Öllere Daagbook-Notizen vun Marlou


15.4.04 .En Job för Se, Herr Berlusconi!

Nu is dat so wiet. Al Qaida beed de europääschen Staaten en gegensiedigen Waffenstillstand an. (Angeevlich is dat Bin Laden sülvst, man dat kann en Fälschung ween. Al Qaida is't op jeden Fall.) En Afkamen mit Al Qaida. Verhanneln mit Al Qaida. — De europääschen Staaten hebbt dat rundweg afslaan. Ik meeen, dat harrn se nich doon schullt. So en Angebott sleit een nich af, dat ignoreert een! Afslaan is Antern; för en ziviliseerten europääschen Staat gifft dat dor avers nix to antern. Al Qaida as Gespreekspartner gifft dat för us överhaupt nich!!!

Dordör, dat Al Qaida us nu erpressen will, warrt de Irakkrieg avers nich richtiger. Wat Bush nich rechtfardigen kann, kann Al Qaida dör ehr Spiet ok nich rechtfardigen. Meddewiel warrt de eersten Geiseln ümbröcht — Italieners. De Italieners weern to 90% gegen den Krieg! — Herr Berlusconi, hier is en Job för Se. Se hebbt dat vun en lütten Gauner na'n groten Gauner schafft; Se alleen hebbt Ehr Land in düssen Krieg rinreten. Noch vör dree Daag hebbt Se op'n Stippvisiet — natüürlich ganz geheim, ut Bammel vör Anslääg — de italieenschen Truppen besöökt un mit ehr rümmerkaspert un feixt un Witze reten. Nu is dat vörbi, nu kümmt Ehr Job: Gaht Se hen un beed Se sik as Austauschgeisel an för de dree Italieners, de noch in Geiselhaft sitt. Dat is nu dat eenzige, wat wi noch vun Se sehn wüllt. Ehr dösiges Grienen un billige Witze wüllt wi nienich mehr sehn. Un wenn Se an glöven mööt? — Ahn Se kümmt Italien, kümmt de Welt good trecht. De Männer, de noch in Geiselhaft sitt, hebbt Familien, hebbt Mudders.


13.4.04 .Ungedeckte Blankoschecks

Soso, Scharon besöökt de USA (glieks na Mubarak, tosamendrepen dröfft de twee dor ja nich), un de US-Regeern will em, so höört wi, en offiziellen schriftlichen Verlööv geven, dat Israeel stückerwat vun sin Siedlungen in't Westjordanland dor stahn laten dröff. — Ja un? Wat in China 'n Sack Ries ümkippt orr de USA so'n Zedel schreevt, wat hett dat mit de Siedlungsrechte in't Westjordanland to doon? Gellt dor US-Recht? Is dat Völkerrecht dör US-Recht ersett? Orr verföögt de US-Regeern vun nu an eenfach över anner Länner ehr Territorium?

Leve Präsident Bush, wenn dat so is, denn heff ik ok en Wunsch. Ik krigg jümmers so Straafzedels vun de Polizei, wenn ik in Hamborg min Auto jichenswo stahn laat, 'neem keen Parkplatz is. Köönt Se mi nich en Zedel schrieven, dat ik dat dröff? Villicht ok glieks mit op schrieven, dat ik ok annersrümmer dör de Einbahnstraaten fohrn dröff? Dat weer mennigmaal nämli dull praktisch. Villicht köönt Se mi ja ok verlöven, dat ik mi vun min Nahver sin Grundstück nehmen dröff, wat ik will. Orr vun sin Bankkonto. Villicht kunnen Se ja ok solk Aflass-Zedels utstelln as dunntomaals Tetzel, dat de leve Gott een nix mehr doon kann, wenn een ok nix as Schiet buut hett. Wenn ik dormit ankaam un de leve Gott dor Ehr Ünnerschrift "US-Regeern, President Bush" op leest, denn kriggt he wiss düchtig en Schreck. Ja, so'n Blankoscheck vun de US-Regeern, de hölpt in alle Levenslagen.


