ik dat fix doon un wat schrieven. Avers nich to Antisemitismus un nich to Hohmann. Man to de political correctness.

political correctness is, wenn't bloots op ankümmt, wat du seggst, nich, wat du denkst. An Hohmann is bloots sin Reden schaneerlich. Harr he sin Muul hollen, weer't good. Antisemit ween dröff he, avers nich över reden. — Lü in de Öffentlichkeit mööt ehr verbales Soll erfülln, mööt verbale Afteken vör sik herdreggen as de Aids-Slööf an't Revers; se danzt in en streng intuuntes Woort-Areaal. Anners dröfft se nix seggen. Allens, wat se seggt, warrt dordör to Phrasen. Man dat echte Minenfeld fangt an, wenn in en Satz dat Woort "Juden" vörkümmt. Oha, wat för Wöör dröff ik nu noch seggen un welk nich? Is en Eierdanz, un wenn du op en Mine peddst, is din Karriere toenn. Man — dat is ok allens. Wieder behelligt di nüms. Wokeen warrt Hohmann nu privaat besöken un seggen "Jung, laat us mal snacken. Woans kümmst du to din verquere Ansichten? Segg mi, wat du denkst, ik warr versöken, di to övertügen." Nee, dat Denken is egaal. Bloots dat Reden is zenseert. Een Schiet!

Gefährlich is dat ok. Meddewiel geiht de correctness de Lü so op de Nerven, dat dat chic warrt, gegen de Regeln antogahn un maal wat Verbadenes to seggen. Regelnbreken maakt Spaaß. Graad junge Lü verwesselt dat mit Frieheit. Se verwesselt Antisemitismus wohraftig mit Frieheit, mit Moot! Wa gefährlich is dat — süht dat nüms?! Un: sünd dat Nazis? "Ich wollte bloß mal euch Gutmenschen ärgern", sä mi so en Jungkierl, de en "Judenwitz" vertellt harr.

Is dat etwa nieg? Nee. Man leeg is, dat dat so en Saak as den Antisemitismus drepen kann. Düsse hüchelte korrekte Fassade is noch leger as apen Striet. Mit Phrasen un Dwang kannst nüms övertügen. Man övertügen mööt wi de Lü, de noch antisemitisch denkt. Wi bruukt en friee Diskuschoon över Inhollen, nich över de korrekte Foorm.

Denn op dat Denken kümmt dat doch an.

30.10.03 .Se sünd rut!

De russischen Barglüüd, de in'n Schacht inslaten weern, sünd ruthaalt! Wat en verlichtert Opaten is dat överall. Ok wi atent op, nich? — Worüm eentlich? Ölben Minschen sünd redd; dat kümmt doch faken vör, nich? Un veel mehr Minschen op de Welt warrt nich redd; dat kümmt noch veel fakener vör, nich?

Gifft Pedanten, de seggt nu: För dat Geld, wat de Reddung kost hett, kannst Dusende hungern Kinner in de drütte Welt redden! — Ja, avers Leven is jümmers dat glieke Leven. Süss wöörn wi us hier in de eerste Welt gor nich mehr to'n Dokter truun; wat en läppische Behannlung hier kost, kunn annerswo Dutzen Minschen vör'n Dood bewohren! Man so denkt wi nich; Leven kannst nich in Geld ümreken. Wenn du een bedrauhtes Leven vör din Nees hest, muttst dat redden un keen Rekenexempeln maken. Un dat is recht so. Leven is jümmers dat glieke Leven.

Man noch mehr: De Dood is nich jümmers de glieke Dood. Gifft Doden, de lööst in us en besünnere Panik ut, ehr doch noch aftowennen. Un dat sünd Doden ahn Luft un Licht. As in'n Schacht. Orr as in dat Wrack vun de Kursk — dat U-Boot, dat in'n August 2000 sunken is. Wenn wi — wi Minschen överall in de Welt — us vörstellt, dat dor welk sitt in en eng düüster Lock, ehr Luft knapp warrt un ehr Sekunnen verrinnt, dat dreiht us dat Hart in'n Lief ümmer; denn kennt wi nix mehr; denn gaht wi mit den Schrie "Haalt jüm rut!" jedes Risiko in, uns Mitminschen frie to kriegen. Un wenn se ok starven müsst — se schallt an't Licht! Dorför riskeert anner Barglüüd ehr Leven; bi dat ööstrieksche Gruvenunglück vör poor Johr sünd ölben Mann doodbleven, wieldat se een redden wulln. Se kunnen nich anners. Se kunnen nich stillhollen bi den Gedanken an so en Dood. Dat is een vun de besten Wiesen vun'n Minschen, de dor vörtüüg kümmt.

För en kreevtkranken orr hungern Minschen verrinnt de Sekunnen liekso — avers he kann an Luft un Licht starven! Dood is even nich gliek Dood. — Man good, dat wi nich entscheiden müsst; man good, dat wi jümmers dat Leven redden dröfft, wat vör uns Nees bedrauht is. Man good, dat se de Barglüüd ruthaalt hebbt. Un lebennig noch dorto.

