Dat Archiv vun't Natuur-Notizbook

Na de aktuellen Notizen: Hier.
Mailt Se uns, wenn Se ok en Naricht orr Beobachtung bidragen wüllt!


 

9.7.06 ...Schummertiet

Gaaanz düüster weer dat buten. Ne, nich so swattendüüster as an'n Äquator, obers uns lütt Lamp an de Huusdöör weer twei und dorüm kunnen wi toeerst nix kieken. — Bi düssen scheunen Summer freuh to Bett? Ne, veel to schood. Lever enen Spazeergang moken. Wi hebbt de Wischen mit allens, wat dorto heuert, direktemang vör de Döör. Un dennso bi Schietbüdel fein inööschen, dat is wunnerbor. Wat weer dat noch för'n Leben ringsüm un dat güng al op ölven to. De een orrer anner Vogel meld sik noch half in Droom, dat raschel un wisper ut alle Ecken. Romantik pur.
Dor, op eenmol: Uff, Uff, Uff, Uff achtern Knick — wat weer dat?
Wi blievt stohn, un ik grabbel no de Hannen vun Schietbüdel. Uns Ballermann harrn wi nich dorbi. Bi so'n Spazeergang? Dor keem dat al wedder: Uff, Uff, Uff, Uff. Oh nee oh nee oh nee. Dor liggt een un kann al gor nich mehr snacken. Tja, dat helpt jo nu allens nix. Wi mööt den Minschen doch to Hölp komen!
"Wüllt wi nich lever de Utels Bescheed seggen?" froog ik Schietbüdel.
"Ohn Handy? bit de dor sünd, is he orrer se al lang doot!"
"Bleiben sie ganz ruhig, wir kommen", roopt wi in den Knick un jumpt denn achter dat Gebüsch.
Un denn? jo, denn harr dor gor nich veel an fehlt un wi harrn so'n lütt Liebespoor tweipedd. Twee Swienegels weern grod dorbi un moken lütte Swienegels...

Also, oppassen in'n Duustern.

Silke Frakstein

 

15.6.06 ...Kreihen-Truur

De Goorn in düssen Fröhsommer! So explodeern Blöhen hebbt wi noch nich belevt. Een Oort fehlt, Fingerhööd sünd dit Johr roor.

Dusende Wunnerwarke rund üm’t Huus! De Blööt vun’n Hollerbusch! Wenn dat en Goldsmitt maken wöör, kemen de Rieken vun wiet. So hebbt wi uns vele Blöten un ehren Ruuch för uns. Un dorto den Thymiaan!

Denn aver de Truursang! En Ravenkreih hett ehren Passer woll dörch’n Unfall verloren. Nu schriegt sik dat arme Deert hesig. Eerst veermaal, denn Paus, denn söven Turen achterran. Avends geiht dat, bit dat düster ward, morgens weckt se uns mit ehr Jammern. Dat geiht nu Daag al so. — Wi kennt se (orr em?). Se harrn vele Johren bi’n Naver in de Swattkiefer ehr Nest un hebbt uns veel vörmaakt. De Naver stürv, de Nafolger haugte alle Bööm üm.

Nu, wo de Truursang in Gang is, sünd all anner Vagels still un laten sik nich seihn, nu, wo wi för se en schöne Vageltränk köfft hebbt. – Stimmt nich, twei Ringelduven hebbt ehr Nest in de Bark un fuddert. Wi hebbt dat Rin- un Rutfleigen vun de Olen mit de Klock kuntrulleert. Dat is nau de Tiet bi’t un för’t Fuddern.

Villicht verjagt dat Kreihenschriegen de slaadootschen Heisters, un de jungen Duven blieven an’t Leven. Is to grugelich, wenn fief, söß Heisters de olen Duven verjagen un denn sik över de jungen Vagels hermaken. Kannst hampeln un schriegen, wenn de Heisters mördern, laten se sik nich verjagen. Meist liggt een anhacktes Lütts denn ünner den Boom. — Man wat een dat woll över sik bröch, so en Heister doodtoscheten? Denn wöör de sin Maat villicht ok so klagen as nu de Kreih... Ok de Roovdeerten hebbt ehr Maten leev! Jüst so as de Duven — un de Minschen.

Rudi Witzke

 

Vadder un Kind. Klick op to'n Vergröttern!25.5.06 ...Lünkenfamilie an Vadderdag

De Biller laat sik per Klick vergröttern!

Hüütnamiddag bi'n Kaffeedrinken up de Terrass kreeg ik Besöök vun en Lünkenfamilie. Up den Spatzendisch kregen se vun mi to'n Vadderdag ehr Fudder. Ünner Jümmers quengelt de Göörn! -- Klick op to'n Vergröttern!Lünkenmodders Ogen leten se sik dat goot smecken. Dat eerst Mal harrn se ehr'n Nahwuss mitbröcht.

Familienfuttern. --Klick op to'n Vergröttern!

Minilünk: Satt, avers tofreden...? -- Klick op to'n Vergröttern!De lütten Flattermänner kunn man nich översehn un överhöörn. Ohn Ünnerbreken piepen se un flattern mit ehr lütten Flünken. Hüüt an'n Vadderdag wüss Lünkenvadder, wat sien Plicht weer. He keem bannig in't Sweten. De Flattermänner satt to kriegen is gor nich so eenfach.

Antje Heßler

 

19.4.06 ...Krokus-Thore

Wi harrn unsen Enkel — he weer dree Johr olt — up den Rasen leggt un üm em rüm Sand streut. Denn hebbt wi lingelang de Sandspur Krokus-Zibbeln insett. Anner Johr harrn wi denn dissen Krokus-Thore up'n Rasen liggen. Uns Enkel hett sik dor denn mal rinleggt, wat he al grötter worrn weer.
In de Twischentiet is Thore al teihn Johr olt. Sien Krokus-Konterfei aver blöht jümmers noch up unsen Rasen. In dat rechte Bild bekiekt sik uns Enkel Stina, Thore un Oscar den Krokus-Thore.

Anke Nissen

 

22.3.06 ..."Frühling, ja du bist's"

"De Sünn is dor, de Sünn is dor!" Ik glööv, dat hebbt all de lütten Blööm dacht. Se hebbt ehr Blöden wiet upmaakt un kregen ok glieks Besöök. De Hummel kunn gor nich genog kriegen. De Kopp is al ganz geel vull Blödenstoff. Se summ vun Blööt to Blööt. Sogor de eerst Botterlicker — en Voß — weer al upwaakt. He möökt de Flünken wiet up un leet sik vun de Sünn warmen. Dat Fröhjohr is dor!

De twee Fotos köönt Se dör Klick vergröttern.