11.4.04 .De Töverlehrlinge

"Besen, Besen, seid's gewesen!" schriegt de Töverlehrling in de Ballaad, man de vertöverte Bessen will nich, he schütt Ammer üm Ammer Water ut, 'neem dat tovör gor keen Water geev; de Welt kunn reinweg an versupen. Man denn kümmt ja de ole Hexenmeester na Hus un sorgt för Roh. — Dat is en gode Ballaad, een lehrt ok wat ut. De USA wullen mal so'n beten tövern, äh, Terroristen jagen, un twoors in'n Irak, 'neem dat toeerst gor keen Terroristen geev; nu gifft dat avers opmaal welk, un mehr un mehr un mehr... so veel wullen's gor ni hebben. Bloots 'n poor, dat dat för en Alibi langen dä. Avers nu "...die Not ist groß! Die ich rief, die Geister, werd ich nun nicht mehr los!" — un woans güng noch de Töversprook to'n Ophöörn? — Un worüm gifft dat in de Realität nich eenfach so'n Knoop "Rückgängig" as in de mehrsten Computerprogramme?!

De Amis sünd wohraftig in en verdüvelte Laag. Wenn se vör düsse moordlüsternen Verrückten vun den Hetz-Ayatollah den Steert inkniept un afhaugt, is dat dat Enn. Doot se dat avers nich, denn mööt se jichenswenn — bald — en MG op en Menge vun Zivilisten hollen un scheten. Villicht op ophisste Halvstarke un Kinner... Se mööt över Lieken gahn. Un dat is ok dat Enn. För de islamistischen Irren is dat ganz normaal, avers en westliche Armee kann dat vundaag so eenfach un apen nich mehr maken. De Welt schriegt op, un de Suldaten sülven maakt dat ok nich mit. För de USA gellt en anner Moral as för de "Mahdi-Armee" vun den dörknallten Ayatollah (he is gor keen, he deit bloots so). Dat is ehr egen Ansprook. Dat Gode (dat wüllt de USA ja ween) stried ja gegen dat Böse — för Frieheit un Humanität. Wenn "dat Gode" jüst so brutaal vörgeiht as dat Lege, is düsse Kampf to Enn, un dat Gode hett verlaren. — Se köönt bloots verleeren, so orr so.

Man nu is dat ja Tied; nu stappt wiss bald de ole wiese Hexenmeester ut de Kulissen un bringt den Kraam in't Loot. Nich? — Hexenmeester? Hallo...? Wo büst du...?


1.4.04 ."Du muttst 'n Swien ween..."

En Apriljux is dat ja nu leider nich, wat wi vun den Mannesmann-Prozess höört: Friespröök staht bevör. De Richtersch kunn keen Rechtsverstötten finnen. Keen "Untreue" in'n juristischen Sinn. De Schubberjack Esser stellt sik vör de Mikrofoons un laavt arrogant de düütsche Justiz. Dat is bitter. Man noch bitterer is de Lehr, de de mehrsten Minschen ut düsse Vörgäng trecken warrt: Ehrlich ween lohnt sik överhaupt nich. "Du musst ein Schwein sein in dieser Welt..." güng mal en Leed, un dat warrt hier wohr. Esser & Co. hebbt Millioonen ut en ünnergahn Firma plünnert. Woso schallt wi nich dat Büromateriaal un Warktüüch bi uns Arbeitgevers mopsen? Woso schallt wi nich de Stüer bedregen? Nich swatt arbeiten?

Esser, Ackermann & Co. wüßten avers nau, wat se dään. Se wüßten, dat dat Unrecht weer, wenn't ok villicht keen Strafdaat weer. Se hebbt allens so heemlich maakt, as dat bloots güng. Avers gierig weern's, dor is dat Enn vun wech. "Untreue"? Ja, ungetruu weern se wiss. Wenn ok nich juristisch. — Dat de Richtersch jüm nu verurdeelen schall, wenn dat formell nich geiht, dat kann nüms verlangen. Wi köönt nich dat Recht bögen för de Gerechtigkeit. Dat kümmt vör in Rechtsstaaten. Ok den Al Capone kunnen se nich belangen vunwegen de velen Morde, an de he schuld weer, ok wenn dat jedereen wüss; bloots wegen Stüervergahn hebbt se em den Prozess maken kunnt. Dorbi hett he denn sachs liekso arrogant den Ehrenmann speelt as nu Esser un sin Kumpane. Ok dormalen müss de Rechtsstaat dat uthollen. Un de Minschen ok.

