Dat Plakaat

Uns' Marienkirch in Lübeck warrt renoveert. De Torms sind inrüst. Un dor sind nu clever Lüüd up den Gedanken kamen, so'n groten, wuchtigen, ollen Kirch-Torm as Werbeflack to bruken, as so Oort grote Litfaßsüül.
Disse Idee hett de Christenminschen wiet un siet in twee Dele deelt: de ene Grupp is dorför, de anner dorgegen. Wat nu Pastor Thomas Baltrock dorto meent, hett he hier schreven:

Dat Plakaat
vun Thomas Baltrock

Dor hangt dat nu, dat Plakaat vun St. Marien, un verdeent Geld för dat Buwark. De Stimmen to diss Aktion, de reckt vun "Gotteslästerung" bet to enthusiastisch "ja" seggen. Ik meen, beid Positionen sünd Unsinn.

För dat Plakaat, dor sprickt — na mien Meen:

Dat Plakaat, dat hangt blots so lang, as de Arbeit an'n Torm duurt.

De Kirch hett dat Seggen dor över, för wat worben warrt — so bruukt wi wohl nich up Snapsbuddels un grote Nackedeis un "Geiz is geil" töven.

Un: Dor kümmt Geld för dat Buwark in de Kass.

Dat is ja en Dilemma: Is de Kirch riek, so kriggt se Prügel; is se so arm, dat se Geld verdenen mütt, gifft dat ok böse Wöör.

Wieder: Dat is doch nich so, dat hier to'n eersten Mal Kirch un Werben up'nanner draapt. Ahn Werben geev dat kenen Gemeindebreef. Ahn Werben bleev dat Kirchenkonzert leer.
Aver is nu dat "Veröffentlichen" vun frömde Interessen an de Kirchenmuur en Schritt, de wieder geiht?
Dor bün ik mi nich so seker. In de Aegidienkirch sünd noch all de ollen Saken — Altäre, Epitaphien, Dööp — erhollen. Merrn an'n Barockaltar prangt mank Duuv un Krüüz ganz unbescheiden dat Wappen vun de Stifterfamilie.
Is dat fromm sien orrer eitel? Wokeen kann't weten?

Un St. Marien sülvst? Is de groot Bu blots buut ut Leev to Gott, orrer nich ok as Denkmal för den Riekdom un den Stolt vun Lübeck?
Wokeen fraagt, wat Jesus wohl to en Plakaat an en Kirch seggt harr — orrer, wat Jesus wohl to en gotisch Kathedral seggt.

Gegen dat Plakaat, dor spreken — för mi — twee Gründe, en weltlich un en geistlich:

De weltlich Grund: Mi empöört dat, wenn Buwarke, de för Minschen en Symbol sünd — as dat Brandenborger Door orrer even uns' Marienkirch — to Werbezwecken nützt warrt. Dat Geld triumphiert över elkeen anner Form vun Bedüden.

Mien geistlich Inwand is vun fundamental Oort. Achter de Biller un Texte vun de Werbung steiht en Bild vun Minschen, bi de in't Leven allens gelingt, licht is, seker is, versekert warrn kann — also Stroh för Wunschfüür.
Christlich Gloven süht den Minschen anners, als schunnen un dreven. Up kenen Steen in disse Welt kann een buun.

Fazit: Wenn ik pro un contra afwääg, denn kann ik de Plakaat-Aktion an St. Marien mit vertreten — man mit en deep Unbehagen an de Saak.