Ostseetunnel

vun Behrend Böckmann

Opa Willem Drœnkopp kümmt dat kort vör Wihnachten noch in'n Sinn, dei Mulwörmhupen in sienen groten Gorn tau tellen. Un as hei bi œwer hunnert ankåmen wier, is em so, as dat sik dei plietschen Mulwörms ünnen in ehr Tunnels œwer em hœgen. Hei fangt an so för sik hen tau schellen un brummelt bäten lud:
"Disse Öös, dei hemm' hier so wat as dei ‚Metro' von Paris orrer dei ‚U-Bahn' von Berlin nåbuucht. Dor is von dei välen Tunnels ünner dei Ierd ok nicks tau seihn un dei Hupen künnen dei Bahnhöff sien." Un denn gåhn ok all Nåmens för dei Statschonen dörch'n Kopp: "Safranblaumenwisch", "Bi dei Pracherlus", "Grote Sünnenros" orrer "Ünnern Stickelbeerbusch".

Œwer em geiht ok dörch den Kopp, dat dei Vöröllern all ümmer dorvon schnackt harrn, dat nich mit Küll tau räken is, wenn dei Mulwörm in'n Julmånd noch grote Hümpels schmitt. Dat is hüt ok noch wohr, denn up uns Ierd ward dat ja ümmer warmer. Wohr is ok, denk Opa Drœnkopp, dat dei Mulwörms ünner dei Ierd nich väl kieken mœten un mit ehr legen Oogen blot hell un düster uteinanner hollen kœnen. Dorför kœnen's œwer bäder hüren un fäuhlen as'n Minsch. Un würklich, sei fäuhlen un hüren all den Minschen, wenn hei blot den Faut inne Neech von ehr Loptunnels upsetten deit. Denn verschwinnen's furtsens in ehr Nestkåmer un buddeln ierst wieder, wenn's reigen Luft vermauden. Un wat sei sik ünner dei Ierd taurecht buddeln! 100 Meter an'n Dach orrer in 'n Nacht is 'n Klacks för 'n Mulwörm — un so wunnert dat nich, dat hei sik ümmer so üm 300 bet 500 Meter Tunnels åpen höllt, dormit hei nauch Wörms as sien Leiwlingsspies finnen deit. Männigmål verlöppt son'n Tunnel ok ganz äben ünner dei Graswrosen un mank dat Gräuntüch as dei Bohnenpülten orrer Wöddelreigen. Hei kann sik œwer ok ganz deip ünner 'n Stråt, 'n Hus orrer 'n Wåder dörchbuddeln. Mulwörms bruken keinen Krœtentunnel, üm von ein Sied up'e anner tau kåmen, sei weiten sik anners tau helpen un sünd dordörch bet up den Dach nienich ünner dei Rö' kåmen.

Nådem Opa Drœnkopp sik in sienen Gorn ümseihn un dei Mulwörmshöp tellt harr, güng hei taurüch in't Hus un vertellt nu Größing Drœnkopp, wat hei beläwt hett. Œwer sien Fru meint blot, dat ehr dei Mulwörmkauken von den "Pudding-Dokter" leiwer is, as dei välen Höp dor in'n Gorn. Un denn kriecht's ehrn Mann dorbi, dei Tiedungen noch eins dörchtauseihn, denn dei süllen tau Wihnachten ut'e gaude Stuf verschwinnen. Dat måkt hei denn ok, läst sik œwer bi't Dörchstöbern fast as hei 'n Bidrach œwer 'n Ostsee-Ünnerwådertunnel finnen deit. Disse Norweger, sei hemm' väl Geld un willen up'n schnellsten Wech von Oslo œwer Berlin-Prag-Wien an'e Adria reisen, üm dor wat tau beläben. Un för dissen schnellen Wech willen's rund 20 Milliarden € för'n Iesenbåhntunnel ünner dei Ostsee von Stralsund nå Malmö/Schweden utgäben. 97 km lang sall disse Tunnel warden — un wenn hei af 2025 buucht ward, denn kann 20 Johr låter dei ierste Toch rollen. Hei kümmt ut dat Wunnern gor nich rut un mœt noch mihr dorœwer wunnern, dat dat Land Mäkelnborg dortau nickköppen un dei Bund schüddküppen deit.