Angst maakt mi bloots de enorme Riep, de de Minschen — wi — bruukt, so en Rechtsstaat to stütten. Villicht sünd wi nich jümmers so riep. Wenn noch mehr Essers un Al Capones un Dutroux & Co. kaamt, warrt wi villicht ungedüllig mit den Rechtsstaat. Villicht kümmt denn mal wedder een, de seggt "Allens Quatsch, wi fackelt nich lang, mit solk Lü maakt wi korten Prozess!" — un alle sünd verlichtert... toeerst... Denn regeert in de Justiz wedder dat "gesunde Volksempfinden"... un wat denn kümmt, is leger as allens, wat nu leeg is. — Wi wüllt uns Deel doon, dat dat so wiet nich kümmt, un dat Recht verteidigen ok gegen de Gerechtigkeit, ok gegen uns egen Geföhlen; so riep wüllt wi ween. Avers Herr Esser un Herr Ackermann, Se kunnen ok ehrn Deel dorto doon, dat dat so wiet nienich wedder kümmt — höört Se mi?


23.3.04 .De Week fangt good an

Wat is denn nu mit de Terroristen los? Rau wüllt se in'e Luft jagen? Bundespräsident Rau?? De sünd ja woll nich ganz op de Hööcht. Rau! Dat is doch jüst so dösig, as wenn de britische Geheemdeenst de UNO afhöört — nix as unwichtige Lü! Dor sünd de Israelis doch plietscher. De maakt de wichtigen Lü dood. Naja, bi den Scheich Jassin, dat weer ja binah Sterbehilfe. En wohltätigen Akt — so hebbt de Israelis dat sachs ok meent. Un de ole Giftzwerg wull ja nu partu nich vun sülven starven. Muttst even groottöögsch ween mit de Starvhülp. Israeel helpt ok Lü, de dat gor nich wüllt.

Uns Bundeskanzler Schröder hett endlich mal wat Schönes to doon: He dröff den Baas vun de Polen besöken. Leszek Miller — so heet de Baas vun'e Polen — hett in Ümfragen bloots noch 10% Tostimmung vun de Polen. Ha! Da is Schröder ja duppelt so populär! Locker. Un bavento is Miller ok noch en lütt beten lütter as Schröder. Un sin Hoor sünd heel witt. Hach, dat Verhältnis to Polen warrt wunnerbaar, wenn't na Schröder geiht!


14.3.04 .De niege Sekerheit

Dat in Spanien is ja nu sachs de Al Qaida west. Un spaansche Minschen, de al jümmers gegen den Irak-Krieg west sünd, geevt nu de spaansche Regeern de Schuld: Harrn de nich bi'n Krieg mitmaakt, denn harr dat ok keen Terror geven. Hm. Dat smeckt för mi na Kuschen vör den Terror. Dormit dröffst gor nich anfangen: di so to benehmen, dat Al Qaida di nix deit... denn leevt wi bald würklich ünner de Taliban. Wenn de Regeern vör de Islamisten kuscht, denn sünd ja de Islamisten de Regeern! Dat geiht also na achtern los. — De spaansche Regeern hett de Schuld, bi en Lögen-Krieg gegen den Willn vun de Minschen mittodoon; avers de Schuld an düsse Anslääg hett se nich. De hett nüms anners as de, de dat daan hett.

