|
De Kapell in Lütten Grönau hett Geburtsdag. 600 Johr steiht
se an de Straat na Ratzeborg, un jümmers warrt noch Gottsdeensten
hollen. Den langen Sommer över, bet Oorndank hen, gifft dat dor
jeden Sünndag Andachten, meist Plattdüütsch. So bi
veertig Lüüd köönt dor sitten, un so veel kaamt
ok.
 Un
— dat höört ok dorto — achteran sett sik en ganze
Reeg dorvun to 'n Tass Kaffee tohoop.
Denn warrt snackt. Över de Andacht, över den Paster un över
allens annere, wat so passeert in uns Welt.
Letzt harrn wi mal wedder uns olle Stadt Lübeck
tofaten. Vun olle Hüüs, vun olle Lübecker hebbt wi
snackt, un mit'nmal weern wi bi ünner-eerdsche Gänge, bi
Tunnel.
"Nee, so wat gifft dat nich in Lübeck, dat is allens Snackerie."
Dor weern de mehrsten sik eenig. "Dat sünd olle Geschichten,
dor steiht nix vun schreven."
Avers nu meldt sik uns Fründ Hermann mit den griesen Kopp.
"Lüüd, dat weet ik beter! Ik heff dat sülms sehn,
ünner den ganzen Markt loopt so Gänge. Vun den ollen Kaak
na dat Raathuus kunn
man lopen, un dat is hüüt noch so.
 Vun
de Marienkirch güng
en Gang na den Fredenhagen-Keller an de Eck vun de Fischstraat, un
gliek dorbi weer noch en lütt Kapell, ok ünnen in den Keller.
Ji möögt dat nich glöven, dat geev sogoor enen Tunnel
vun dat Holstendoor
ünner de Trav dörch rup na unsen Markt un vun dor rin na
dat Raathuus. Dat harr mit de Verteidigung vun uns Stadt to kriegen.
Un denn weer dor noch en Tunnel vun de Jakobi-Kirch
röver na de Schiffergesellschaft.
Ik bün dor sülven binnen west. Ehrlich! Ganz ünnen,
dicht bi de Köök, is en höltern Döör ut Eekenholt.
De heff ik upmaakt. Dat röök so 'n beten muffelig, ik bün
liekers en End dor ringahn. Up de Eerd leeg en lütt Jack, mehr
so en Oort Wams, bunt bestickt. Un denn heff ik enen sülvern
Wienkroog funnen. Dat is wohr. De weer vun enen Schipper ut Wismar.
Sien Naam weer an den Rand ingraveert, dorüm weet ik dat so genau.
Dissen Kroog kunn ik later köpen, de steiht bi mi in 't Schapp.
— Nu kiekt ji mi an. Dat is allens wohr!"
Wi hebbt nipp tohöört un wi hebbt uns fix höögt.
So schöne Geschichten gifft dat, wenn wi na Lütten Grönau
in de oll Kapell gaht, de an düssen Sünndag ehren 600. Geburtsdag
hett.
27.9.2009
|
