Niege Nåmen möten her II

vun Behrend Böckmann

Al 2022 heff ik dei grote Umdöperie kommenteert. Dei Wahnsinn geiht wieder un warrt kurioser un kurioser. Dat düütsch-russ'sche Museum in Berlin-Karlshorst heit blot noch "Museum Karlshorst" un dorvör weihn ukrain'sche Fåhnen. Bi'n Kopmann näbenan ward dat bekannte Moskauer Ies as "Sandwich Kiewer Oort" verköfft, ut dat Dresd'ner Russischbrot wür "Dresdner Baukståwenbrot" måkt, ut Russich Eier würn "Düwelseier", russ'sche Soljanka ward as "ukrain'sche Soljanka" serviert, russ'scher Zupfkauken ward as "Zupfkauken" verköfft un dei russ'sche Salat nu nå sienen Erfinner, denn franzöös'schen Koch Lucien Olivier as Olivier-Salat updischt.

Œwer nich nauch von un mit dei niegen Nåmen för Såken ut Russland. Ne, nu schlöcht 'n ukrainscher Diplomat, dei böbelste ukrain'sche UN-Diplomat in New York vör, so as taun Bispill Ungarn up inglisch Hungary, russ'sch Vengriya, franzöös'sch
Hongrie heiten deit, süll Russland nich mihr "Rossiya", sonnern "Muscovy" heiten un in Kiew künn dei Werchowna Rada, dat Parlement Order gäben, von nu an von "Muscovy" un nich nich mihr von Russland tau schnacken. Un disse klauke Diplomat mit denn Nåmen Sergej Kyslytsya deit dat so begrünnen: Dei Nåm' Russland geiht up dei Kiewer Rus as Staat taurüch un Kiew leech un licht nu mål inne Ukrain un nich in Russland. Denn Nåmen Russland hemm' sik dei "Muscovy" must. "Muscovy" wier as Grotfürstendaum Moskau 'n russ'sches Deilfürstendaum un wür ierst mit Iwan IV. (1530-1584) in't Johr 1547 dei Anfang von't russ'sche Zorenriek. För denn Ukrainer steiht fast: Dei Kiewer Rus hett ehr Wöddeln in Kiew an'n Dnepr un dei "Muscovy" vonne Moskwa hemm' ut denn Nåmen Rus Russland måkt. Un dei Ukrainer fäuhlt sik in't Recht, denn hei hett Minschen nå sien Ansinnen befråcht, un 98% hemm' em taustimmt. Russland sall dat up'e Landkort nich mihr gäben, sonnern blot noch "Muscovy".

Wo is dei ganze Sekt för dor? För niege Dööp, dat is doch klor!

Dei Lady haugt dei Buddel twei, dat Schipp is döfft, dei Naam is nei! So mennig Buddel hüüt terschellt: Wat russisch klingt, hüüt nich miehr gellt!

Wennihr ward 'n in Düütschland von "Muscovy" schnacken un "Muscovy" mit Sankschonen stråfen? Orrer kåmen plietsche Düütsche ok in Verbinnung mit dei Scholzsche Tiedenwenn' un den düütschen Anspruch, Leithåmel inne EU tau spälen, up denn Infall, ut Düütschland wedder dat Hillig Römisch Riek Düütscher Natschon, Allemania orrer Germania tau måken.

Selenskyj sülben sall dorachter ståhn, dat Russisch gägen Moskowitisch uttuuscht warden un dei Russ'sche Föderatschon taukünftig Moskauer Föderatschon heiten sall. Dei Lüd in Moskau sünd sik nich œwerein mit dei Lüd in Kiew un hollen den jüd'schen Selenskyj un Bewunnerer von den Nazifründ Bandera för den böbelsten Nazi in Kiew. Un ik fråch mi, ob son'n Nåmensstriet nich Kinnerkråm is, wenn man bedenken deit, dat dei Weltfräden up't Späl steiht.