Œwer disse Apporten druselt hei 'n lütt bäten in un markt, dat em so vonne Siet 'n Mulwörm anstött. "Du", secht dei schwatt Gesell, "Du, wenn wi Mulwörm ful sünd, buddeln wi son'n Tunnel in gaut 250 Dåch. Wi sünd väl fixer as dei Minschen!" Un dat kümmt nu bi soväl Niegelichkeit œwer Ünnerwådertunnels rut. Von all Sieden gåhn em Mullwörms an un willen wat up't Tapet bringen. "Ik wett", secht son ganz dicker Mulwörm, "dat du nich weitst, wo dei öllsten Ünnerwadertunnels tau finnen sünd?" Un denn flaustert disse Mulwörm em in't Uhr: "Dat sünd dei Holland- un Lincoln-Autobåhntunnel ünner den Hudson River twischen Manhattan un Jersey City. 28 m deip ünner't Wåder kœnen jeden Dach 120.000 Autos siet 1927 dörch den Hollandtunnel (7 Johr Butiet) un 10 Johr låter ok dörch den Lincolntunnel (3 Johr Butiet) fohren." Wihrend Opa Drœnkopp wieder druselt un up eins sülben dörch 'n Tunnel fohren deit un up dei Wulkenkratzer von Manhattan taustüert, kladdert son'n ganz lüttscher Mulwörm an em inne Hööcht. "Du, ik weit noch wat œwer'n annern Tunnel. Dei is noch gor nich dor, œwer dei Utgåben warden all up 65 Milljonen US-$ anschlåhn", vertellt hei un sett noch hentau, "dei is blot för ganz grote LKW utlecht un sall up 104 km ünner dat Bering-Meer Sibirien un Alaska miteinanner verbinnen."

Mien Gott! Un dor schütt dat Opa Drœnkopp in, dat in 40 m deipet Wåder all af 1994 Schnelltööch dörch den Euro-Tunnel orrer den "Tunnel sous la Manche" ünnern Ärmelkanal von Paris nå London flitzen. Disse Tunnel is 50 km lang un wür von 1987-1993 för glatte 15 Milliarden € buucht.

Un as Mudder Drœnkopp ehr'n Willem nu so schnorken hürt, weit sei ja nich, dat em dei Ünnerwådertunnels in'n Kopp rümmerspäuken un dat dat allens von dei Mulwörms herkümmt. Un so kann's ok nich den Mulwörm seihen, von weckern Willem drœmt, dat hei bi em in'n Jackenärmel rinnekrüppt un em von'n Fehmarnbelt-Tunnel vörsabbelt, dat dei Dänen leiwer dissen Tunnel as dei Brügg hemm' willen. Un as hei weiten will, worüm dat so is, secht em noch dei Mulwörm, dat dat nich so düer ward as 'n Brügg, dat disse 17,6 km in 10 m ünner't Wåder för bäten mihr as 5 Milliarden € hentaukriegen is, dat man 2013 mit den Bu anfangen künn un dat man dörch 'n Tunnel noch fixer von Hamborg nå Kopenhagen kümmt, as wenn man œwer 'n Brügg fohren wür.

Toch fohrn måkt bannig Spaß, nich blot von Paris nå Londen un von Hamborg nå Kopenhagen. Nee, nu sitt Opa Drœkopp all in'n Siedenstråtentoch Paris-Peking un fohrt in dissen Momang dörch den Marmaray-Tunnel ünnern Bosporus dörch. Disse Tunnel ward all af 2004 in 56 m deipet Wåder bucht, is 13,6 km lang, sall 2014 fardig sien un Europa mit Asien verbinnen. Dei Utgåben von 2,5 Milliarden € för dissen Tunnel verspräken, dat 'n Ierdbäben em nicks andaun kann. Un œwer dat Ierdbäben lannt hei in'n Seikan-Tunnel in Japan un so sticht hei noch in Tokio in'n Toch, ward denn œwer upwåken un kümmt so nie nich in Sapporo an. Dorbi wull hei so giern mihr œwer dissen Tunnel rutkriegen...