Man liekers hett dat ja mit den Irakkrieg to doon. De Welt is ja sekerer worrn dör den Sturz vun Saddam, nich? Düt is de niege Sekerheit. De "Krieg gegen den Terrorismus" maakt Terrorismus. — As wi jüst baven faststellt hebbt, kann de Lösung nich ween, den Terrorismus in Roh to laten, vör em to kuschen. Avers wichtig is dat, woans de Krieg gegen den Terrorismus föhrt warrt. Opstunns warrt de mit massive militäärsche Middeln föhrt. Mit — seggt wi't ruhig: mit Massenvernichtungswaffen. Harrn de Islamisten ok welk, dennso wöörn se ehr ok bruken. Man se hebbt anschienend würklich keen. Se hebbt nix, mit dat se de hooch bewehrten US-Inrichtungen in Irak un süsswo in de Welt noch drepen köönt. Un dorüm griept se de "weken Telen" an — Zivillü, de sik nich wehren köönt. Dat is de "asymmetrische Krieg". Mehr un dickere Panzers maakt Woot un Hatt bloots grötter. Je mehr militärisch gegen em rüst warrt, je leger warrt düsse Terror. De Suldaten doot nix mehr gegen den Terror (wat ok?), se verteidigt man graad noch ehr egen Leven achter dicken Stackeldraht. Wehrlose, buten vör den Stackeldraht, warrt to Opper. Dat hebbt se nich bloots in Irak spitzkregen, man ok in Israel. Nu ok wi.

De militäärsche "Krieg gegen Terrorismus" funscheneert nich. He geiht na achtern los. He gifft den Terrorismus nieges politisches Foder. Dat mutt ophöörn — nich ut Feigheit, nich vunwegen Kuschen, man ut Vernunft. Polizeilich, politisch, kulturell, vun mi ut geheimdeenstlich mutt een den Terrorismus bikamen. Warrt Bush dat verstahn?


9.3.04 .Weltfruunsdag? Fruuns-Welt-...?

De "Internaschonale Fruunsdag" is vörbi, de Dutroux-Prozess geiht wieder. Wi hebbt gistern, an'n Weltfruunsdag, veel höört un leest över Fruunsrechten, "politische Teilhabe", "glieken Lohn för glieke Arbeit" usw., avers wat wi nich weet un vör wat wi as hülplos staht, is de Fraag, worüm is dat allens so? Woans kunn dat to düt Ungliekgewicht kamen? Mi dücht, wenn wi dat wüßten, wenn wi de Uursaak wüßten, kunnen wi veel wiederkamen as dör Kämpfen alleen. Ik meen, wi schullen en "Internaschonalen Dag vun't Nadenken över de Geslechter-Spaltung vun'e Welt" hebben. (Dat müss natüürlich kötter nöömt warrn.) Dat fangt ja nich bi "glieken Lohn för glieke Arbeit" an. Wat is dat, wat al weibliche Kinner to Opper maakt? Wat hett uns Geslecht an sik, dat dat nich opkamen, sik nich entfalten schall? In de Oogen vun de Taliban, vun Dutroux & Co. mutt weibliche Minschen de Welt wegreten warrn. Se mööt reduzeert warrn op en Stück Fleesch or en Stück Gornix. Woso denkt de so? Is dat överhaupt Denken? — In vele Gesellschapen herrscht en regelrechte Geslechter-Apartheid. Ok bi uns is de binnere Graven noch groot. Worüm trennt dat, wat eentlich verbinnen schull? Woans kann de Trennung heelt warrn?

De Weltfruunsdag is vörbi, de Dutroux-Prozess geiht wieder.


20.2.04 .Is Karneval!

Un noch en Karnevalsmellung: De Europääsche Zentraalbank will sik in Frankfurt en ganz nieges egen Stadtveerdel buun mit en egen Skyline usw. Juchhei! Konfetti! Wi schunkelt alle mit na de uurolen Gassenhauer:

"Wer soll das bezahlen,
wer hat das bestellt?
Wer hat so viel Pinkepinke,
wer hat so viel Geld?"

Is Karneval!


19.2.04 .Welk Mellung stimmt?

Vundaag maakt wi maal en Ratespeel. Vun de dree Mellungen hier nerrn stimmt bloots een, un Se mööt dat rutfinnen.

