O

OCR

Afkörten för "Optical Character Recognition", op Platt "optisches Bookstaven-Erkennen". Software, de ut en scannten Text (d.h. also en Bild vun en Text!) en Text-Datei (Bookstaven, nich Biller!) maken kann, indem dat se de Bookstaven in de Afbillung erkennt un as Teken codeert. Dat geiht mehrst nich ahn Fehlers af; bi handschriftliche Texten is dat mehrst sinnlos. — Faken kriggt een ganz gode OCR-Programme al mit en Scanner mitlevert.

OEM

Afkörten för ingelsch "Original Equipment Manufacturer". Toeerst weer dat en Beteknen för Computerherstellers, de sik den Hardware-Lüttkraam vun anner Herstellers tosamenköfft un dat denn bloots trechtbastelt. Vundaag warrt dat ok för de Software bruukt, de mehrst al mitlevert warrt, wenn Se in'n Laden gaht un en PC ut dat Regaal treckt: "OEM-Version, OEM-Version" heet dat dor. Dat bedüüd, dat dat för den Hersteller to besünners günstige Kondischonen afgeven woor un dat dat villicht nich de Standard-Kumplett-Verschoon is. Bavento is för solk Software mehrst keen Installaschoons-CD orr -DVD dorbi; dat is bloots op de Fastplatt. — Liekso kriggt Se t.B. OEM-Verschoonen vun CD-Brennprogramme mitlevert, wenn Se en CD-Brenner köfft. De kümmt denn avers op CD to'n Installeern, anners güng dat ja nich. Vun solk Programme kannst denn ok de OEM-Verschoon op CD köpen — faken ok in'n Hannel; dat is avers irreföhren, denn dat is nich de Vullverschoon. Dat Gegendeel vun OEM, nämli de Vullverschoonen vun Programme, de to'n Alleen-Verköpen dacht sünd, heet Retail-Verschoon.

Office-Paket

En Sammlung vun Programme, de för Bürokraam brukt warrt (ingelsch office = Büro). Dorto höört tominnst en Textverarbeitungsprogramm, en Tabellnkalkulaschoonsprogramm un mehrst en Datenbank. De mehrsten Hersteller vun Office-Pakete levert avers noch wat to'n Emailen dorto un ok to'n Websieden maken.

Dat an'n mehrsten bekannte Office-Paket is dat vun Microsoft. Mehrst meent een al Microsoft Office, wenn een "Office" seggt. Avers dat gifft ok noch poor annere gode Office-Paketen vun annere Hersteller, de faken wat billiger sünd as Microsoft Office, t.B. StarOffice, Open Office, Corel WordPerfect Office - un woans se nich alle heet.

offline

Ingelsch "weg vun'n Draht". Bedüüd: Nich online.

onboard

Ingelsch "al an Bord", dat heet, op dat Mainboard integreert. Dat seggt een vun Elektronik, de süß op en extra Koort levert warrt, wenn de al in't Mainboard inbegrepen is. "Bi mi is de Soundkoort onboard" heet, ik bruk keen Soundkoort in min PC intobuun, un dor stekt ok keen, wieldat dat allens mit op't Mainboard is.

online

Ingelsch "op Draht", "in'e Leitung". Heet vundaag: in't Internet. Dat warrt in twee Bedüden brukt:

1. "Ik gah endlich ok online", dat heet, ik beschaff mi en Modem un en Internet-Provider un bring min PC endlich an't Internet.

2. "Weerst du vunnacht twüschen 11 un halvig 12 online?" Dat heet: Hest du dor graad surft orrer emailt, harrst Du de Verbinnung vun din PC to'n Provider aktiv?

Online-Banking

Dat Erledigen vun Bankgeschäfte över't Internet. Se surft na de Websiet vun SeEhr Bank un loggt sik dor in. Denn hebbt Se Togriep op SeEhr Konto. Natüürlicherwies mutt dat dorbi besünners seker togahn. De Daten warrt verslötelt överdregen (süh bi SSL). Se mööt natüürlich ok bewiesen, dat Se Se sülven sünd un nich jichenseen elektroonschen Bankröver. Dorwegen bruukt Se de PIN för't Anmellen un en TAN för elk Vörgang.

Online-Dienst

En egen Nettwark, dat vun een Anbeder bedreven warrt, t.B. AOL. In den Online-Deenst mööt Se per Internet ringahn, avers dat köönt Se bloots, wenn Se Kunde bi den Anbeder sünd. Surfers, de mit annere Anbeders (Provider) in't Internet ünnerwegs sünd, köönt de Inhollen vun den Online-Deenst nich ankieken. — Dat grote wiede Internet is veel attraktiver as de Online-Deensten; nüms hett Lust, jümmers bloots in den Online-Deenst rümmertosurfen. De mehrsten Anbeders vun Online-Deensten beed dorwegen ok en Internet-Togang an.

Open Office

En Office-Paket, dat op open-source-Basis to hebben is. Billig, düchtig, good. Websiet: www.openoffice.org. Wokeen will, kann dat dor ok glieks gratis downloaden (grote Datei!!!).

open source

Heet op Platt "apene Quelle". Dat is en Aart, Programme ünner de Lü to bringen. De Programmcode, de dat Programm togrunn liggt, is "apen", jedereen dröff em kennen, afkopeern un sülven an rümmerpusseln (wenn he/se dat kann ). So gifft dat nüms mehr, de en Lizenz op de Software hett un dat dorüm düür verköpen kann. Wied un sied bekannte Open-source-Programme sünd t.B. Linux un Open Office.

Open Type

En Schriftformaat, dat vun alle mööglichen Computers leest warrn kann — en Wiederentwickeln vun de TrueType-Schriften. Open Type-Schriften hebbt noch mehr Teken, ok mehr Sünnerteken, un Teken för mathematische Saken so as Bruchtallen. Open Type is dat Schriftformaat för de Tokumst. (Sommer 2005)

OrdnerOrdner in'n Windows-Explorer

En Datei, de de eenzige Opgaav hett, annere Datein optolisten — en Dateiliste also. De ole Naam för Ordner is dorüm ok "Verzeichnis", un dat kümmt de Saak al neger. Avers dat bildhaftige Vörstelln is, dat Datein as Bläer in en Ordner schuven warrn köönt.

Ordner brukt een to'n Verwalten vun Datein. De Datein, de tosaamhöört, mööt in en Ordner stekt warrn. Ordner köönt ok wedder Ordner binnen hebben; dat sünd denn Ünnerordner. — Dat Bild wiest poor Ordner mit Ünnerordnern in't Dateiverwaltungsprogramm Windows-Explorer.

Ordner sünd de eenzige Aart Datein, de keen Dateiendung hebbt.

Outlook, Outlook Express

Programme to'n Verfaten un Lesen vun Email. De twee Programme sünd dorwegen so bekannt, wieldat se vun de Firma Microsoft kaamt un also op binah jedeen PC sünd. Outlook is de "grote Broder" vun Outlook Express un kann in Wohrheit noch veel mehr — ganze Grootbüros organiseern, Terminkalender föhren un firmenwied synchroniseern usw. Avers düsse Anwennungen bruukt Privaatnütter mehrst nich.

Output

So nöömt een in'n Computer-Jargon dat Ergeevnis vun en Rekenprozess, dat, wat bi en Programm achtern rutkümmt.