Vagelkinner an't Water

Opnahmen in Travemünn vun Antje Heßler

Mit Fohrrad morgens an de Traav — dat is för en Travemündersche dat Wohre bi so en Juniweder as nu! Egentlich wull ik Rosen knipsen an en Huus in de Kurgoornstraat. Dat heff ik denn ok maakt.

Up den Nahuusweg güng mien Fohrt denn an Jachthaven lang. Mien Ogen güngen ümmer na de Aanten un Möven. Dor wöör ik mit eens en poor ganz lütte Dierten gewohr. Twee lütte Sturmmöven! Anhollen, den Knipskasten ut de Tasch un knipsen, dat weer eens. Ik harr aver nich mit de besorgten Öllern rekent. Upreegt un mit luut Schriegen kemen se up mi daal.

Na'n Stoot hebbt de Möven sik aver an mi wennt. Ik dörv sogor bi't Fodern tokieken.

N'beten wieder lang gewohr ik denn noch en Mööv up en Stroompahl. De seet up ehr Nest. As ik to'n Knipsen noch dichter ran wull, floog se ok mit luut Schriegen weg. Dor kunn ik twee lüürlütte Küken seh'n. De weern jüst ut dat Ei kropen.

Tofreden wull ik nu na Huus fohrn. Aver dor stell sik denn noch en Aantenfamilie mit ehr Kinner vör!

Nu harr ik nich blots Rosen in mien Knipskassen. Dor weern ok lütte Sturmmöven un lütte Aantenkinner binnen.