Antje Heßler

 

15.3.06 ...Lünken un lünken laten

Hüüt an'n Moorn weer dat Water in de Vageltränke noch froren. Denn keem de warme Märzensünn un dat Ies wöör to Water. Un denn kemen de Lünken. Ik truu mien Ogen nich. Söß Lünken stünnen Slang un zanken sik üm enen Placken in de Vageltränke. De Winterdreck müß hindaal! Achterna hebbt se ok noch enen kräftigen Sluck vun dat Badewater nahmen! Dat müß ik doch wedder knipsen. Ik müß avers dörch de Finsterschiev knipsen, sünst weern mi de Lünken all wegflagen.
Mi düch, nu is dat Fröhjohr dor. De Winterlinge hebbt sik ok düchtig in de Sünn aalt un ik ok!

Antje Heßler

 

14.3.06 ...Swatt Gesell

Graad bün ik vun uns Wakenitz-Spazeern trüch kamen. En Droom! Allens witt. As makellos, lüchen, glitzern, strahlen, kolt, Sünnenschien baben up.
De Snee is licht, as Pulver, bi Wind stöövt he rüm.
Dörch de glatte, witte Sneedeck up dat Ies vun de Wakenitz loopt twee Spuren vun Rehe vun't en Över na't anner. Schöön!
Un denn heff ik de Drossel höört. Se hett dat ehr eerst Leed versöcht.
In'n Busch an'n Weg huschen poor Goldhähnchen rüm. To nüüdlich antokieken!
Man denn höör ik wat, dat kunn ik gor nich glieks klook kriegen. Ik bleev stahn to luschern un to kieken. Klack, klack! Dor fallt wat dal. Man wo un wat? Un denn sehg ik, dat een vun de Bööm meist gor keen Rinde mehr harr, he weer vun ünnen her meist nakelt. Un denn sehg ik ok worüm: En groot swart Vagel mit en lütt, lüchen root Kapp up'n Kopp weer dor togangen. He hack mit groot Kraft un veel Utduur gegen den Boom. Groot Stücke Rinde fullen dal. He wull an de Wurmlöcker ran, söch na Kropptüüg, Rupen, Insekten, un he hett ok wat funnen. Man dat Hacken güng furts wieder.
Ik stünn dicht dorbi in'n Snee un freu mi över den swatten Gesellen, över den Schwarzspecht.

So beleevt an'n Dingsdag, den 14. März 2006, meddags Klock twee.
Anke Nissen

 

11.3.06 ...Vagels, Vagels...!

Hüüt harren wi Besök von woll föftig Vagels in den groten Linnenboom.
Ick denk, dat dat all Frühjohrsbaden sünd, wenn ok de griesen Sneiwulken noch an den Häwen stahn un denn ehr Last up uns dalschürren.
Ick heww blots den "Püschel" up den Kopp seihn un heww prompt dacht, dat müssen Huwenlarks (orrer -lewarks) sien. Aver nee! Dat wieren Siedenstarten, de toierst von de Mistel freten hebben un denn so an 'ne halve Stunn in de Boomspitz sitten bleven.
So väle!
Dor wier twors noch keen orriges Zwitschern to hürn, as dat in't Fröhjahr un bi Sünnenschien is, awer dat wier eene muntere Vagelschar, wo een all 'n bäten Freud an hebben künn.
Nu kann't doch wohrhaftig nich miehr lang duern mit dissen rusigen Winter.

Dat wier Klock fiev, un nu sünd wi, eene Stunn späder, all wedder mit de Sneischuvers togang...

Karin Albrecht

 

22.2.06 ...Noch mehr Fröhjohrsbaden!

Kuum to glöven, dat in en Week dat kalendarische Fröjohr anfangen sall, so koolt is dat. Likers fleit de Drosseln al ehr Leed. Ik höör se jeedeen Moorn, wenn ik dat Blatt rinhaal. Un in mien Goorn kiekt de Fröhblöher al ut de Eer — de Leberblümchen, Winterlinge, Sneeklocken. Vör en Week, an'n 16.2., heff ik dat al wieskregen. Dor heff ik de lütten Blööm glieks knipst. Se köönt op de Biller hier klicken, denn seht Se de Fotos in heel groot. Un bald seht Se ok de Planten heel groot in ehr Fröhjohrspracht!

Antje Heßler

 

19.2.06 ...Wichelkatten in Sicht!

Ehrgüstern weer't, an'n Friedag, dor heff ik in den Rögenwoold bi Hamborg de eersten Wichel-Kätzchen sehn un glieks knipst. Kiebig stekt se ehr pelzige Neesen ut de Knubben. Vundaag sünd se wiss al grötter woorn, is ja mildes Weder. De Wichelkatten sünd dor, denn warrt de Lent nich mehr lang utblieven!

Marlou Lessing

 

5.2.06 ...Water höört alle to!

Wenn levenswichtige Saken in de Hand vun Privaatfirmen fallt, de bloots op Gewinn ut sünd, denn steiht dat slimm. Bi Stroom un Gas beleevt wi dat al, bi Water noch nich, dor weer dat dusendmal slimmer — un annere Länner beleevt dat, povere Länner, un de Armen in düsse Länner steiht dor miteens — sünner Water to'n Drinken! Se köönt't nich betahlen. Denn Water is kostbor (süh ok bi den Sünnschienkieker). Ok in Düütschland greept Konzerne na de Waterversorgung. Gegen düssen unheilvullen Trend gaht mennig Gruppen gegenan, so ok de Aktion Schutzdeich. In'n Märzmaand 2006 is dat neegste Weltwaterforum, un op de Websiet vun Aktion Schutzdeich kannst sehen, wat jedereen dorför doon kann, dat Water en Minschenrecht blifft!

Marlou Lessing

 

8.1.06 ...Vagelgripp un Unminschlichkeit

Leve Türken, ik weet ja, dat dat keen Vergnögen is, de Vagelgripp in't Land to hebben, dör de Kinner doodbleevt, man — is dat unbedingt nödig, dat ji de Vagels in Säcke lebennig verbuddeln doot? Dat is doch gresig antosehn, wenn dat dor in'n Sack noch zappelt un fiept, un de Bagger schuuvt de Eer doröver. Dat kann doch ok juuch nich toseggen — dat verroht doch ok den Minschen. De Vagels sünd nich schuld an de Vagelgripp; se blievt sülven dood. Dor kunnt ji tominnst so gnädig ween, ehr tovöör kort doodtohaugn! Trurig as dat is.