1. De Türkei hett en doodsekern Weg funnen, dat se foorts in de EU kümmt: Nich bloots de türkische Deel vun Zypern, nee, de ganze Türkei will sik nu eenfach den greekschen Deel vun Zypern ansluten, de in'n Mai in'e EU kümmt; se verhannelt al över den Ansluss.

2. Jürgen Schrempp, Baas vun Daimler-Chrysler, hett vundaag in en Pressekonferenz seggt, vunwegen wat sin Laden dor tosamen mit de Telekom bi Toll Collect utbröödt harr, dat weer dat beste Systeem vun'e Welt, un he wüss gor nich, wat de Staat vun em wull, Schadenersatz weer op jeden Fall unbegründt. Toll Collect wull wiedermaken!, sä he. Babento wüllt se nu doch noch Siemens in't Boot halen, dat de "on-board units" achterna gor nich mehr funscheneert. (An düsse Steed verwies ik mal op min prophetischen Kommentaar "Nix to lachen?" vun'n 27.9.03.)

3. De russische Präsident Putin hett ankünnigt, dat he bi de bevörstahn Wahlen doch wohraftig en Sieg mit 100% vun de Stimmen anstreven deit. Düt Ergeevnis harr ja al Saddam "errungen" bi de letzte "Wahl", de he vör den Irakkrieg veranstalten leet. Putin ziteer vundaag öffentlich den Satz vun Saddam: "Wi hollt düsse Aart Demokratie för wied beter as alle annern." Wokeen "wi" is, leet he apen.
De türkische Buufirma, de dat tosamenfulln Dack vun dat russische Swimmbad buut hett un ok dat Dack vun't russische Parlamentshuus, de Staats-Duma, hett meddewiel ankünnigt, dat se sik verwachtens sünd, dat bald ok dat Dack vun de Staats-Duma instörten kunn. Se rekent dormit, dat dat in de eersten Daag na dat Inberopen vun dat nieg "wählte" Parlament so wied is. — EU-Präsident Prodi sä, wenn dat passeer, harr de Türkei bi de EU wedder'n Steen in't Brett.

So, nu sünd Se an de Reeg. Is nich to glöven, avers een vun de Mellungen is würklich wohr! Nee, wi leevt nich in Afsurdistan. Is even Karnevalstied!


19.1.04 .Happy Birthday!

85 Johr warrt se oolt — exakt hüüt. Kennt Se ehr wedder, dat Bortsdagskind? Wokeen is't? — Dat Wahlrecht is't, dat Wahlrecht för Fruuns in Düütschland. Hüüt, jüst hüüt vör 85 Johrn dröffen uns Uurgrootmudders to'n eersten Mal ehr Stimm bi en frie Wahl afgeven — un sik ok wählen laten. Is en besünnere, en gode Dag!

Dat lett ja jümmers wedder as en bodenlose Driestigkeit, dat Fruuns de politische Sülvstbestimmung so lang wegnahmen weer; kannst di hüüt noch över empöörn. Se mööt avers bedenken, dat frie, glieke un geheime Wahlen ok för Mannslüüd tovör meist nich mööglich weern. Mit de Sülvstbestimmung weer't bi jüm ok nich wiet her. Mit densülvigen Akt vun Zivilisaschoon, de endlich för frie, glieke un geheime Wahlen sorg, kregen ok de Fruuns ehr Wahlrecht. Glieke Rechten un Versöhnung vun beid Geslechter merrnanner sünd nämli en Kernpunkt vun alle Zivilisaschoon.

Vundaag hebbt wi twoors al lang de Wahl, avers nich de Utwahl an Politik. Gifft meist keen Ünnerscheden twüschen de Partein — Neoliberalismus wied un sied un överall. Överall op de Welt mööt Fruuns vundaag noch (un wedder) för ehr Sülvstbestimmung kämpfen — för ehr politische, man ok för ehr intellektuelle, weerschapliche, sexuelle Sülvstbestimmung. Se stried üm Bildung, gerechten Lohn, frie Partnerwahl — wat ja eentlich reine Minschenrechten sünd. Faken verleert se. Denn verleert ok de Zivilisaschoon — ok för de Mannslüüd. Ok wi mööt op vele Flacken op'n Kaneel passen, wenn wi uns Sülvstbestimmung verteidigen wüllt. Man so lang, as wi kämpft, hebbt wi, hett de Zivilisaschoon nich verlaren — nienich.

