vun Behrend Böckmann

Dor gifft dat 'n Milljardenlock in 'n Bundshushalt, un dat sall un möt nu so stoppt warden, as Größing dat vör Tieden mit dei Löcker inne Strümp måkt hett. Un so kåmen por plietsche "Christen" (dei von dei Union) up den Infall, den Pläächgrad I tau strieken, dormit dei Tauschuss för dei Pläächkass nich ümmer grötter ward. Un all dei Ollen, dei dörch den Pläächgrad I 'n lütt Hülp in'n Hushalt orrer bi nödige Besorgungen hemm' un dei ünner Ümstänn von ehr Rent noch Stüern an'n Staat tåhlen möten, will man nu in't binåh riekste Land Europas anne Wull.

Schäbiger kann 'n Regierung dei Ollen nå 35 Johr düütsche Einheit wull nich anmeiern. Wenn dei Ollen sik noch rœgen kœnen, salln sei glieks tau Arbeit verplicht' warden, un wenn sei sik nich miehr rœgen kœnen, kriegen s' even keine Stütt tau'n Plägen miehr, Punkt. Fählt blot noch, dat dei Staat 'n Order rutgifft, dat dat Geld ut'e Pläächkass wiederhen blot noch an dei tåhlt ward, dei as einstig NVA-Soldaten un hütig Rentner mit 'n Pläächgrad dei Reservisten för dei Bundswehr warden.

Dor räden's von Trump as Diehlmeker (Dealmaker), dei Selenskyj œwer't Uhr haugen will, un gäben Milljarden för dei ukrain'sche Luftafwehr ut, för Systeme, dei as Geemschenjer (Gamechanger) gellen in'n Kampf gägen den bösen Russen. Wat dei Rüstung un Uprüstung angeiht, warden sogor Schullen in Koop nåhmen, œwer dei Wehrplicht sinniert un Friewillige gaudet Geld verspråken. Üm dei Demokratie tau redden, so as sik dei rod-gräunen un börgerlich-konservativen Ideologen dei Demokratie vörstellen, warden 200 Milljonen utgäben un för NGOs (nich-staatliche Organisatschonen) 9 Milljarden. Doch bi dei Ollen un Gebräklichen sall spoort warden. Inne Pläächkass fählen in'n Momang man blot 2 Milljarden, dor künn man doch ümschichten, wenn man denn wull.

Dat dei Rieken sik al lang vun dei Solidargemeinschåp afkoppelt hemm un vun den Staat nich miehr antast' warden kœnen, is al lang klår. För allens, wat dei Staat bruukt, kann hei sik bloots noch bi dei Swacken un bi dei Middelschicht bedeinen. Is dat wull gaud, noch lange Tied in dei verkiehrte Richt tau lopen? Wo lang geiht dat noch gaud? Vergät nich: 35 Johr DDR würn noch dull fieert — man an'n 40. Johresdach wier s' an't Enn'.