Marlou Lessing

 

22.10.05 ...Vagelgripp un Hypochondrie

Wi Minschen föhrt us op as de reinen Hypochonder mit düsse Vagelgripp. "Köönt wi noch Hähnchen eten?" fraagt de Bläder un TV-Sender mit bang klappern Tähn. Natüürlich köönt wi. Hebbt wi nich 2003 en grote Vagelgripp in Holland hatt? 14 Millioonen vörsorglich doodmaakte Höhner? Erinnert dat noch een? Un geev dat dormalen villicht Panik? Orr Hungersnoot? Nee. — Uns Vagels sünd noch sund, un wenn se süük warrt, denn kriggt Minschen dat noch lang nich — Vagels kriggt dat! De Vagels sünd nämli levige Wesen un nich bloots Naschub för't Deepköhlfack in't Köhlschapp! Wenn de Vagelgripp na us röverswappt, sünd vele wild leven Vagels in Gefohr, dorvun mennig roor woorn Aarten. De Fraag is nich: Wat passeert in uns Kaakpott?, sünnern: Wat passeert mit uns Vagelwelt? De Deerten sünd villicht bald in Noot. Wi Minschen köönt ehr nich helpen — tominnst nich de wild leven Deerten. Dat maakt Vagelfrünnen dat Hart swaar. Dor sorgt wi us üm, nich üm dat Eten. Wi köönt ja ok mal en Botterbroot eten.

Marlou Lessing


 

9.10.05 ...De Klever is "Vagel 2006"!

De Nabu hett beslaten: De Klever is de Vagel vun't Johr 2006! Ha! Dat geiht us doch rünner as Botter. Hebbt wi em doch lang in't Hart slaten, den plietschen Koppheistergänger. Leest Se man na, wat de Sünnschienkieker över em schreven hett!


 

6.10.05 ...Plietsch mit Platt

Je ehrder Kinner anner Spraken lehrt, je beter geiht dat. Dat weer ja bekannt. Wat de Wetenschaplers nu rutfunnen hebbt, is avers en Blick wert: Wenn Kinner mit ünner 4 Johr en anner Spraak lehrt, denn leggt de Bregen, de dor ja noch an't Wassen is, automaatsch en neuronales Nettwark an, 'neem alle mööglichen Spraken rinpasst. Dat höllt en leevlang, un later kann dat Kind/de Minsch alle annern Frömdspraken mit düt Nerven-Nettwark lichtfarig lehren. Is dat Kind avers öller as 4, wenn't de anner Spraak lehrt, denn leggt de Bregen för elk niege Spraak en nieges Nettwark an — un dat geiht natüürlich veel swarer. Dorüm fallt natüürlich ok dat Sprakenlehren denn swarer.

Bi Kinner, de al mit twee Spraken opwasst, is natüürlich de Bregen optimaal utstaffeert. Dorbi is dat eendont, welk Spraak dat is; mehrst wüllt Öllern ja, dat de Göörn fröh Ingelsch lehrt, man de Forschers seggt, dat kann ruhig en komplizeertere Spraak ween as Ingelsch, denn is dat Nettwark achterna ümso beter. Na, da blifft nich mehr veel to seggen, nich? Villicht dank ik all min lichtes Sprakenlehren un all min "Talent" bloots den Ümstand, dat min Moder mi as Kind plattdüütsche Leder sungen un taagnackig — ok wenn ik dat mal nich wull — Platt mit mi snackt hett. Danke, Mama!

Marlou Lessing

 

24.9.05 ...Bi uns dröhnt dat in't Holt!

De Hirsche sünd wedder to hüürn! Nu is woll ehre Bramstied vull ingangen.
Gliek hinner uns Dörp fängt de Wald an un reikt Kilometers wiet.
Dat giwwt hier in Vörpommern väl Rotwild, un disse stolten Dierte sünd nu in Rangstriedigkeits- un Poorungs-Angelägenheiten to de Brunftstäden unnerwägens. Wi seihn ehr nich, awer dat stunnenlange Ropen un Röhr'n is wiethen dütlich to hüürn. Wi wahnen hier nu all miehr as 30 Johr un ümmer wedder is dit harwstliche Naturschauspäl faszineerend. För uns is dat uttomaken, ob een Junghirsch mal blots so uptrumpen will mit sien ungedüriges Schriegen, orrer ob de Platzhirsch mit de luutstarke dunkle Stimm' för Ordnung in dat Rudel sorgt. Blots de Starken hebben Anspruch up de Damen! Un bi uns in't Holt moet dat woll een besünners staatscher Kierl sien. De hett so een Bölken, dat is as Dunnergrolln...

Karin Albrecht

 

29.8.05 ...Baben lang — uns Goorn in'n Austmaand

"Uns Goorn, de geiht baben lang," meen Anneke, as wi up unsen Balkon stünnen.
"So wat köönt Goorns nich!"
"Ik segg dat doch man so. Kiek doch mal, wo dat dit Johr allens wassen deit!"
Un dor kann ik nix gegen seggen, dat stimmt. Dorbi is uns Goorn keen Kunstwark, dat is mehr so genialer Tofall.
De Tagetes sünd meist enen Meter hooch. De Samen hebbt wi bi't Spazierengahn enerwegens funnen. Anneke hett se utseiht. Un wat dor bi rutkamen is, dat hett se inplant, wo Platz weer, mit ehren grönen Dumen un den richtigen Spruch - un later denn mien goot Pleeg (!). Denn kunnen se gor nich anners as so groot warrn.
Dicht bi staht de beiden Zuckerröven, se sünd goot in'n Gang. De Samen kaamt ut en däänsche Zuckerfabrik. In tokamen Tiet bruukt wi de nu nich mehr. Nu köönt wi sülven Zucker maken. (!)
Uns' Flass in de twee Pött maakt sik goot. De Samen hebbt wi mitbröcht ut en Flassröste, uns Naver meent, wat dor wassen deit, dat wörr wohl langen för en lütt Daschendook.
Den Fruunmantel hebbt wi vun'n Knuust (dat is Fehmarn) mitbröcht. De kümmt mit uns Luft noch nich torecht, dat mütt beter warrn.
Aver uns een Kantüffel, de kümmt ut dat Lauenborgsche, de steiht allerbest.
Blangenbi blöht de Sommerfleder, de "Schmetterlingsboom". De höört unsen Naver to, un de bruukt meist sienen halven Goorn. Wat dor all upsitt an Bottervagels! Dat is en Flegen un Flattern vun lütte Vösse un Pfauenoog un Admirals un Wittlings. Ik kann gor nich so gau kieken.
An den höltern Rosenbagen blöht jümmers noch Rosen, de Clematis hett ehr Tiet hatt, man nu wrangelt sik de Kapuzinerkress dor mang. Un ünnen, twischen de Ringelblomen ut Bosau lüücht ene Lilie. Wo de herkümmt, dat weet ik nich. Dree Blöden sünd dor an, so groot as en Töller, un sneewitt.
"Doch nich sneewitt," meldt sik Anneke wedder. "Dat is dat schöönst Witt, dat een sik vörstellen kann."
Un dat stimmt ok wedder.

