Vun'n 22. bet 25 Mai geev dat ja de Hansedaag bi uns in Lübeck — mit veel Kultuur, Geschichte un Musik, aver ok mit Wirtschap un Bildung. Een kann nich allens besöken, nich allens ankieken, wenn so grote un so feine Festdaag utricht worrn sünd.

"Lisa vun Lübeck" un "Wismara" achter'nanner

Histoorsche Kostüme an Bord vun de Kieler Kogge

Mien leef Mann hett hier un dor beten wat up Plattdüütsch vörleest, vertellt. Uns Imke hett hier un dor Leder sungen, ok bi den groot Eröffnungsavend vör't Holstendoor hett ehr Chor mit sungen.

Man denn keem en E-Mail vun Fründ Peter. He höört mit to Crew up de "Kieler Kogge" un se liggt in'n Lübecker Hafen un he laadt uns in, an Bord to kamen. Dat hebbt wi daan un dat weer würklich en Beleven vun besünner Ort. Bi strahlen Weder sünd wi an Bord rümkrapen, hebbt uns allens ankeken un hebbt staunt, dat uns Vöröllern sik truut hebbt, mit so'n lütt Schipp wiet över't Water to schippern.

Fründ Peter as quasi blinde Rudermann un bi't Facksimpeln mit Besökers

Staunt hebbt wi över de gewaltig Ruderpinne. De Mann an't Ruder, de kann överhaupt nich kieken, wohen he stüürt. He kreeg Befehl vun baven. Dor stünn jümmers een, de utkeek un Bescheed geev.

Entern vun de Kieler Kogge

Staunt heff ik ok över de lialütt Kombüüs. Würklich, kuum dat sik dor een in ümdreihn kann. Winzig!

Un denn keem Lütt-Emily mit de ganz wichtig Fraag: "Un wo is eine Toilette?" Un — kuum to glöven — de weer ok dor. Du müsst so'n beten dalklattern un dor weer denn en Brett mit en rund Lock. En Plumpsklo. Allens füll glieks dal in't Water. Ik heff mi dat Geschäft denn bi Seegang vörstellt, bi kabbelig See ——

Hmmm, geiht dat hier villicht na de Tö...?

De niege Galionsfigur vun de Kieler Kogge

Uns' Emily hett sik den Unwillen vun de Koggen-Lüüd totrocken, wiel se överall rümkladder un eenmal — as so'n Galionsfigur — vörn in'n Bug hüng. Wi harrn nich goot noog uppasst un Emily harr't utnütt.

De ollen Hansescheep hebbt in'n Lübecker Hafen so'n lütt Seeschlacht simuleert. De Kieler Kogge hett angrepen un de Koggen "Ubena vun Bremen" und "Wissemara" ut Wimar hebbt de Kieler in de Kniep nahmen. An'n End hett de Kraweel "Lisa vun Lübeck" (na klaar!) de Kieler Kogge besiegt. De Wind weer so sachen, de Scheep kunnen ünner Segel in'n Hafen manövereern. En wunnerschöön Anblick!

De "Lisa vun Lübeck" in Originaalgrött un dorblangen en miniature. Klick up to'n Vergröttern!

De "Ubena vun Bremen"

Mi hebbt se gefullen, de Hansedaag in Lübeck!