12.10.03.Leevkakenharten

En Tüüt Leevkakenharten redd mi güstern Nacht, as ik laat nachtens na Hus keem, mi süük föhl un to mööd, noch wat Richtiges to eten. Wa week un saftig sünd Leevkakenharten doch noch, ok wenn se al 1 Week lang in'n Rucksack rümmersleppt un terdrückt sünd! Ik meen, se weern dat mi toleev. Jüst wieldat ik düsse Fründlichkeit graad bruken dä. — Wa veel Fründlichkeit dat doch in de Welt gifft! Dat mehrste dorvun is noch gor nich mal entdeckt. Woso forscht nüms na de groten unentdeckten Reserven an Fründlichkeit in de Welt? Woso bohrt se na Ööl un karteert de Gene? Villicht liggt deep in de Eer, 'neem se na Ööl orr Diamanten buddelt, en reesenhaftig Resevoir an Fründlichkeit, dat bloots an't Daglicht kamen will. Orr villicht liggt dor en groot Vörraat an — Leevkakenharten.

9.10.03.Arnie

Nu is "Arnie" Schwarzenegger Gouvernöör vun Kalifornien. Dat is natüürlich hoochgradig lächerlich, avers ok beten unheimlich, nich? Nee, unheimlich is nich Arnie (he is ja nu so harmloos as man wat!), man de Aart, woans de Minschen em wählt hebbt. Heel ut'n Buuk, gor nich eerst na wat fragen, bloots na Geföhl. Mit ehr Geföhl hebbt se ok Bush wählt. — Un wenn se mit ehrn Verstand wählt harrn? Wokeen harrn se denn wählt? — Hm. Dor weer nüms. — Dor is nüms!!

Nüms mehr, de den Verstand vun Wählers anspreken deit. Gifft keen Intress an politische Inhollen. De Wähler nehmt de Politik so wenig eernst as annersrüm. Gegensiedige Nichtachtung. Allens is bloots en groten Witz. De beste Show warrt wählt. Ok bi us. Schröder. Orr villicht doch Gottschalk? — Wat dorbi rutkümmt, is Glückssaak. Dat is unheimlich. De Minschen sünd unheimlich.

2.10.03.Meinungs-Frieheit & Co.

De Reformen (hach ja!) mööt dör'n Bundestag. In "dat halve Johr bet Wiehnachten", sä Schröder. (Upps, woneem hett de Mann sin Klenner?) Un de Spitznees Müntefering hett bannig to doon, de poor SPD-Afgeordneten, de lever nich tostimmen wüllt, op Partei-Linie to bringen. De Mehrheit, seggt he, is för de Reformen, dat mööt de Dissidenten respekteern! Se mööt ok tostimmen!

Momang maal. Bi'n Afstimmen seggt elkeen sin/ehr Menen. De Mehrheit bestimmt denn, wat passeert. De Mehrheit bestimmt avers nich, wat de annern to menen hebbt! Hannlungen warrt dör Mehrheit bestimmt, Ansichten nich. Dat is de Meinungs-Frieheit. Man dat lett, as harr de SPD dat nieg defineert: Meinungs-Frieheit is, wenn de Afgeordneten frie un leddig vun jede Meinung sünd — un bloots na Befehl hannelt.

Schröder hett ja nu sin "politisches Schicksaal" mit de Reformen verknüppt. Dor fraag ik mi doch: Hett de Mann överhaupt en politisches Schicksaal? Ik heff jümmers dacht, he weer dör'n Bedreevsunfall in't Amt kamen. Sin Schicksaal weer villicht ganz wat anners. Footballspeler. Orr Huusmann un Vadder. Man he dörkrüüzt sin Schicksaal un warrt Politiker. Un dat Schicksaal, dat em dor gor ni hebben wull, hett he nu noch mit de Reformen verknüppt. Dat is doch brutaal un unrecht to dat wehrlose Schicksaal, nich?

Man — Schröder harr doch düt Schicksaal al to Anfang mal verknüppt. Mit den Afbuu vun de Arbeitslosigkeit. "Doran will ik mi meten laten", sä he dormalen. Denn meet wi em doch! Man nee, fix maakt he den een Knütt op un verknüppt dat arme Schicksaal nieg — mit de Reformen. Denn brukt he nich mehr trüchtreden. Un tweemaal kann he ja nich trüchtreden, nich?

Plietsch, de Jung. Erinnert mi bannig an sin Amtsvörgänger. De keem ja ok eenfach nich rut ut dat Amt. Man ik meen, Schröder schull liekers al mal för sin Rohstand vörsorgen. He mutt wiss noch a) en Boom planten (geiht gau), b) en Kind tügen (junge Fru hett he ja), c) en Book schrieven. Nee, nich sin Kanzler-Memoiren. Schröder schrifft en Sachbook. He schrifft dat dreebändige Werk

"Die Currywurst im Wandel der Weltkulturen — Aus der Sicht eines Staatsmanns"

Wustbrader mit Schrieverspassion — dorför hett em dat Schicksaal bestimmt!