Dorüm is dat Wählen vundaag mehr sowat as en Ehren-Saak — an'n Ehrendag vun't Wahlrecht. Wählt wi; breekt wi en Lanze för de Sülvstbestimmung vun Fruuns un Mannslüüd överall. Doot wi us sülven de Ehr! Un de, de dat för uns utfecht hebbt — de Suffragetten, de för't Wahlrecht op de Straat un in't Gefängnis gahn sünd un vun Polizeipeer doodtreden woorn. Ok vundaag leevt un kämpft solk Minschen överall. Fruuns un Männer. Ok jüm doot wi de Ehr! Un wi seggt:

Happy Birthday — to us all!


18.1.04 .Överdüveln laten!

Nu kümmt rut: De Irak-Krieg weer en afkoort Speel, lang plaant; de ganzen "Begrünnungen" en Spiet. De New York Times kommenteer fassungslos: "Woans kunnen de USA so överdüvelt warrn?!"

Dat erinnert mi doch an wat. 1989 in de DDR. De Afordneten vun de ole, ünner Honecker "wählte" Volkskamer, de ganzen angepassten Hüüchlers. In de Kameras hebbt se keken un jault: "Man hat uns ja soooo belogen — wi hebbt an de Ideale glöövt — dat wüßten wi ja allens nich...!" Belogen, jaja. De armen Opper. Allens Idealisten. Dorbi weern se nich de Belogenen, man sülven Löögners. Un wenn se eenmal ehrlich to sik sülven west weern, harrn se dat wüsst.

Un woans kunnen nu de USA so överdüvelt warrn? Mi dücht, op desülvige Aart. Mennig Lögen sünd ja so krass, dor mutt de Belogene mitdoon, anners geiht dat nich. Ogen tomaken un luut schreen: "De Minschheit will betrogen warrn — ik ok!" Denn kümmt de schöönste Drugg tostann. — Man wenn ji eenmal ehrlich to sik sülven west weern, harrn ji dat wüsst.


11.1.04 .De Wohrheit över de Reformgesetten

2004. Nu sünd düsse niegen Gesetten güllig woorn, de 2003 noch alle beslaten woorn. Dat "Reformpaket". Stüer, Sundheit, Arbeitsmarktreform, allens. Wat steiht denn in düsse Gesetten? Dat Bladd un dat Kiekschapp vertellt us dat bi jede Gelegenheit. Man: de Text vun düsse Gesetten hett 10.000 Sieden! Wokeen vun de Afgeordneten, de doröver afstimmt hebbt, hett dat woll leest? Wokeen hett dat överhaupt leest? Se? Ik? Schröder? Jichenseen Journalist? Jichenseen Referent vun jichenseen Ünnerstaatssekretär? Nüms. Nüms hett jemalen alle niegen Reformgesetten ganz leest! — Man een hett dat tippt. En unbedüden lütte Tippse hett de 10.000 Sieden tippt; un wat se rintippt hett, is ganz wat anners as wat alle Welt meent. Nüms weet dat, man se hett dat daan. Un dat woor beslaten. Un ik verraad Se dat nu. — Op Siet 2835 hett se to'n Bispill eenfach tippt: De Bund gifft de Länder un Kommunen de velen Stüern trüch, de he jüm in de letzten 15 Johr klaut hett. Ok de Industriesubvenschoonen warrt ümschicht to Gunsten vun de Kommunen un vun gemeennüttig Projekten, de süss nüms finanzeert. — Op Siet 5031 steiht: De Politikers betahlt nu alle in de gesetzliche Rentenversekerung in. Se kriggt ok bloots gesetzliche Rente un de ok eerst, wenn se oolt sünd. Anners schallt se arbeiten. — Un op Siet 8699 hett se doch wohrraftig tippt: Schröder klöört sin Hoor.
Nüms warrt dat jemalen weten, man dat is nu allens güllig Gesetz. So slecht sünd uns Gesetten nämli gor nich. Un de unbekannte Tippse — warrt se jemalen en Bundesverdeenstkrüüz kriegen?