K.-H. Nissen

 

7.8.05 ...Batman? Dracula? Tutulla?

In de grote Pappel vör uns Terrass huscht dat ok jümmer so sachen in de Sommernächt — husch! — un wedder is en Nachtfalter versluckt. Nix as en fahrige swatte Schadden husch wat zappelig vörbi, ahn Luut. — Sitt Se nachtens in'n Sommer ok geern buten un luurt op Steernsnuppen un swatte Schadden? De Nacht vun'n 27. op'n 28. August 2005 is de Fladdermüüs toegent! Op de Homepage vun de "Batnight" köönt Se nalesen, wat bi Se in Ehr Region an Veranstaltungen anbaden warrt. Dor gifft dat allens över uns heimische Fladdermüüs to weten, t.B. in de "Fledermaus-Nacht in der Festung Dömitz" un in vele annere intressante Saken. Un villicht süht een ja ok noch en Steernsnupp.

P.S. Batman un Dracula kennt Se, avers Tutulla nich? Wiss kennt Se avers dat Kinnerbook "Kleiner König Kalle Wirsch" vun Tilde Michels, dat so schöön vun de Augsburger Puppenkiste opföhrt woor? Süh! Un de de ganze Geschicht vertellt, dat is Tutulla, de Fladdermuus.

Marlou Lessing

 

10.7.05 ...De Elv geiht baden...

...hebbt wi fröher dacht, as dat bannig slecht üm de Elv stünn; avers nee, se is nich baden gahn, sünnern dank de Anstrengung vun Ümweltschuulers, Landweerschap, Industrie un Behörden is de Waterqualitäät beter un beter woorn. Nu kannst wedder sülven in baden. Dorüm gaht wi nu baden in de Elv, de nich baden gahn is. 2002 hebbt 100000 Minschen den eersten "Elbebadetag" fiert. An'n 17. Juli 2005 is to'n tweeten Mal Elvbaaddag vun Quell bet na Münnung. Togliek warrt in ganz Europa de "Big Jump" fiert — de eerste internaschonaale Flussbaaddag, an den allerwegens Minschen ehr Flüss mit Festen un Baden fiert un sik dorför stark maakt, dat de schönen, lebennigen Flüss in Europa nich to dode Schietwaterkanääl verkaamt. Woneem överall de Lü lütte Festen maakt, bi de se tohoop in de Elv jumpen doot, köönt Se hier nakieken — ok an de Elv-Toflüss warrt fiert! Un wat dat süss noch mit den Elvbaaddag un de schöne Elv op sik hett, steiht allens op de Websiet www.elbebadetag.de.

Na denn: Good Weder un Juchhei un Plansch!

Marlou Lessing

 

3.7.05 ...Vagels in mien Goorn

De Sommertied mit all de Vagels is doch to schön. All in de frühen Morgenstunnen hüren wi de Duven, de ehre Nester in de groten ollen Scholhoff-Linnen hebben. Denn geiht dat wierer mit den Lünkenlarm, wenn de sick üm Fauder strieden don.
Bet vör twee Wochen hett nachtens in unsen Goorn ümmer de Nachtigall sungen. Wi freugen uns nu all poor Johr lang an den herrlichen Gesang.
Ok an de Singdraußel orrer den lütten Wippstert, de oft up unsen Hoff to Besök kümmt.
Familie RotswanzAwer ganz besünners emsig is disse Dag de lütt Rotswanz, de sien Nest in dat Muerwark von uns Nahwerhuus hett. Dor sitten fief Jungvagels in, dat kann'n seihn an de witten Schnawelstriepens. Von miene Dackstuw kann ick gradwegs to ehr roewerkieken.
De lütt Vagelmudder is den leewen langen Dag an't Schaffen. Ick seih ehr so oft to dat Nest fleigen, dat dat woll kuum to tellen is. Mal bringt se Nahrung hen, annermal rüümt se up...
Dat duert woll nich miehr lang, dat de Lütten dat Nest verlaten warden. — Väl Glück up den Weg!

Karin Albrecht

 

26.6.05 ...Vagels un Bottervagels telln

Na de grote Vagel-Tell-Akschoon vun'n Nabu (wi hebbt doch glatt verpasst, hier op hentowiesen, avers uns Hamborger Maten hebbt mitmaakt, bloots leider bi de Verlosung nix wunnen) steiht nu en Bottervagel-Tell-Akschoon vun'n BUND an, bi de Se ok wat winnen köönt. Eenfach utkieken na de Bottervagels bi Se in'n Goorn orr op'n Balkon un denn online utfülln, wat Se sehn hebbt!

Marlou Lessing

 

28.5.05 ...Happy End in Krogaspe?

Happy End för en Geschichte, de uns in Sleswig-Holsteen dull to Harten gahn is: En totaal verdreihtes Storkenpoor harr sik merrn op'n Golfplatz in Krogaspe en Nest an'n Borrn (!) buut un för Gewalt de Golfbälle opsammelt un "utbröödt", de dor in'e Gegend liggt. Reinweg vun'n Verstand afkamen mööt de armen Deerten ween, un Vagelkundlers hebbt annahmen, dat se ehr egen Gelege verlaren hebbt — verwaiste Öllern. Man vundag höört wi: Dat eerste Junge is utkropen! Nich ut'n Golfball. De Vagelkundlers hebbt de verwaisten Öllern eenfach en verwaistes Ei ünnermogelt ünner ehr Kollektion vun Golfbälle. Nu warrt dat "Einzelkind" vun de Öllern rein för dull verpiepelt un verwöhnt. Schöön, nich? Villicht kaamt de Öllern ja ok bregenmäßig wedder in'e rechte Spoor trüch. Villicht neegst Johr, na en langen Aafrika-Urlaub in'n Winter... Wünscht wi ehr dat!

Marlou Lessing

 

30.4.05 ...Happy Bortsdag — oder so ähnlich —...

...leves Hamborger Planetarium, to din 75. Jubeljohr! Büst meist dat öllste Planetarium op de Welt, un ok dat schöönst, inbuut in en ehemaligen Watertoorn in'n Stadtpark. Öllere Lü erinnert sik noch, dat dor 1930 "ganz was Komisches, sowas mit Sternen im Stadtpark" eröffnet woor. Dormalen grepen de Hamborgers na de Steerns, un de Steerns hebbt se nich mehr loslaten — Generaschoonen vun Hamborgers hebbt ehr in din Kuppel kennenlehrt. Vundaag büst du dat modernste Planetarium op de Welt. 2003 hest di dat niege "Universarium" vun Zeiss gönnt, dat is meist eenmalig in de Welt, wat de Dat "Universarium" - en kompakte Genie-Kugel vun 1 Tunn WichtReedschap an Steerns op din 22 m wiede Kuppel tövern kann. Un nich Steerns bloots, nee, dor kannst mit op'n Kometen dör't Weltall rieden! Un jümmers gifft dat in de Kuppel ok schöne Konzerte un Veranstaltungen, de nich bloots mit Steerns to doon hebbt. Kannst op de Websiet nalesen. Na denn, leves Planetarium, op de neegsten 75 Johr! För en Steern is dat gor keen Öller.

