Anke Nissen
Toxisch Planten

Na Folg 1, Folg 3, Folg 4, Folg 5, Folg 6, Folg 7 , Folg 8, Folg 9 , Folg 10, Folg 11, Folg 12, Folg 13, Folg 14, Folg 15

Aronstab (Arum maculatum)

• Gift: Caliumoxalat un Scharpstoffe, as Aroin

De Aronstab weer al mal Plant vun'n Maand hier bi Plattpartu. De hele Plant is giftig, ok för Deerten, as Peer, Köh, Schaap, Swien, Hund un Katt, ok för Nager as Haas, Kanink, Hamster un Meerswien un ok för Vagels. Also ok de Oosterhaas mutt sik vörsehn!

Dorgegen gifft dat avers to'n Glück en natüürliche Vörsichtsmaatnahm, denn de Beeren brennt böös up de Tung. Vergiften mit disse Früchte kümmt dorwegen selten vör. Aronstab blöht in'n Mai, de Beeren warrt in'n Juni root.

De Plant hett enen knollig hellen Wörtelstock. Disse Wörtel warrt in'n Harvst utgraavt un dröögt. Vörsicht! De frische Wörtel treckt up de Huut Blasen. Dit scharp Wirken verleert sik later, wenn de Wörtel utdröögt is.

Liguster (Ligustrum vulgare)

• Gift: Glykoside as Ligustrosid, Syringin (in Bläder), Oleuropein
• Besünners giftig: Beeren
• Symptome: Bringt Övelkeit, Erbreken, Dörchfall, Lievpien

Liguster kennt wi all as Heckenplant. De Heck is so beleevt, wieldat se fix wasst, winterhart is un nich veel Pleeg bruukt. De smucken witten Blöden wasst in'n hogen Sommer, so vun Juni bet Juli, rüükt herrlich un sünd en gode Insektenweid mit Nektar un Pollen. De Struuk hett also vele gode Egenschapen un kann good in en natuurnahen Goorn rinpassen.

De Beeren vun'n Liguster, de in'n Harvst vörtüüg kaamt, seht swart ut. Se sünd giftig för Minschen, avers to'n Glück nich för Vagels, de ehr geern freet. Man ok in de Bläder vun'n Liguster is en giftig Stoff (Syringin) binnen. Bi't Heckensnieden kann de Huut so reizt warrn, dat dat to dat so nöömte "Liguster-Ekzem" kamen kann.