Karl H. Nissen

Noch mehr grote Hüüs:
Dat Zeughaus

In olle Böker steiht wat vun dat "tuchuß". Dat weer nu avers keen "Zuchthaus". Un en Huus för Tüüg is dat ok nich west.
"Zeug", dat weern Waffen, Kanonen, Piken, Säbel, Scheetgewehre un Harnische.

Lübeck weer, so as männich anner Stadt ok, in veer Quartiere indeelt. Dat harr to kriegen mit dat Insammeln vun de Stüürn un mit de Verteidigung vun de Stadt. In jedeen Quartier geev dat ene Börgerkompanie, mehrstendeels weern dat de Handwarker. Wenn Noot an'n Mann weer, denn müssen de up de Wälle un de Stadt verteidigen. Ehr Warktüüg dorto harrn se tohuus, un dat sall vorkamen sien, dat se ehr Utrüstung nich finnen kunnen orrer de weer verrost, wenn dat los gahn sull.

De groten Geschütze weern verdeelt in verschieden Hüüs, an verschieden Stellen, sogoor in de Kirch vun dat olle St.-Annen-Klooster stünnen welk. Lübeck harr vele Kanonen, mehr as 1000 Stück. Un de harrn all enen feinen Namen, so as "Nachtigall" orrer "Dicke Margret".

Man nu, dat weer dat Johr 1594, sull Ordnung sien.
Dicht bi unsen Dom weer Platz för en groot, nie Huus. 64 m lang is dat buut worrn. Ünnen hett dat ene lange Hall hatt, 10 m breet. Dicke Balken gaht hüüt noch quer röver. Dor weer Platz noog för allens, wat man bruukt hett to de Tiet.
De Böhn weer as Kornmagazin vörsehn.
Dat Huus is ut Backsteen muurt. De Straat "Parade" geiht up den Hauptingang to, de is mit Sandsteen na hollandsche Oort richtig schöön maakt. In de Mitt steiht Mars, de Kriegsgott, meist en beten stief. Vun den Sandsteen müß en Deel afnahmen warrn, he weer möör. Nu is dat en Gievel mit schräge Sieden.
Up dat Door weer groot de Lübecker Doppeladler upmaalt.

Bet 1804 is dat Huus as Arsenal nutzt. Dat weer de Tiet vun Napoleon. In de lütte "Frie Stadt Lübeck" harr man insehn: In den groten Striet speel man keen Rull. Dor hebbt de Lübecker afrüst, se hebbt ehren Kraam verköfft un insmolten.
Wat weer dat en Barg Tüügs! Nich blots de Kanonen, nee, ok 680 Sturmhauben, 282 Morgensterne, 222 ganze Harnische un noch veel mehr. Ok en poor wunnerlich Stücken weern dorbi, so as en Sweert, mit dat en Börgermeister bi'n Gottesdeenst ümbröcht worrn is, un dat Richte-Sweert, mit dat up unsen Markt de Börgermeister Wittenborg henricht worrn is. "Auf der Obrigkeit Befehl" hett de Zeugwärter "den curieusen Liebhabern" disse Saken wiest. En ganz grote Kanon is na Berlin kamen, en anner na Wien.

Na de Franzosentiet is dat Huus as Wullmagazin bruukt. Överall weern lütte Zellen inricht för de Wullhändler. Dat Geschäft weer goot in'n Gang. Dor hett dat denn heten: "Höört Se to de Wollwollenden orrer to de Wollhabenden?"

In'n eersten groten Krieg weer in dat Huus de Sammelstell för Kantüffel. Later hett dat Land Schleswig-Holstein dat Huus övernahmen un dat Polizeipräsidium is dor introcken, bet 1980.
Denn hett de Stadt Lübeck dat Huus wedder trüchköfft. Veel müß repariert un restauriert warrn. Dat nödige Geld ist to'n groten Deel stift worrn. Rudolfo Groth, en goden Lübecker, hett 500 000 DM geven.

Hüüt sitten in enen lütten Deel vun't Huus Lüüd vun't Buuamt un vun't Archiv.
De grote Hall un de böverst Etage höört to de Völkerkunde-Sammlung.

Dat hett veel beleevt, dat oll Huus. Ringahn un ankieken!

Wenn wi wedder rutkaamt, denn kiekt wi graad röver na dat "Slott Rantzau", gaht wi eenmal rundüm, staht wi vör de hoge Döör vun unsen Dom.
Glieks üm de Eck is dat "Museum für Natur und Umwelt", dat liggt an den Möhlendiek mit de ollen Möhlen.
Vun dor sünd dat man en poor Schreed bet hen na den Wall mit dat Kaiserdoor un denn.....
Un denn, denk ik, doot de Fööt al weh.

Nadrag 2008: De Völkerkunn-Sammlung is nu ok oplööst. Nüms weet opstunns, wat ut dat grote Huus warrn schall.