Dei Ierste Mai in Rostock-Lütten Klein

vun H.Jürgen Grebin


De mehrsten Fotos (all schaten vun H.Jürgen Grebin) köönt Se dör Klick vergröttern. Trüch kaamt Se denn mit den Zurück-Knoop op de Symboolliest vun'n Browser.

Bi dei Demonstration gegen denn G8-Gipfel, dei in Heiligendamm 2007 vom 6. bis 9. 2007 in'n Grand Hotel Kempinski stattfünn, wier ick bi dei Jugend mittenmang. Dei Demonstration, dei ganz inn Gegendeil von datt Teiken "Wachstum und Verantwortung" plant wier, maakte up dei wohren Absichten von dei Herrschenden upmarksam.
As ick von dei geplante Aktschon von dei linken Jugendverbänn' tau'n Iersten Mai 2010 hüürte, wier mi klor: Dorbi büst du ook.

Väle Johr wier "Rauh" in Rostock. Dormals in Lichtenhagen 1990 harrn von uutwärdige (frömm') Lüüd gestüürte Rostocker Jugendliche Uutlänner dörch dei Straaten jagt, un leider hemmen vääle Lichtenhägener tauseihn un nich ehren Mund upmaakt gegen disse Raudies — eine groote Schann! Dormals fraachte ick mi, warüm künn dat passieren, so kort na dat Enn von dei DDR, dei ehr Kinner und Jugendliche doch inn Geist von Freden un Fründschaft in dei Schauls billt' harr. Lichtenhagen wüür dormals in dei ganze Welt bekannt, wegen dei sogenannt' "DDR-Frömdenfiendlichkeit", denn dei Biller von Füer bläben oewerall in dat Gedächtnis haften, doch dei Ursaken wüürn' nich nömt. Dat ein unfähich Stadtverwaltung nich genauch för dei Uutlänners, dei in uns Land kamen wiern, dauhn harr un dormit hauptsächlich verantwuurtlich wier, wüür nich düütlich. Ook hemm leider Rostocker Bürgers uut Blöödheit un wenig Nahdenken taukääken hebbt, noch klatscht harrn, güng mi mächtich up dei Seel.

Ein Schann' wiert!

Ann 1. Mai 2010 wull 'n ungefiehr 400 jugendlich Demonstranten versäuken, dei Neo-Nazis uptauhollen, ehren Marsch dörch Lütten Klein tau maaken. Deshalw blockierten sei dei Krüüzung Warnowallee/St. Petersburger Straat un setten sick up dei Straat.


Sei wiern dorbi...

...un sei...

...un sei...

...un sei.

Leider harrn Gewerkschaft un Rostocker Parteien dat Mai-Fest inn' Fischerdörp Evershagen ansett'. Dordörch wüürn vääle Lütten Kleiner un Evershägener Börgers doran hinnert, an dei Blockad' deiltaunähmen. Un dat wedderümm gääw dei Polizei dei Möglichkeit, mit 1.000 Polizisten dei Jugendlichen dörch ein Inkesseln in Schach tau hollen. So is dat, wenn dei Solidarität verhinnert ward. Mi geföllen dei ruhigen, "kreativen", lustigen un iernsthaftigen jungen Minschen, dei ümmer nur as "Linksautonome" dorstellt ward, as gewaltbereite "Randalierer" — doch ick heww disse jung Lüüd so nich kennenliernt.


Kein dumme August!

Dei Nazis harrn ehrn Plan wägen disse oewertüüchten Linken woll ännern möten orrer von Anfang einen annern Wech nähmen wullt, üm nich tau verliern, denn gegen 13.30 Uhr wüür bekannt, datt sei von 10 Polizeiautos vörwech — ganz anners as plaant — oewer dei Oll Warnemünder Chaussee in Richt Groß Klein trecken dähn!


Oha, da överall sünd Lüüd nödig!


Aver besünners da!


Wagenburg? Binnen dei Demonstranten, buten dei Polizei

Sittenblieven kann wat Godes sien!

Nu verseukten blitzordich dei flinken Jugendlichen ut denn Kessel uuttaurieten, un dei Polizisten ümmer hinnerher. Dorbi seih ick, wie einen jungen Mann, dei versöchte, oewer ein Gitter up dei anner Sied vonne Straat tau gelangen, sien schön' Büx ann Hinnern ein grotes Lock upwieste. Doch hei lött sick sick nich dorvon awhollen, wierer tau loopen. Ditt mal harrn dei Blockadeverhinnerer dat Loopen wunnen un sei in dei Inmündung vonne Rigaer Straat werrer inkesselt, dörch eine duppelte Reich von Polizisten mit schwatte un witte Helms.

