Turmbu in Babel

Andacht in Grönau, hollen in'n Maimaand 2005 vun Harry Ziebell

"As se nu na Osten wannern, dor funnen se in dat Land Sinear en Stück Sietland un setten sik dor fast. Un se sään to'nanner: Los! Nu laat uns Tegelsteen strieken un Muursteen brennen!"

De Lüüd sünd also vun de Bargen ut Armenien jümmers den Euphrat lang na Süüdosten trocken in dit fruchtbor Land un sünd dor bleven. Man, wovun sullen se Hüser buun? Grote Wälder geev dat dor nich, man ok kene Steen. So hebbt se sik denn Tegelsteen utdacht. Toon geev dat dor un Lehm un ok Sand.
Un so harrn se Tegel to'n Muurn un Pick ut de Eerd to'n Utsmeern.

Ik wahn in Lübeck in de Dörpstraat. 1950 heff ik beleevt, wo de Sudeten bi uns vör de Döör ehr egen Siedlung buut hebbt. Flietig hebbt se ut Holt Formen timmert. Dor keem Slacke rin vun't Hochofen-Wark Herrenwyk. Afbunnen hett dat un is dröögt, un denn hebbt de düütschen Flüchtlinge ut't Sudetenland (1945 verdreven to uns na Norden) dor ehre Hüüs mit buut. De staht hüüt noch.

Wi sünd ünnerwegens ut Dwang orrer ut egen Stücken:

• In disse Daag erinnert wi uns an de Tiet vör 60 Johr. 1945 — 8. Mai — Flucht vun Millionen vun Düütschen vun Oost na West, ok vun de Sudeten-Düütschen, vun de ik graad vertellt heff.
• 375 na Christus de Völkerwannerung vun Oost na West, as de Hunnen, en mongoolsch Riedervolk, Europa wies wörrn.
• In uns' Geschicht de Tog vun dat karge Bargland in de fruchtbor Niederung vun Sinear.

De Lüüd, de dor nu in Babel leven, dat weern ja kene Sudeten, de Hüüs buut hebbt, nee, dor weern Kräft togangen, de hebbt seggt:

"Los, wi wüllt ene Stadt buun un enen Torm, de mit de Spitz bet na den Heven reckt! Denn hebbt wi uns en Denkmal sett un blievt tosamen un loopt nich ut'neen över de ganze Eerd."

Se wullen sik dormit enen Namen maken!
Kennt wi sowat nich ok hütigendaags? Enen Torm buun, bet an de Spitz vun'n Heven! Dat fangt bi de Lütten an un höört bi de Groten nich up.

Ik denk dor as Bispill an Lübecks Geschicht.
Wi weet, dat uns' Marien-Kark mit 125 Meter den hööchsten Torm hett vun all uns' Karken. Kunn't nich angahn, dat de rieken Patrizier, Kooplüüd un Raatsherren vun Lübeck de Dom-Herren wiesmaken wullen, wer de hööchst Kark in Lübeck hett?
Man de Dom-Geistlichkeit hett nich spoort, se hebbt an den romaanschen Dom noch en gotisch Karkenschipp anbuut. So harrn se de längst Kark.
Weer dat nu christlich Ehrerbieten orrer weer dat: "...dormit wüllt wi uns enen Namen maken!"? Wullen dat de Patrizier, wull dat de Dom-Kurie?

Ik denk dor ok an de Politik:
Köönt wi uns nich all an de "Barschel-Affäre" 1987 hier in Sleswig-Holstein erinnern? Orrer vör en veertel Johr dat Dilemma mit Heide Simonis. Wullen se sik enen Torm buun bet an de Spitz vun'n Heven, wullen se sik enen Namen maken?

Ik treck den Krink wieder un denk an den slimmen Krieg in'n Irak, de ok hüüt noch nich an't End is — dormit kann sik wahrhaftig keeneen enen Namen maken — ok keen vun de anner Siet vun'n Ozeaan.

Ik denk dor an, as ik sülvst, as twölfjährig Hitlerjung, in Lübecks Innenstadt de Fanfaren nalopen bün un luuthals mitsungen heff: "Heute, da hört uns Deutschland und morgen die ganze Welt". 12 Johr hett dat duurt, un denn weer Sluß mit dat dusendjährig Riek. En Chaos mit Millionen Dode hett uns de gröttst Despot vun all uns' Tieden bröcht.

Un jüst so denk ik an dat SED-Regime, dat hett över viertig Johr Bestand hatt, un de Marxismus vun Lenin un Stalin harr sik den Welt-Kommunismus up de Fahnen schreven. Allens is — as de Turmbuu in Babel — tosamenbraken!

Un noch en poor Wöör to uns' Wirtschaft — vun de wi alltohoop afhängig sünd. Bi mien Afschlußprüfung 1950 is uns vun den Schooldirektor mit up den Weg geven: "De Wirtschaft — de Wirtschaft kennt kene Gefühle!" 45 Johr in mienen aktiven Deenst sünd mi disse Wöör jümmers wedder över den Weg lopen.

Wi kennt all dat Spektakel mit de düütsche Bank: 2004 över 2 Milliarden Gewinn, de Boß mit dat Victory-Teken kasseert in een Johr 10 Millionen Gehalt, aver gliektiedig warrt künnig maakt, Dusende vun Angestellte köönt gahn!
Profit steiht babenan! Wassen — höger un höger — jüst so as de Torm in Babel!

Ok de groten Konzerne Telekom, IBM un Siemens hebbt in't vergahn Johr Milliarden-Gewinne maakt, man gliektiedig hebbt se Dusende vun Arbeiter, Angestellte un Ingenieure na Huus schickt.
Minschen as Kostenfaktor, Minschen as Nummer — Hauptsaak, de Torm! de wasst.

De CDU-Querdenker un Jesuitenschöler (vun de kathoolsch Elite) Heiner Geißler fraagt in sien nie Book: "Wat wörr Jesus hüüt seggen?"

In unsen Text heet dat to Beginn:

"Nu harrn de Minschen up de Eerd een Spraak un bruken ok all de sülvigen Wöör."

All Minschen up de Eerd harrn een Spraak, un se snacken so mit'nanner, dat se sik verstünnen.

Ach, wenn wi doch in uns' Tieden mehr denn je up'nanner höörn deen — tohöörn — den Nächsten annehmen, mit'nanner snacken, — un dat ahn to verletzen.

Ach, wenn doch wedder ene nie Erweckung dörch uns' Leven gahn wörr!

Dat is mien Wunsch, dat sünd mien Gedanken — dorüm laat uns beden, dorför laat uns wat doon.

Amen.