27.9.03.... Nix to lachen?

Hach ja, maakt ok keen Spaaß mehr, in't Bladd to kieken. Düütschland warrt dat Klimaschutzprotokoll vun Tokio nich inhollen (nich mal Düütschland!); de Irak verwannelt sik systemaatsch in en Slachthuus; un de weltwiede Drogenkonsum hett bannig tonahmen. Klaar — düsse Realität köönt de Lü ahn Drogen nich mehr verknusen. Gifft dat denn nix mehr to lachen op de Welt? Ha, gifft dat! Dat gifft ja de düütsche Autobahnmaut. Kannst di reinweg ünnern Disch lachen! "Toll collect"! So heet dat Ünnernehmen, dat Daimler un Telekom — de Crème de la Crème vun de düütsche Industrie — tosamen för düsse Bruchlandung opmaakt hebbt. "Toll collect"! De maakt doch wohraftig de armen Kabarettisten ok noch arbeitslos, nich?

Wat min Nahver is, de is Fernfahrer, un he finnt dat gor nich so to'n Lachen. Woans kann't ween, dat 2/3 vun de Reedschapen kaputt sünd!? Na, dor kann ik em opkläärn. 2/3 sünd kaputt, wieldat bi "Toll collect" bloots 2/3 vun de Crème vun de düütsche Industrie dorbi sünd. Daimler un Telekom — man Siemens fehlt. Dorüm funscheneert 1/3 noch. Weer Siemens dorbi, denn weern 100% vun de Reedschapen kaputt!

Op jeden Fall hett dat wat Trööstliches. De friee Marktweerschap — de Roofdeerten-Kapitalismus — de is gor nich so leeg. Kiekt ji juuch dat doch an. Nix funscheneert, man de Firma passeert nix. Mit so en Marktweerschap kannst doch leven, nich? — Man schaad, dat dat noch nich bi alle Ünnernehmen ankamen is, wa komodig dat in de Marktweerschap togeiht. Wenn ik dor an de Meyer-Werft in Papenborg denk, also nee! De hebbt dat jümmers hild, un allens ahn Grund. Wenn se een vun ehr Krüüzfohrtscheep nich nipp op'n Punkt to rechte Tied fardig buut hebbt, seggt se, gifft dat solk Konvenschonaalstrafen, dat na 5 Daag de Werft pleite is. Tüünkraam! De kennt sik nich ut! Se kunnen sik man Tied laten. "Toll collect" kann bummeln, solang se wüllt — de gaht nich pleite. De nich!

Ja, ik weet; dat Komodige, dat is nich de Kapitalismus sülvst, dat is "Toll collect" ehr Verdrag. Mutt ja en Wunnerwark vun Verdrag ween, dat nüms dat to sehn kriegen dröff. Dat mutt een sik mal vörstelln: dat Volk — wi — de Souverän, de Baas in'n Staat — kriggt nich den Verdrag to sehn, den uns betahlte Angestellte — de Verkehrsminister — mit "Toll collect" afslaten hett — op uns Kosten, denn wi mööt dat betahlen. So en Angestellten mutt een eentlich künnigen, nich?

Man ik vertell juuch nu endlich, wat dat mit düssen Verdrag op sik hett. En Mautsystem warrt dat nienich geven, denn "Toll collect" bruukt gor nix to doon. Geld kriggt se dochen. Dat steiht in den Verdrag. De Verdrag is nämli en Industrie-Subvenschoon. Wenn de Subvenschoonen streken warrn schallt, mutt de Staat dat Geld op anner Wies de Grootindustrie tostecken. — Solk Verdrääg warrt't in Tokumst faken geven: Totaal sinnlose Opdrääg, de nienich erfüllt un liekers betahlt warrt. — Warrt wi denn jümmers noch över lachen? Lacht wi man nu, so lang wi noch köönt.

25.9.03.... So fangt Märken an

Avers nu: Hoot af! 27 israeelsche Piloten wüllt nich mehr mitdoon bi Raketenangriepen, de ok Zivilisten drepen un doodmaken köönt. Jungedi, dat gifft noch intelligentes Leven in de Regioon! Dat is doch de Dialoog, de so lang verlaren weer. Nu is he mööglich. Wenn de anner Siet antert. Laat nu 27 Hamas-Lü vörtreden un seggen: "Ja. Uns geiht dat ok gegen dat Geweten, Kinner mit Bomben lostoschicken mit dat eenzige Teel, Zivillüüd hentomaken. Wi wüllt ok nich mehr." (Bi jüm is de Dood vun zivile Lü ja sogoor Afsicht, nich Nevenwirkung...) Man laat dat man passeern — dat dor welk op ehr Geweten höört. Denn gifft een Woort vun Vernunft un Versöhnung dat anner. De Freed warrt in Nullkommanix utbreken. De Welt kümmt to Verstand!

Avers nee. Wi sünd ja in Israeel. 10000:1, dat as neegst wedder en Bombe hoochgeiht.