Marlou Lessing

 

3.4.05 ...Blage Poggen

Vele Daag schient nu al de Sünn un lockt na buten. Mien leef Mann geiht jümmers an den Diek — enen ganz bestimmten Diek — an "unsen" Wakenitzweg un kiekt un luurt un luschert.
Man nix — nix to sehen, nix to hören. De oll Wind weiht eenfach noch to hart un kolt. Dat Fröhjohrsgeföhl will sik dor denn wohl nich bi instellen.Sex bi Moorpoggens: He is blaag -- dat kümmt bi Minschen ja ok mal vör

Man hüüt! — Hüüt weern se dor. Wi höörn se al, as wi an den Diek rankemen. Se "süngen" ehr Hochtietsleed, de himmelblagen Poggen, de "Moorfrösche".
Dit lüchen Blaag! — So seht blot de männlichen Moor-Poggen ut un ok blot to ehre Hochtiet. Dor spaddelt denn vele vun ehr rüm, dicht bi dicht. Wi hebbt al hunnerte sehen. Elkeen Johr wedder. Un elkeen Johr wunnerwarkt wi, wo de all herkaamt, un wo se later afblievt.
Man wi freut uns, dat se ok dit Johr wedder dor sünd — blots een orrer twee Daag — aver nu weet wi, dat Fröhjohr is dor.

Anke Nissen

 

6.3.05 ...Dat eerst Amselleed

Bramfeld an'n AvendHüüt hett bi uns de Sünn schient, trotz veel Snee un Ies, un dat was bannig kolt, dorbi is doch nu al de 6. März. Hüüt avend, dat weer woll bald Klock söven, güng ik ruut op'n Balkon. Dat wüür bilütten düster.
Ik dach, dat kann nich wohr ween. Op uns Dack sung en lütt Amselhahn sien Leed. He quinkeleerte as dull un wull goor nich dormit ophöörn. Un in Hinnergrund weer en Mees luut an Ropen un en anner antert ehr. Mien Hart wüür ganz wiet. Ik wull an levsten en Sprung in de Hööcht maken, so heff ik mi freit. Ik gläuv, mien Ogen sünd natt worrn.
Den ganzen Dag harrn de Vagels freten, as uthungert Raven; Rosinen, Appels, Nööt un Köörn von Sünnblomen un Hirse un noch so allerhand. Immer wedder heff ik jem Foder henbröcht, denn ok de Kattekers weern kamen. För mi was dat nu, as wenn se all Danke seggen wullen.
Un ik segg dat nu ok: Danke, lütt Vagels, dat ik nu wedder Hoffnung heff: Dat warrt trotz all den depen Snee, de Küll un den kolen Wind, wedder Fröhjohr kamen.
Danke!

Gertrud Everding

 

25.2.05 ...De olle Appelboom

He steiht achtern in de Eck in unsen Goorn, de olle Appelboom. Dull is dat nich mehr mit em.
He warrt noch gröön un blöht düchtig, man in em wahnt sommerdaags jümmer so gräsig Wanzen, een mag meist nich ünner em dörch gahn.
Appeln sünd dor alle Johr an, gor nich wenig, man smecken doot se nich, ok nich as Appelmoos. De Wind smitt mal welk dal, de annern blievt hangen.

Bet dat Winter warrt, so as nu. Dat is, as harrn de Vagels dor al up luurt. Wat is dat en Leven up un ünner den Boom! De swatten Drosseln kaamt meist dutzwies, graad so as de Wacholderdrossel mit den griesen Kopp un de bunte Bost. Goldammern, Doompfaffen, Gröönfinken haalt sik ehre Vitamine. De Stieglitz weer to Besöök, ok de bunte Specht hett sik sien Deel nahmen un de Lünken hüppt twischen rüm. Ok de dicken Duven wackelt dor mang rüm. Se sitt mal up de Eerd un sünd an't Picken, mal sitt se baben in den Boom un turnt up so enen halv-fulen Appel rüm. Un ik mütt mi wunnern, ik heff nich eenmal sehn, dat een vun de Vagels dalfullen is!
Blots wenn uns' Kater kümmt, denn sünd se weg — för en korte Tiet.

Dat weer en ganzen Barg vun Appels, de up de Eerd legen, mit den Bessen heff ik de an de Siet feegt. Mi dücht, veel blievt nich na, wenn de Winter üm is.
Wenn ik mi dat allens so ankieken do, denn denk ik, wi wüllt em man stahn laten, den ollen Appelboom.

K.-H. Nissen

 

15.2.05 ...Moder Swattkittel ehr Eersten!

Eentlich kaamt se ja eerst in'n Märzmaand, de lütten Swattkittel, man hier sünd se al — Foto hüüt maakt. Dat weern ok de eenzigen in de ganze Rott. Fief lierlütte quietschfidele Frischlinge mit rehbrune Striepen! Dat is, as wenn een al en Oosterei finnt. Se sünd dor! De eersten Lammer sünd ok dor, un de eersten Vagels singt. Fröhling kann kamen.

Marlou Lessing

 

11.1.05 ...Hefft Se sik ok wunnert?

Keeneen hett bi den Tsunami von dode Dierten in Asien snackt. Oder hefft Se wekke sehn in't Kiekschapp, up Sumatra oder in Thailand? Ik nich.
Landschap in'n Yala-Park (vör den Tsunami): en siede, flache Gegend, in de de Flootwell wiet rinrullen däIn Sri Lanka is de grote Yala-Nationalpark, de is ok binah ganz kaputt von de Floot. De Bööm un dat Land in Gruus un Muus un tweehunnert dode Minschen, dat hefft de Helpers dor vull Grugen funnen — aver nich een Diert.
Keeneen weet, woso de Dierten dat klookkregen, wenn en Katastrophe kümmt, aver dat schient so, dat se dat vörher weten. Wo kann dat sünst angahn? Hefft se woll'n lütten Seismographen in ehrn Kopp? Föhln de dat al, wenn de Minsch noch goor nich an de Gefohr denken deit?
Ja, se sünd meist all lebennig un sund, de Apen, de Leoparden, Wildswien, Woterbüffel, Krokodilen, Kaninken, Hasen un woll so 200 Elefanten un de velen, velen Vagels un Lüttdierten.
De groote Flootwell keem woll dree Kilometer wiet (!) in den Nationalpark rin un mit veel Macht, slimm noog, dat se all doot blieven kunnen — aver dor weern de Dierten woll al in Sekerheit. Ok in de Dörpen un Städer geev dat bloots wenig dode Dierten to sehn. Dorbi gifft dat dor noog Hunnen, Katten un Zegen.
De Wetenschap kann dat nich bewiesen, un dat stimmt ok nich immer un överall mit de Fröhwarnung, aver meiste Tiet.