7.1.04 .Dagegen ween? — En Fehler...

Vun de ca. 10.000 Gefangene in'n Irak wüllt de USA nu 500 frielaten. Un dat höört sik so an:
"Einige Iraker haben gegen die neue Ordnung im Land gearbeitet. Das war ein Fehler, und die Leute wissen das jetzt auch. Aber wir sind bereit, einigen von ihnen eine neue Chance zu geben." (Paul Bremer, vundaag.)
Jungedi, so snackt de Macht! So stell ik mi ok Saddam vör. Höört Se de pure physische Macht ut jede Silbe driepen? "Gegen de niege Ordnung", also gegen de Macht (de USA orr Saddam) to ween, is jümmers en Fehler. Wokeen dat deit, de kriggt dat "to weten". Gifft keen Diskuschoon. De Macht mutt nüms övertügen; se kann ja bestrafen. Gegen ehr to ween is keen persöönliche Menung, keen politische Posischoon — dat's en "Fehler", de di noch leed doon warrt. Dat heet in'n Klaartext, överhaupt en Menung to hebben is en Fehler. Nich denken, funscheneern! — So warrt de politische Wandel in en Land to en Minschen-Dressur. Wokeen dacht harr, mit Saddam harr dat Kuschen en Enn, de hett — na, en Fehler maakt. Kusch!

Wokeen dat foorts begriept un kuscht, de kriggt en "tweete Schangs", d.h. he dröff wiesen, wat he sik de niegen Machtverhältnisse jüst so good ünnerwerfen kann as de olen. So warrt de Charaktere rutfiltert, de keen Menung hebbt un keen Identität, man de op jede Welle swemmt. De Macht wesselt, se blievt baven. Un dat höört sik so an: "Also eigentlich haben wir den Hitler (Saddam, Stalin...) ja nie so recht gemocht..." Avers bi allens dorbi ween. Un sowat warrt tücht't! To'n Kotzen.


4.1.04 .Woso denn nich?

Wenn de Unioon as Kandidaat för't Bundspräsidentenamt en Fru opstellt, seggt Schröder, denn — ja denn warrt de SPD de mitwählen. Dormit will he sik sachs Merkel vun'n Pelz hollen; dat Schöönste weer, Merkel maakt dat sülven mit de Bundspräsidentschap, man eendoon: ok wenn dat en anner CDU-Fru maakt, is he Merkel loos, denn wenn al en Fru Bundspräsident is, kann noch en Fru nich mehr Kanzlersch warrn, nich? Nee, kann se nich. Journalisten un Parlamentariers schüddköppt synchron: Se kann nich.

Woso denn nich?!

Leevt wi villicht in Afghanistan? Dat schall ja ok bi us al mal vörkamen ween, dat stückerwat Spitzenjobs vun Minschen vun een Geslecht besett weern... Woso kann dat düütsche Volk, dat babento mehrheitlich ut Fruuns besteiht (ja: gifft mehr Fruuns as Mannslü!), nich dör Fruuns regeert un repräsenteert warrn? Opstunns warrt dat vun twee Mannslü in de Spitzenämter vertreden. Un is dat unmööglich? Weer dat nich al in de ganze Geschichte so? Ja: Mannslü sünd Minschen, Politikers, Düütsche usw., Fruunslü sünd... na, Fruuns even. — Woso schallt Fruuns jümmers bloots ehr Geslecht vertreden, wieldess Mannslü de ganze Minschheit vertreden köönt? — Wenn de ganze Regeern un dat ganze Parlament ut Fruuns bestünn, weer dat düütsche Volk jüst so güllig vertreden as nu. Un villicht ok nich slechter. Merke:

Wi sünd dat Volk!


Öllere Notizen: Hier klicken


na baven