Ann Enn von dei erfolchreiche linke Blockad' stellten dei Medien dat so hen, as ob dei Rostocker Börgers dörch ehr Dorbisien poor hunnert Meter wierer inn Fischerdörp dat Marschiern von dei Nazis verhinnert harrn.

Upp keinen Fall wier dat so, datt is mien Meinung; ook dei wenigen ölleren Lütten Kleiner hinner denn Polizeikordon beööchten datt Geschehen taustimmend, doch sei reihten sick nich in denn Blockadblock in. Man kann ehr dat nich verdenken, denn dei oewer dusend Polizisten schreckten aww, un wer wüll sick in sien Öller noch mit dei Polizei anleggen. Doch wenn Dusende von Börgers kaamen wiern, harr sick dei Polizei bestimmt trüchhollen un harrn dei Demonstranten nich ümzingeln un inschüchtern koenen.

Dei Kandidat vonne Linken, Helmut Holter, un ook Heiko Lietz (Börgerbewäächter von 1989) repen ann Anfang in dei Helsinkier Straat tau Gewaltlosigkeit up un dat sick dei Jugendlichen nich provozieren laten süllen.
Dor gääw dat Taustimmung, doch as Holter dei Polizisten, dei "Ruhe und Ordnung" dörchsetten müßten, mit dei Antifaschisten verglieken wull, gääw dat ein Piepen un Murren. Datt wier gegenoewer dei würklichen Antifaschisten eine groote Geschmacklosigkeit, ob jung orrer ollt.


Blockade gegen Blockierers — hm, ob dat helpt?

Blockierer/sche vörn, utborgte neddersässische Polizist/innen achtern: allens junge Minschen

Dei Instellung von dei Polizisten as so nöömte "Antifaschisten" wüür werrer düütlich in dei Stunn'von dei Blockad': Antifaschisten-Polizisten hinnerten dei Jugendlichen dörch ehr Blockadtaktik, dat sei ehre Meinung gegen denn Uppmarsch von dei Neo-Nazis taun Uutdruck bringen künnen.

Ook Lietz hett einen dullen Patzer von sick gääben. Hei erinnerte an dei Gewaltlosigkeit vör 20 Johren, denn ook dormals wieren sei in Rostock gegen Panzer siegreich blääben. Luude Pfiffe folgten up dissen unwohren Vergliek. Wenn hei dormit denn Maut anerkennen wüll, harr hei sick bädere Wüürer infallen laten süllt. Heiko Lietz wier spärer nich miehr tau seihn, hei wier woll in't Fischerdörp gahn. Dei ehemalige Gesundheitsministerin, Dr. Marianne Linke (sei heit nich blots so, sei is ok vun de Linke Partei) oewer seih ick ümmer noch bi dei Jungen.


Dr. Linke mutt mal na't Rechte sehn

Nazis passt hier nich dörch


"Ein schöner Rücken kann auch entzücken"


Filmen un Dokumentiern ünner Polizeischutz

Wandern ünner Polizeischutz

So gegen Klock 15.00 hemm dei Nazis upgäben, un mi gegenoewer düüdeten Jugendliche mit ehren Duumen na baben! Sei harrn siegt, denn dei Nazis wiern nich na Lütten Klein rinkaamen un harrn sick up dei Rückfohrt maakt.

Gegen Klock fief künnen ook dei Polizeibereitschaften uut Schleswig-Holstein, Neddersassen un Mäkelborg-Vörpommern werrer ehr Rückfohrt anträden.


De Lent in Rostock is bunt, nich bruun

Hett sick datt allens lohnt, frööch ick mi?

Bärer wier ein konsequent Verbot von allen Nazi-Organisationen dörch unsen Bundsdach in Berlin, denn Naziideologie ist keine Meinung, sünnern ein Verbrääken.

Dei Naziverbräkers un ehr Regime sünd doch vör 65 Johren in Nürnberg verurteilt worrn. Bert Brecht hett 1955 vör denn Nazismus in sien Kriegsfibel warnt: Der Schoß ist fruchtbar noch, aus dem das kroch!

Wo vääl €uros harrn wi spoorn künnt un sei bärer in Bildung un Uutbildung von Kinner un Jugendliche'n insetten süllt. Sei sünd doch dei grote Schatz von uns Gesellschaft!!


9.5.2010


na baven