Wat geiht in den Bregen vun düsse Elefantenkoh vör? Un in ehr Hart?Wokeen weet dat, aver villicht hett de kloke homo sapiens dat ok in ole Tieden wusst un hett sien Weten vör luter Radio un Feernkieken meist ut sien Kopp verloren? — Hefft de Dierten en sössten Sinn för Saken, de wi goor nich mehr spitzkregen? Warrt dat nu Tiet för uns, se nich ganz so nixhaftig antokieken?

Gertrud Everding

 

14.11.04 ...Een Morrn in'n Nevelmaand Utsnitt. Se seht dat ganze Bild, wenn Se op klickt!

Hett sik wat mit Nevelmaand, mennigmaal schient ok de Sünn.
Hüüt morrn güng de Sünn graad mit Root un Gold över Bramfeld up un ik leeg noch in't Bett, da spegel sik wat in de Fensterschieven. Immer hen un her — op un daal güng dat — op un daal. — "Wat is dat?" dach ik. "Sünd dat Bläder in'n Wind, de da danzen?"
Aver dat was goor keen Wind! De Bööm rögten sik nich. Een mutt doch weten, wat dor loos is! Ik sett mi hen un keek na den Boom.Klick op dat Bild to'n Vergröttern!
Nu kunn ik dat nau sehn. Lütte, swatte Vagels, de in uns Vagelbeerboom hen un herflegen dään, weern dor. Gau sprüng ik ruut ut'n Bett! Wat is nu? Ik dach, ik spinn — rein goor nix mehr to sehn, bloots Sünn, Heben un dat Land, dat richtig rosa blänkern dä, un an de anner Eck lücht de Heben gnittblau.
Aver dröben in de hogen, swatten Pappeln wippsteerten nu woll so hunnert Vagels bi'nanner. Man wat jiepert de! Un denn güng dat wedder to uns röver, rin in den roden, lüchten Vagelbeerboom, mallerig vör Freid un Övermoot.
Spreen weern dat, woll hunnert Spreen oder noch veel mehr. Ik kunn se nich tellen. Huiii — susen se wedder dröben na de Pappeln — un huii — wedder bi uns in'n Boom. De scheunen, roden Vagelbeern smeckten woll bannig goot.Utsnitt. Se seht dat ganze Bild, wenn Se op klickt!
Mit mien Knipskassen heff ik se denn noch fotegrafeert kregen.
Bilütten wüür de Heben wat lichter un de Spreen sünd denn wiederflagen. De grote Sehnsucht na warmen Sünnschien un immer noog Foder harr se tofaat kregen.

Tschüß Spreen! Kümmt ji sund wedder!

Gertrud Everding

 

26.10.04 ...Letzte totaale Maanfinsternis bet 2007!

In de Nacht op Dunnersdag, den 28.10., kort na Klock veer an'n Morgen gifft dat en totaale Maanfinsternis — un dat is denn eerstmal bet 2007 de letzte, de een vun Düütschland ut sehn kann! Wenn dorüm dat Weder dat tolett, lohnt sik bi Klock halvig fief an'n Dunnersdag en Blick na Westen! Bet Klock 5.45 is de totale Finsternis vörbi, de Maan is denn bloots noch deelwies verfinstert.


 12.10.04 ...Ahornpest? Runzelschorf!

Nu de Harvst kümmt, klöört sik överall dat Loof un fallt dal. In de Städer sünd dat mehrst Ahorn- un Platanenbläder, wieldat dat robuste Bööm sünd, de dat Stadtleven good afköönt; se warrt dorüm faken an de Straten plant. Man wat is dat? Hebbt de Ahornbööm de Pest? Dicke swatte Placken sitt op de Bläder, dat een bang warrn kann. Weer ja al en Drama mit de Miniermotte an de Kastangelnbööm — sünd nu ok de Ahorns an de Reeg? Warrt de Städer kahl? Nee: Düsse Placken, dat is en Pilzbefall. De Pilz heet Runzelschorf (Rhytisma acerinum), nöömt warrt dat ok "Teerfleckenkrankheit". Man dat is keen gefährliche Süük; de Boom kann dor good mit leven. In dat affullen Blatt bildt sik de Sporen vun den Pilz ut, de denn in't nehgste Fröhjohr anner Bööm befallt. Den Boom maakt dat nix. Uns Städer blievt — is to höpen — gröön.

Marlou Lessing


 26.9.04 ...Keen Füür!

Ganz groot stünn dat up de eerst Siet in uns Blatt: Ik dörv den drögen Kraam ut unsen Goorn nich mehr verbrennen. Hett he seggt, uns Minister!
Recht hett he, wat kann dor allens passieren, wenn nich uppaßt warrt. Noch veel leger is de Rook, de de Navers stören deit. "Wahnsinnig vele" hebbt sik bi em beklaagt, hett he seggt.

Man, wat maak ik nu? Ik kunn dat je, avends in Düüstern, bi mienen Naver över den Tuun smieten. Anneke, mien Fru, schüttelt mit den Kopp. "De deit dat sülvige bi sienen annern Naver, un dat duurt nich lang, un allens landt wedder bi di."
Wi sullen dat dröög Struukwark schreddern, hett he seggt, uns Minister. De Hackels köönt wi verköpen, dat is noch en Geschäft. Nu sünd disse Schreddermaschiens man so bannig luut. Kiek, un dat will he ok nich hebben, uns Minister.

Ik heff mit Korl dor över snackt, he is meist en verstännigen Minschen. Ditmal weer dat nix mit em. He meen doch wohrhaftig, wi sullen allens rutrieten, de Büsch, de Blomen, den Rasen, un denn mit griese Steen ut Beton plaastern. Dat weer licht to plegen, dor gifft dat keen Unkruut, keen Wildkruut. In de Mitt kümmt en Pott, sommerdags för en poor Stiefmuttern un in'n Winter för enen lütten Dannenboom.
Anneke harr meist Tranen in de Oogen, as se dat höört hett — allens rutrieten. Nee, dat geiht nich. Sülms wenn ik dat wull, dat geiht nich. Up dissen Beton wasst de lütten gelen Blomen nich, de he so geern mag, uns Minister. Un de Amsel findt keen Metten un de Katteker keen Nööt.
Ik heff mi dat överleggt. Ik laat allens eerstmal liggen in en Eck. Wer weet, wat dat anner Johr Nies gifft. Villicht doch wedder Füer? Villicht Kompost?

