Tetsche mit de Utsichten

vun Silke Frakstein

"Ach wo weer dat doch vördem
mit de Heinzelmännchen so bequem ..."

Wi hebbt de lütten Dwargen nie nich sehn, un doch weer allens sauber un adrett. Denn sünd wi ut'n Huus gohn, de Dwargen weern jümmers noch verswunnen un wi mussen den ganzen Kroom alleen moken.

So noh un noh keem de Huulbessen, de Waschmoschien, Mikrowelle un de Herd, den du vun't Büro ut anstellen kunnst.
Veel to doon bruukt wi nich mehr. Wat du eeten wullt, keem fardig ut de Tüüt orrer Glas — orrer ut de Küll.

De Huulbessen mookt allens alleen, ok dat lütt Stück Gras in'n Goorn.

Wat mookt wi nu mit de veele Tiet, de wi hebbt? Wi fohrt vun een Ivent no dat annere. Stoht rum un sabbelt klook. Wat nehmt wi mit? Marmelood ut Oma ehr Köök.

Robbi? Tobbi? Oder doch dat Fliewatüüt?

Ober nu warrt allens anners.
Funkutstellung in Berlin: Wenn das Haus alles selbst erledigt. Amazon un Konsorten seggt, wo dat lang geiht. Na, markst Müüs? Google weet intwüschen, wat för Unnerbüxen du op'n Liev hest, wo un wat köfft warrt un wat de Spoorkass dorto seggt. Dat regt di ober allens nich op. Datenschutz — wat is dat denn?

Mennigmool denk ik so bi mi: "Na, nu hett dat'n Enn mit de niege Technik. Wat nu wull noch kümmt...?"
No de Apps för Musik, Glotze, Wetter, kohle Feut, kümmt "Alexa" vun Amazon, de vernetzte Luutspreker "Echo". Mit "Echo" kannst snacken un Mehl orrer Solt bestellen.

In Ameriko sünd se notürlich al lang wieder. So'n lütten Knopp sitt överall dor, wo de normale Schwund is. Also: Waschpulver, Büdel för den Huulbessen, un, un, un. Du bruukst so as in de Lodens nich mehr lang seuken, wo villicht dat Regol mit de billigen Priesen is. Goggle un Konsorten warrt di dat al seggen.

De Heinzelmännchen weern doch de besten!

Un denn? Denn büst du verkeuhlt, un "Echo" versteiht di nich.
"Wählen Sie die 1, ich verstehe Sie nicht." Un bumms kümmt Kümmelkees un keen Lachs.

Orrer dat Smartphone is leddig. Un du weetst nich mol mehr, wo du wohnst. Bloots Google, de weet dat noch. Kannst em ober nich fragen — vunwegen Smartphone leddig.

Danke nee.