Karl-H. Nissen

 

22.8.04 ...Libelln to'n Koffi

Ick bün hüüt Nahmiddag bass erstaunt wäst, as ick nah eenen düchtigen Gewitterrägen rut up mienen Hoff keem.
Intwüschen wier wedder strahlen Sünnenschien un ick wull mi bäten up de Terrass setten.
Kohsteert? Nee, Waterjumfer!Dor heww ick seihn, dat in de Luft so väle Libellen ümherschwirrten, poor Dutzend, denk ick. Orrer mihr noch. De sünd heel flink rümsuust und hebben sick in de klore Luft vergnögt, oewer 'ne Stunn lang. Ick heww an 'ne Oort Danz dacht. Un dat sehg so schön ut! As lütte güllen Vagels. De ranke Lief blinkerte in dat Sünnenlicht un de fienen Flögel hebben schemert as blaag-güllne Sied.

Wi hebben denn unsen Koffi buten drunken un uns an dit wunnerbore Naturschauspill freugt. De Libellen sünd woll de schönsten von all de Insekten, denk ick. Majestäätsch! Ick heww hüüt Avend ees in't Wöörbook nahkeeken, ob dat ok 'ne rein plattdüütsche Beteiknung giwwt. "Waterjumfer" is mi inlüchtend, awer denn heww ick noch "Kohsteert" funnen. Nee, dat hebben se nich verdeent!
Bi uns heiten se eenfach Libell...

Karin Albrecht

 

9.8.04 ...Noch en selten Besöök: de Perseiden

Eentlich wullen wi ja bloots alle Steernkieker mit en Notiz in düt Notizbook op de Perseiden henwiesen, de nu wedder kaamt — dor is dat unverwohrens to en langen Bidrag worrn, wieldat dat so veel to to seggen geev. Also: An'n 11. August nachtens Perseiden kieken! Mehr över to lesen gifft dat hier.

Marlou Lessing

 

27.7.04 ...Selten Besöök: Neeshornkävers

Mit eenmaal weer he dor. Kennt Se em? Negsten Dag weern twee togang. Nu sünd se in de Natuur verswunnen: Uns Neeshoornkävers! — Krabbelt ja kuum noch in uns schunnen Natuur rüm. Rudi Witzke in Stockelsdörp hebbt se besöökt, un he hett ehr fotografeert. Mehr Infos to Neeshornkävers gifft't hier.

Se - de Käverfru - hett keen Neeshorn He - en staatsche Kävermann - hett sin  Neeshorn!

In de Narichten leest wi vundaag, dat se nu en Gendatenbank för utstarven Deerten anleggt. Tachtigdusend Johr schallt de Gene deepfraren opbewohrt warrn, ok wenn de Deertenaart al lang utsturven is. Is dat nu good? — Ik meen, nee. Dat is keen Foortschritt, dat is en Kapitulaschoon. Wi schullen de Deerten ehrn Levensruum schulen un ehr dat lebennige Leven in de Natuur mööglich maken, nich dood in't Deepköhlfack! Man nee, wi geevt dat op un freert ehr in. Sünd wi al so wied rünner?! Wat meent uns levige Neeshornkävers dorto?

Rudi Witzke (Fotos)

 

1.6.04 ...De Venus-Dörgang dör de Sünn

An'n 8.Juni 2004 passeert wat ganz Besünners: dor wannert de Venus twüschen Eer un Sünn langs. — Woso is dat denn wat Besünneres?

Na, wi weet ja, de Venus is — jüst as Merkur — een vun de "binneren" Planeten in uns Sünnensystem; se sünd nehger an de Sünn as de Eer un dreiht sik ok bannig wat fixer üm ehr. Dor kümmt dat denn ja wat fakener vör, dat de Venus merrnmang twüschen Sünn un Eer dörsuust, nich? Is dat denn nich jümmers en "Venus-Dörgang dör de Sünn"? Nee, denn de Bahnen vun Venus un Eer üm de Sünn liggt nich op en Evene; se sünd beten wat verkippt. Dorüm suust de Venus mehrst (vun de Eer ut sehn) "baven" orr "nerrn" an de Sünn vörbi, avers se överstriekt nich den Lief vun de Sünn. Wannehr se dat deit, dat köönt de Astronomen utreken; un dat passeert jüst an'n 8.Juni. Dat letzte Maal weer't 1882! De neegsten Malen warrt 2012 un 2125 ween. Dor seht Se, wa raar dat Begeevnis is! Veel rarer as en Sünnfinsternis.

Man anners hett dat veel mit de Sünnfinsternis gemeen. Liek as bi de Sünnfinsternis wannert de Himmelskörper, vun de Eer ut sehn, över de Sünn — bi hellen Dag natüürlich, dat passeert ja vör de Sünn. Man wieldat uns Maan veel nehger bi is, lett he grötter un deckt tofällig jüst de Sünn ganz af. Dat deit de Venus nich; liekers de Venus grötter is as uns Maan, lett se op de Entfernung man bloots as en Flegendreck op den reesenhaftigen Sünnenlief. Nerrn wannert se vörbi as en lütten Klecks. Un dat heet, dat de Sünn nich verdüüstert warrt; un dat heet, dat een dat nich ankieken kann!!! Wokeen dat versöökt, riskeert sin Oogenlicht!! Dat geiht bloots mit besünnere astronoomsche Utrüstung.

In Middeleuropa is dat an'n Vörmiddag "to sehn", also nich to sehn; wi köönt man dat schöne Geföhl hebben, dat dor jüst wat Besünneres passeert.

Se köönt avers op en gode Websiet en schöne JavaScript-Animaschoon ankieken, 'neem de Afloop best to sehn is: www.venus-transit.de.

Marlou Lessing

 

1.5.04 ...Is al Rapsblööt! Un de Immen?

De Raps blöht binah 14 Daag to fröh. Uns schall dat recht sien, blots sien "Bestäuber" hebbt Noot mit de Küll. Sünd ja blots de Hummeln, de ehr Körperwärm dörch en besünnern Muskel wat höger "ziddern" köönt. Se köönt denn ok bi köhles Wedder ehr goodes Wark doon. Aver de schafft dat nich, mit all den Blomen, de nu tövt, dat en Eerd-Imm orrer en vun'n Imker vörbikümmt.

Mien Broder hett poor Völker un vertellt, dat he bannig veel verleert, wieldat sien Immen rutlockt warden vun all dat Blöhen ümher un denn mit 'n koolen Mors nich na Huus hen kaamt. Aver de Natuur ward dat schon schicken. Gifft villicht beten Raps weniger, un de Königin mutt en Tosatzschicht bi't Eierleggen inlegen, und de Honnig ward dürer. För uns is dat nich slimm; an'n leegsten is't för de verfraren Immen.

R.Witzke

  21.4.04 ...Twee Tipps för'n Maimaand

Wenn Se in'n Maimaand noch nix vörhebbt un wat beleven wüllt, denn gifft dat twee intressante Saken, vun de wi höört hebbt:
In'n Lent maakt Dusende vun Ringelgöös op ehr Wannerschaft op de Halligen in'e Noordsee Staschoon un slaat sik den Buuk vull vun dat leckere Gras, ehrdat se wiederfliggt heel wied na'n Noorn rop. Na, un wat de Lü op de Halligen sünd, de maakt dat Beste ut so en Överfall: se maakt de Ringelgöösdaag. RingelgöösNu al to'n söventen Maal. Vun'n 1.-9. Mai köönt Se op de Halligen Ringelgöös bekieken un allens över ehr to weten kriegen; wat dor allens nau los is, dat steiht op de Websiet www.ringelganstage.de.

Na, un sodraad de Ringelgöösdaag vörbi sünd, glieks an'n 10.Mai, geiht de Klimastaffel an. Dat is en Staffelloop dör alle Bunneslänner, de an'n 1.Juni in Bonn toenn geiht — nau to de Eröffnung vun'e "Internaschonale Konferenz för erneuerbare Energien". Wa wenig de Staaten op de Welt för de Reddung vun't Klima doot, is ja skandalöös. En Deklaraschoon för den Klimaschuul is in den Staffelstab vun de Klimastaffel verpackt. De Staffel start an'n 10.Mai in Kiel un löppt denn toeerst dör uns nördliche Bunneslänner; un wokeen fit is un mitlopen will, de schall sik man de Websiet www.klimastaffel.de ankieken!

Marlou Lessing

 17.3.04 ...Wahnung frie! Familjenfründlich!

Gistern heff ik in uns Loggia Fröhjohrsblomen plant. Is dat'n Pracht mit de Narzissen un Primeln un ok de velen Steefmüddern! Wat de lüchten in'e Sünn! Nu heff ik ok noch de lütten Osterhasen twüschensett mit veel bunte Ostereier un täuv nu, dat'n Amselpoor kümmt, Hochtiet makt un'n Nest buut. Uns ole Amselhahn is vöricht Johr in'n Winter doodbleven. He weer al olt, un nu bruukt wi niege Bewahners för een von de Blomenkassens, de'n wunnerboren schützten Platz hett. Dat wüür scheun!
Uns Hund is ok'n ganz leven Keerl, de deit jüm nix un geiht ok nich an dat Nest, wenn Se denn een buut hebben. Un he stöört Se ok nich bi de Hochtiet.
Ik kann Se verspreken, ik hölp ok mit singen un tereleern, grad so as Se ok, wat bi de Amseln ja heten schall: Düsse Wahnung höört mi to, kümm mi nich dormang!
Leve Amselöllern, ik beed Se, kamen Se to'n Bröden, ik garanteer för'ne gode Bewachung gegen Hesters, Kattekers, Katten un so'n widerliche Dierten, de Se Ehr Eier oder Kinner freten wüllt.
Mien Hund un ik sülben, wi höllt de Nachtwach un passt op as Schießhunn'n, wirklich.
Dat hefft wi al goot lehrt de letzten Johrn. Wat meent Se, wat wi den Hester verjaagt hefft, as he de Lütten freten wull! Se köönt mi dat gläuven.
Uns fehlt düt Johr wat op uns Balkon, wenn dor keen lütt Vagels opwassen.
Leve Amseln, överleggt Se nich so lang, sünst is de scheune Platz twüschen de Blomen weg.
Un kümmt Se gau. Dat is ja nu Fröhjohr!

Gertrud Everding

  9.3.04 ...Mit'n Hund op Steerntour

Avends üm Klock negen gah ik oft mit mien Hund noch maal spazeern. De Rüde mutt doch maal Gassigahn un ik, ik mutt in'e Steerns kieken.
Wenn keen Wulken dor sünd, is dat 'ne reine Freid. In'n Oosten steiht as'n Lantücht de Planet Jupiter an hogen Heben, un güntsiet lacht noch hiller un grötter in'n Westen de Planeet Venus. De geiht denn aver bald slapen. De blifft nich de ganze Nacht bi uns. He is düsse Tiet bi uns Avendsteern. Dat ännert sik eerst in'n Sommer, denn warrt he uns Morrnsteern.
In'n Süüden steiht immer noch de Sirius, wenn ok al beten deep an Horizont, is he de hellste Fixsteern an uns Heben. He is aver keen Planeet. He höört to dat Steernbild "Groter Hund" un dat is bi uns en Wintersteernbild. Dat kümmt eerst to Wiehnachten wedder hoch. De Steernbiller löppt na de Gesetten von de Fixsteerns över den Heben, de Planeeten löppt ehr egen Bahn, na egen Gesetten un hebbt anner Ümlooptieden. Planeten warrt ok Wandelsteerns nöömt, wieldat se nich immer mit de Fixsteerns un de Steernbiller tosamen löppt. Se hebbt, so as uns Eer, de ja ok'n Planeet is, ehrn eegen Weg um de Sünn. Aver scheun to kieken is dat.

So heff ik immer wat to spekuleern, un de Tiet warrt mi nich lang, wenn de Hund op Schnüffeltour geiht. Morrns singen nu all de Meisen un Bookfinken, wenn ik mit den Hund rutgah. Ik mutt mi wirklich wunnern, wat de bi düsse Küll rümtereleern.
Mi geiht dat noch immer an'n besten in de Stuuv an'e warme Heizung. Se ok?
Bloots avends nich. Denn mutt ik Steerns kieken.

Jupiter is (vun Hamborg ut) to sehn an:
8.03.04 Opgang 17.49 Uhr Ünnergang 7.19 Uhr Venus an'n Avend
Op- un Ünnergang verännert sik mit de Tiet, un so is denn an'n:
29.03. Opgang 16.11 Uhr Ünnergang 5.50 Uhr

Venus (vun Hamborg ut) is to sehn an:
8.03.04 Opgang 8.14 Uhr, Ünnergang 22.46 Uhr
Op- un Ünnergang verännert sik mit de Tiet, un so is denn an'n:
29. 3. Opgang 7.23 Uhr, Ünnergang 23.45 Uhr

Wenn dat al daghell is, köönt wi de Steerns natüürlich nich sehn. — Nu kieken Se man scheun in'e Luft, aver fallt Se nich dorbi op de Nees. En godes Link för'n Online-Spazeergang is düt.

Gertrud Everding

 


na baven